Jaꞌ Cristo Chi Aon Oc Cu Tiꞌ Tet Dios
2
Jaex,
jaxca tol wuninal je yei,
chin tzꞌibꞌetoj wan tiꞌ ey jex an,
yet watxꞌ manche xa je yun spenail.
Tala cꞌuxan ey ebꞌ chi unen junoj spenail cu xol,
ey jun chi aon oc cu tiꞌ tet cu Mam Dios,
jaꞌton Jesucristo,
Naj caw jichan.
2 Jaxca junoj xaambꞌal,
jaxca tuꞌ jix yun scam Cristo stooloj cu penail.
Man asanne oj yu cu penail jaon tiꞌ,
yuxan jix cam Naj,
jix cam pax yu spenail masanil ánima yul yibꞌankꞌinal tiꞌ,
yuxan jix cam Naj.
3 Ta chi kun tzet chi ẍej Dios tuꞌ kunne,
jaxca tuꞌ kotajxa Dios sicꞌlebꞌil,
chi yal tuꞌ.
4 Ta chi kalaꞌ,
tol kotajxa Dios,
ta cꞌam pax chi cu jije tzet chi chejle kun tuꞌ,
yu jun tuꞌ,
lekꞌtiꞌ jon,
chi yal tuꞌ.
Catuꞌ cꞌam niꞌoj yel eyoc kin.
5 Ta chi cu jije tzet chi al-le xin,
caw yel ey ton cu camcꞌulal yin Dios sicꞌlebꞌil.
Jaxca ton tiꞌ chi yun kotajnen eloj,
tol ey ton oc Naj kin.
6 Ta jaon chi kalaꞌ:
“Jain tiꞌ,
ey jin oc yin Dios,”
ta cu chi,
sowalil chi cꞌal cu bꞌeybꞌalne sbꞌeybꞌal Jesucristo.
Jun Chejbꞌanile Caw Miman Yeloc Apnoj
7 Jex wuẍtaj,
jex wanabꞌ,
jaꞌ jun chejbꞌanil oj waltoj ey jex tiꞌ an,
man asanne oj tinaniꞌ che yabꞌe.
Yutol jaꞌ jun chejbꞌanil tiꞌ,
albꞌilxa ey jex,
yet tax cꞌal jix jex oc yetoj Dios.
Je yabꞌnaj xa jun chejbꞌanile tiꞌ yet peyxa,
tol sowalil chi cu camcꞌulnele cu bꞌa.
8 Chi wal pax toj jun chejbꞌanile tiꞌ ey jex junelxa.
Lalan cu bꞌeybꞌalnen jun chejbꞌanile jaxca jix yute sbꞌeybꞌalnen Jesucristo,
yutol lalan yel kꞌejkꞌinal yin cu pixan.
Jaxa jaꞌcaw sajkꞌinal eyoc kin.
9 Ta chi kalaꞌ,
tol sajkꞌinal xa ey cu pixan,
ta jacꞌalaꞌ pax ẍichon oc cu cꞌul yin junoj kuẍtaj ma junoj kanabꞌ,
kꞌejkꞌinal to ey cu pixan,
chi yal tuꞌ.
10 Ta ey cu camcꞌulal yin ebꞌ kuẍtaj ma ebꞌ kanabꞌ,
tol sajkꞌinal xa ey cu pixan,
chi yal tuꞌ.
Cꞌam junoj tzetyetal chi skeꞌ yakꞌon etex el cu naꞌbꞌal.
11 Jal pax ebꞌ jacꞌalaꞌ ẍichon oc scꞌul yin junoj kuẍtaj xin,
ma junoj kanabꞌ,
kꞌejkꞌinal to ey spixan ebꞌ.
Jaxca junoj mac chi bꞌey xol kꞌejkꞌinal,
cꞌam chi yil bꞌey chi toi,
queytuꞌ ebꞌ,
yutol etexnaj el snaꞌbꞌal ebꞌ.
12 Tol chin tzꞌibꞌetoj wan tiꞌ ey jex,
jex jaxca tol wuninal jex an,
yutol jaꞌ Dios jix joꞌon can qꞌuey je penail yu Jesucristo.
13 Jex icham winaj cꞌal jex ixnamil ix tol eyxa je yoc yin creyenteal,
tol chin tzꞌibꞌetoj ey jex,
yutol je yotaj xa mac eyxa cꞌaltaꞌ ecꞌ yet cꞌamto chi waꞌnele jun yul yibꞌankꞌinal tiꞌ.
Jacꞌalaꞌ jaex jex achꞌe cꞌal jex kꞌopo,
chin tzꞌibꞌe pax toj wan tiꞌ ey jex,
yutol jix je yakꞌ ganar scan naj diablo yalan je yu.
Jacꞌalaꞌ jex uninale,
yutol je yotaj xa cu Mam Dios,
yuxan chin tzꞌibꞌetoj wan tiꞌ ey jex an.
14 Jex ichamtaj winaj cꞌal jex ixnamil ix,
chin tzꞌibꞌe pax toj ey jex,
yutol je yotaj xa Naj mac eyxa cꞌaltaꞌ ecꞌ yet cꞌamto chi waꞌnele jun yul yibꞌankꞌinal tiꞌ.
Jex achꞌe cꞌal jex kꞌopo,
eyxa je yip yin je creyenteal.
Jix je yaoc skꞌane Dios yin je cꞌul wetoj an.
Catuꞌ jix je yakꞌon ganar scan naj diablo yalan je yu.
Yu wan tuꞌ,
yuxan chin tzꞌibꞌetoj ey jex an.
15 Manche je camcꞌulne jun yul yibꞌankꞌinal tiꞌ.
Manche pax je camcꞌulne wan tzettaj yetal ey yul yibꞌankꞌinal tiꞌ.
Ta chi cu camcꞌulne wan tuꞌ,
cꞌamxa cu camcꞌulal yin cu Mam Dios.
16 Jaꞌ ebꞌ yet yul yibꞌankꞌinal tiꞌ,
asan yet smimanil ebꞌ chi yoche ocoj.
Catuꞌ chi yochen pax oc ebꞌ tzettaj yetal chi yil sat.
Catuꞌ chi seyon ebꞌ tzet chi yun smimanbꞌane sbꞌa ebꞌ.
Jaꞌ wan bꞌeybꞌale tuꞌ,
man yet oj cu Mam Dios,
tol yet yul yibꞌankꞌinal tiꞌ.
17 Jaꞌ yul yibꞌankꞌinal tiꞌ cꞌal masanil pena yochwan ebꞌ ánima,
lalan slawi ecꞌoj.
Ta tol chi kun pax yochwan Dios,
iquis jon cꞌal yin tobꞌalkꞌinal.
Jaꞌ Ebꞌ Oj Yaloc Sbꞌa Cristoal
18 Jaex,
jaxca tol wuninal je yeoc an,
slawubꞌal xacꞌal tiempo bꞌey ey jon ecꞌ tiꞌ.
Jix kabꞌe,
tol jaꞌ naj acꞌul yin Cristo,
oj xꞌoxa sbꞌa naj.
Jaꞌ tinaniꞌ,
ecꞌalxa ebꞌ chi jowi oc yin Cristo lalan xꞌoxon a sbꞌa ebꞌ.
Yu jun tuꞌ,
yuxan kotaj tol slawubꞌal xa tiempo bꞌey ey jon ecꞌ tiꞌ.
19 Jix el ebꞌ chi jowi oc yin Cristo cu xol,
man cꞌaltaꞌ caw ketbꞌi oj ebꞌ.
Kꞌinaloj ta caw ketbꞌi ebꞌ,
jix mi cꞌal ecꞌ ebꞌ ketoj.
Ilaꞌ tol jix el ebꞌ,
yet watxꞌ chi txeclo eloj tol man cꞌaltaꞌ ketbꞌi oj ebꞌ.
20 Jal jex jaex tiꞌ xin,
akꞌbꞌil Naj Santo Espíritu ey jex yu Cristo ketoj.
Yu jun tuꞌ,
yuxan kotaj cu masanil jun cuybꞌanil caw yel.
21 Cꞌam junoj jex man je yotaj oj jun yel tuꞌ.
Yuxan chin tzꞌibꞌetoj ey jex an.
Je yotaj xa pax oj,
tol cꞌam junoj lekꞌtiꞌal xol jun cuybꞌanil caw yel tuꞌ.
22 Chi waltoj je yabꞌe,
mactxequel chi akꞌon lekꞌtiꞌal.
Jaꞌ ebꞌ chi aloni,
tol jaꞌ Jesús man Cristo* oj,
chi yal yeloc apnoj tol man akꞌbꞌil oj yopiso Naj yu Dios.
Jaꞌ ebꞌ tuꞌ acꞌul yeoc ebꞌ yin Cristo cꞌal yin Dios,
yutol cꞌam chi yaoc scꞌul ebꞌ yin Scꞌaal Dios.
23 Yal cꞌal mac chi aloni,
tol jaꞌ Jesucristo man Scꞌaaloj Dios,
cꞌam chi oc Dios yin ebꞌ.
Jal pax ebꞌ chi alon xin,
tol Scꞌaal Dios Naj,
ey ton oc Dios yin ebꞌ.
24 Yu jun tuꞌ,
yuxan jaꞌ jun cuybꞌanile jix kabꞌ yet tax jix cu oc yetoj Dios,
sowalil asan jun tuꞌ chi kaoc yin cu cꞌul tobꞌalkꞌinal.
Ta queytuꞌ chi kute kaon oc yin cu cꞌul,
oj cu ey cꞌal ecꞌ yin cu Mam Dios,
cꞌal yin Scꞌaal.
25 Jaꞌ jun tiꞌ jix yakꞌ can stiꞌ Jesucristo ey jon,
tol oj yakꞌ cu kꞌinal tol ey cꞌal yin tobꞌalkꞌinal.
26 Tol chi waltoj je yabꞌ yu wan ebꞌ chi yoche chex etneni,
yuxan chin tzꞌibꞌetoj ey jex an.
27 Jaon tiꞌ xin,
jaꞌ Naj Jesucristo jix akꞌon can Naj Santo Espíritu ey jon junjun jon.
Yuxan,
man sowalil oj tol txꞌoj junoj ánima chi cu cuyoni,
yutol jaꞌ Naj Espíritu tuꞌ chi cu cuyon yin masanil tzetyetal.
Jaꞌ wan cuybꞌanile chi yakꞌ ey jon,
yel cꞌal eloj,
cꞌam junoj lekꞌtiꞌal eytoj xol.
Yuxan,
eyoj jonwej cꞌal ecꞌ yin Cristo,
yutol queytuꞌ yalon Naj Yespíritu tuꞌ ey jon.
28 Jaꞌ tinaniꞌ xin,
jaex jaxca tol wuninal je yeoc an,
sowalil ojabꞌ ey jon cꞌal ecꞌ yin Cristo tobꞌalkꞌinal,
yet watxꞌ cꞌam chi cu xiwa yet oj jul Naj.
Catuꞌ cꞌam chi cu qꞌuixwi a sattaj Naj yet oj jul Naj tuꞌ.
29 Kotajxa caw jichan ton Jesucristo.
Yu jun tuꞌ,
yuxan chi naꞌcha el ku,
tol yuninal jon xa Dios ta chi kun pax tzetyetal jichan.