Yuninal Jon Xa Dios
3
Ilaꞌla,
caw chi cu scamcꞌulne cu Mam Dios.
Ilaꞌ,
tol chi cu yaloc yuninal oj.
Yel toni,
yuninal jon xa.
Jaꞌ ebꞌ yet yul yibꞌankꞌinal tiꞌ,
cꞌam chi naꞌcha el yu ebꞌ,
ta tol yuninal jon xa Dios,
yutol man yotaj oj Dios ebꞌ.
2 Jex wuẍtaj,
jex wanabꞌ,
camcꞌulnebꞌil wu an,
yuninal jon xa Dios tinaniꞌ.
Man to txequeloj tzet utbꞌil oj yun kelocoj.
Asan xin,
kotaj,
tol jaꞌ yet oj jul Jesucristo,
laan xa oj kun jaxca Naj,
yutol oj kiloc tzet utbꞌil yili Jesucristo.
3 Masanil jon chi kaoc Cristo yipoj cu cꞌul yu jun jix wal tiꞌ an,
lalan swaꞌxi oc cu bꞌeybꞌal,
yet watxꞌ caw watxꞌ jon jaxca Naj Jesucristo tuꞌ.
4 Jaꞌ mac chi cꞌal unen spenail,
man lalan oj sjijen ẍejbꞌanil Dios.
Yutol jaꞌ mac cꞌam chi jijen wan chejbꞌanile tuꞌ,
jaꞌ spenail chi el yuneni.
5 Kotajxa,
tol jaꞌ yu yiꞌon el cu penail Naj Jesucristo,
yuxan jix julecꞌ bꞌey yul yibꞌankꞌinal tiꞌ.
Cꞌam niꞌoj spenail yin Cristo.
6 Yu jun tuꞌ,
yuxan ta yel ey jon oc yin Naj,
manche xa cu bꞌeybꞌalne spenail.
Jal pax ebꞌ jacꞌalaꞌ sbꞌeybꞌalnen spenail xin,
cꞌam chi yaoc snaꞌbꞌal yin Naj,
catuꞌ man to otajbꞌiloj Naj yu ebꞌ.
7 Jex jin camcꞌulnebꞌil,
manche je yakꞌ je bꞌa etnele yu junoj mactxequel.
Ta tol jichan cꞌal chi kute cu bꞌeybꞌal,
jichan jon ton jaxca Cristo xin,
yutol jichan cꞌal sbꞌeybꞌal Cristo tuꞌ.
8 Jaꞌ mac jacꞌalaꞌ sbꞌeybꞌalnen spenail,
jacꞌalaꞌ yet to cꞌaltaꞌ naj diablo,
chi yal tuꞌ,
yutol jaꞌ yet tax jix el yich spenail tuꞌ masantaꞌ tinaniꞌ,
jacꞌalaꞌ spenail chi yun naj diablo tuꞌ.
Yu jun tuꞌ,
yuxan jix julecꞌ Naj Scꞌaal Dios bꞌey yul yibꞌankꞌinal tiꞌ,
yu sjul Naj yakꞌon lawoj tzet chi el yunen naj diablo tuꞌ.
9 Ta tol yel yuninal jon xa Dios cꞌamxa chi cu bꞌeybꞌalne spenail,
yutol jaꞌ snaꞌbꞌal Naj eyoc kin.
Jaꞌ tinaniꞌ,
cꞌamxa chi skeꞌ cu bꞌeybꞌalnen spenail,
yutol yuninal jon xa Dios.
10 Jaxca ton tiꞌ chi yun xeclo eloj,
mactxequel ebꞌ yuninal xa Dios tuꞌ,
mac pax txequel ebꞌ yuninal naj diablo tuꞌ.
Ta man jichanoj cu bꞌeybꞌal,
ta cꞌam chi cu camcꞌulne ebꞌ kuẍtaj,
ebꞌ kanabꞌ,
caw yel man yuninal oj jon Dios.
Sowalil Chi Cu Camcꞌulnele Cu Bꞌa
11 Jaꞌ jun chejbꞌanile oj waltoj ey jex tiꞌ,
jaꞌ tax yet jix jex oc yetoj Dios,
catuꞌ jix je chaꞌon el yich je yabꞌeni:
“Cu camcꞌulnele cu bꞌa,”
ẍi jun chejbꞌanile tiꞌ.
12 Yuxan,
ma skeꞌ queytuꞌ chi kute cu bꞌa jaxca jix yute sbꞌa naj Caín.
Yet naj diablo naj Caín tuꞌ.
Yuxan jix smakꞌ cam jun yuẍtaj naj.
Yu cꞌal tol jichan sbꞌeybꞌal naj yuẍtaj naj tuꞌ,
yuxan jix smakꞌ cam naj.
Jal naj xin,
pena sbꞌeybꞌal naj.a
13 Jex wuẍtaj,
jex wanabꞌ,
manche qꞌueya je cꞌul yet oj chichon oc scꞌul ebꞌ yet yul yibꞌankꞌinal tiꞌ je yin.
14 Jaꞌ yet yalantoj,
jaxca tol camnaj jon el yul sat Dios.
Jal tinaniꞌ xin,
kotajxa,
tol jix akꞌle cu kꞌinal tol ey cꞌal yin tobꞌalkꞌinal,
yutol eyxa cu camcꞌulal yin ebꞌ kuẍtaj cꞌal yin ebꞌ kanabꞌ.
Ta cꞌam cu camcꞌulal yin ebꞌ,
jacꞌalaꞌ camnaj jon to yul sat Dios,
chi yal tuꞌ.
15 Ta jacꞌalaꞌ ẍichon oc cu cꞌul yin junoj kuẍtaj ma yin junoj kanabꞌ,
makꞌom jon cam ánima yul sat Dios.
Kotajxa,
tol cꞌam junoj makꞌom cam ánima ey skꞌinal tol ey cꞌal yin tobꞌalkꞌinal.
16 Kotaj tzet utbꞌil yeoc scamcꞌulal Dios ey jon,
tol yakꞌnaj cam sbꞌa Jesucristo cu yaꞌiloj.
Yuxan,
sowalil jaxca ojabꞌ tuꞌ chi kute cu camcꞌulnen ebꞌ kuẍtaj,
ebꞌ kanabꞌ,
bꞌejan ojabꞌ cu cꞌul kakꞌon cam cu bꞌa sqꞌuexeloj ebꞌ.
17 Kꞌinaloj watxꞌ chi ecꞌ ku,
catuꞌ chi kilon junoj kuẍtaj ma junoj kanabꞌ caw ey junoj tzet chi oc yu.
Ta cꞌam chi okꞌ cu cꞌul yin,
cꞌam niꞌoj cu camcꞌulal yin Dios,
chi yal tuꞌ.
18 Jex jin camcꞌulnebꞌil,
cꞌam chi skeꞌ tucꞌal chi kal yetoj cu tiꞌ,
tol ey cu camcꞌulal.
Tol sowalil chi cu colwa tet ebꞌ kuẍtaj ma tet ebꞌ kanabꞌ.
Jaxca ton tiꞌ oj kute cu txꞌoxon eloj tol yel chi kalaꞌ,
tol ey cu camcꞌulal.
Cꞌamxa Xiwcꞌulal Ebꞌ Creyente Sattaj Dios
19 Ta ey cu camcꞌulal tuꞌ,
kotajxa,
tol yet jon xa jun cuybꞌanile caw yel,
catuꞌ cꞌamxa cu xiwcꞌulalil sattaj Dios.
20 Ta tol chi cu naꞌ yin cu pixan tol ey spenail chi kunne,
jal Dios man oj yakꞌ low kibꞌan,
yutol ecꞌbꞌan yeoc yibꞌan tzet chi cu naꞌ,
yutol yotaj masanil.
21 Yuxan,
ta tol yotaj cu pixan,
tol watxꞌ cu bꞌeybꞌal yul sat Dios,
cꞌam chi cu xiw cu txali tet.
22 Catuꞌ yal cꞌal tzet oj cu kꞌan tet,
oj yakꞌ ey jon,
yutol lalan cu jijen ẍejbꞌanil,
catuꞌ lalan kunen masanil tzet chi ẍaꞌ scꞌul.
23 Jaꞌton jun chejbꞌanile tiꞌ,
tol chi kaoc cu cꞌul yin Scꞌaal Dios,
Naj Jesucristo,
catuꞌ chi cu camcꞌulnelen cu bꞌa,
jaxca yutenaj yalon can ey jon.
24 Ta chi cu jije ẍejbꞌanil,
ey jon oc yin Naj,
catuꞌ eyoc naj kin junjun jon.
Kotaj,
tol eyoc Naj kin,
yutol jix yakꞌ Naj Yespíritu Naj ey jon.