Chi Skeꞌ Kakꞌon Ganar Yin Masanil Tzet Man Watxꞌoj
5
Jaꞌ jaon chi kaoc yin cu cꞌul tol jaꞌ Jesús,
jaꞌton Cristo.
Ta chi kaoc jun tuꞌ yin cu cꞌul,
yuninal jon xa Dios.
Yu chi cu camcꞌulne cu Mam Dios,
chi cu camcꞌulne pax ebꞌ yuninal.
2 Yu jun tuꞌ,
yuxan kotaj,
tol lalan cu camcꞌulnen Dios,
ta lalan cu jijen tzet chi yalaꞌ,
lalan ton cu camcꞌulnelen cu bꞌa jaon yuninal jon xa tiꞌ xin.
3 Ta yel chi cu camcꞌulne Dios,
oj cu jije ẍejbꞌanil.
Man yaꞌtaj oj cu jijen tzet chi chejle cu bꞌeybꞌalne.
4 Jaꞌ tzet man watxꞌoj yul yibꞌankꞌinal tiꞌ,
cannajxa yalan ku jaon yuninal jon xa Dios tiꞌ.
Yutol chi kaoc cu cꞌul yin,
yuxan chi kakꞌ ganar scan wan tuꞌ yalan ku.
5 Asan ebꞌ chi yaoc yin scꞌul tol jaꞌ Jesús,
Scꞌaal ton Dios,
asan ebꞌ chi skeꞌ yakꞌon ganar scan tzet man watxꞌoj tuꞌ yalan yu.
Chi Yakꞌ Sbꞌa Dios Testigoal Yin Scꞌaal Jesucristo
6 Jaꞌ Jesucristo,
julnaj ecꞌ yul yibꞌankꞌinal tiꞌ.
Jul yakꞌnaj bautizar sbꞌa yetoj jaꞌ.
Elnaj pax ẍiqꞌuil yet jix cami.
Man asanne oj tol jix jul yakꞌ bautizar sbꞌa,
tol jix el pax ẍiqꞌuil Naj.
Chi yakꞌ sbꞌa Naj Espíritu testigoal tol yel ton wan tiꞌ.
Jaꞌ Naj Espíritu tuꞌ,
yel cꞌal chi yal Naj.
7 Ey oxwan mac chi yakꞌ sbꞌa testigoal yin Naj bꞌey satcan,
cu Mam Dios,
yetoj Naj mac Skꞌane Dios sbꞌi,
jaꞌton Cristo,
cꞌal Naj Santo Espíritu.
Jaꞌ ebꞌ oxwan tuꞌ,
jun laan cꞌal yalon ebꞌ,
tol jaꞌ Jesucristo,
Scꞌaal ton Dios.
8 Yetoj pax bꞌey yul yibꞌankꞌinal tiꞌ chi yakꞌ sbꞌa Naj Espíritu testigoal yin.
Ey pax caabꞌxa tzet chi yakꞌ sbꞌa testigoal yin.
Sbautismo yetoj jaꞌ,
cꞌal ẍiqꞌuil jix el yet jix cami.
Jaꞌ oxebꞌ tiꞌ,
jun laan cꞌal ẍaꞌlen sbꞌa yalon ebꞌ,
tol jaꞌ Jesucristo,
Scꞌaal ton Dios.
9 Ilaꞌla,
chi cu chaꞌ kabꞌ tzet chi yal ánima yul yibꞌankꞌinal tiꞌ.
Jal tzet chi yal Dios,
yel xacꞌal miman yeloc apnoj,
yutol jaꞌcaw chi aloni.
Jaꞌ chi aloni,
tol Scꞌaal ton Dios Jesucristo tuꞌ.
10 Jaꞌ jaon chi kaoc cu cꞌul yin Naj Scꞌaal Dios tuꞌ,
kotaj yin cu pixan tol yel ton chi yal Dios yu Scꞌaal tuꞌ.
Jal pax ebꞌ cꞌam chi yaoc scꞌul yin Dios tuꞌ xin,
jaxca tol lekꞌtiꞌ Dios tuꞌ yul sat ebꞌ.
Yutol cꞌam chi yaoc ebꞌ yin scꞌul tzet chi yal Dios yin Scꞌaal.
11 Jaꞌton jun yalnaj can Dios tiꞌ,
tol chi yakꞌ cu kꞌinal tol ey cꞌal yin tobꞌalkꞌinal.
Jaꞌ jun kꞌinale tuꞌ,
jaꞌ yin Scꞌaal tuꞌ eyocoj.
12 Yu tuꞌ xin,
ta eyoc Naj Scꞌaal Dios tuꞌ yin cu cꞌul,
ey cu kꞌinal yin tobꞌalkꞌinal.
Jal ebꞌ cꞌam chi yaoc scꞌul yin Naj xin,
cꞌam skꞌinal ebꞌ yin tobꞌalkꞌinal.
Kotaj Tol Ey Cu Kꞌinal Yin Tobꞌalkꞌinal
13 Jaꞌ jaex che yaoc je cꞌul yin Naj Scꞌaal Dios tuꞌ,
jaꞌ ey jex chin tzꞌibꞌetoj wan tiꞌ,
yet watxꞌ che yotajne eloj,
tol ey cu kꞌinal tol ey cꞌal yin tobꞌalkꞌinal.
14 Yuxan,
cꞌam chi cu xiw cu txali tet Dios,
yutol kotaj,
tol yal cꞌal tzet chi cu kꞌan tet,
oj yabꞌe,
ta jaꞌ yochwan chi cu kꞌanaꞌ.
15 Kotaj,
tol chi yabꞌ Dios cu txa.
Yuxan kotaj pax oj,
tol chi cꞌal yakꞌ Dios tzet chi cu kꞌan tet.
16 Kꞌinaloj ta che yil junoj kuẍtaj ma junoj kanabꞌ eyoc yin spenail,
manaj jun spenail tuꞌ chi iꞌontoj bꞌey camich,
catuꞌ chex txali yu ebꞌ,
oj to akꞌle skꞌinal ebꞌ yu Dios.
Ta ey spenail tol chi yiꞌtej camich kibꞌan,
cꞌam tzet chi wal ey jex tol chex txali yu ebꞌ chi unen wan tuꞌ.
17 Masanil tzet man watxꞌoj,
pena yul sat Dios.
Ey ton pax spenail cꞌam chi cu cam yu.
18 Kotaj,
ta yel yuninal jon xa Dios,
cꞌamxa chi cu bꞌeybꞌalne spenail yutol teynebꞌil jon yu Scꞌaal.
Yuxan,
cꞌamxa chi skeꞌ cu yetnen naj diablo.
19 Kotaj tol yet jon xa Dios,
jal masanil ebꞌ yet yul yibꞌankꞌinal tiꞌ,
eyto oc ebꞌ yul skꞌabꞌ diablo.
20 Yetoj pax oj,
kotajxa,
tol jix julecꞌ Naj Scꞌaal Dios tiꞌ.
Jaꞌ jix akꞌon naꞌcha el ku,
yet watxꞌ chi kotajne el Naj jaꞌcaw Dios.
Yu jun tuꞌ,
yuxan ey jon xa oc yin Naj jaꞌcaw yel,
jaꞌton Jesucristo,
Scꞌaal Dios.
Jaꞌ Scꞌaal tuꞌ,
caw Dios toni.
Jaꞌ chi akꞌon cu kꞌinal tol ey cꞌal yin tobꞌalkꞌinal.
21 Jex jin camcꞌulnebꞌil,
manche je yaoc je naꞌbꞌal yin tzet chi al-le oc diosal.