Jaꞌ An Bꞌabꞌel Scarta Naj
JUAN
Skꞌaneal Naj Akꞌom Kꞌinale
1
Jaꞌ tinaniꞌ,
tol chi cu tzꞌibꞌetoj skꞌaneal Naj mac chi yij Skꞌane Akꞌom Kꞌinale.
Jaꞌ yet cꞌamto yul yibꞌankꞌinal tiꞌ,
eyxa cꞌaltaꞌ Naj.
Jaon tiꞌ jix kabꞌ skꞌanabꞌ Naj.
Jix kilon Naj yetoj cu sat.
Jix cu oc tꞌanan yin Naj,
jix cu oc pax mitxꞌan yin Naj yetoj cu kꞌabꞌ.
2 Jaꞌ Naj a kꞌinale tiꞌ,
jix xꞌoxa sbꞌa,
catuꞌ jix kilon yin Naj.
Yuxan chi kakꞌ cu bꞌa testigoal yin Naj.
Catuꞌ chi kalon je yabꞌe,
tol jaꞌ Naj chi akꞌon cu kꞌinal tol ey cꞌal yin tobꞌalkꞌinal.
Jaꞌ Naj tuꞌ,
ey cꞌaltaꞌ ecꞌ yetoj cu Mam Dios,
jix txꞌoxle pax el Naj ey jon.
3 Yuxan jaꞌ mac jix kil tuꞌ,
cꞌal mac jix kabꞌ skꞌanabꞌ tuꞌ,
jaꞌ chi kal ey jex,
yet watxꞌ junxane keoc yetoj cu Mam Dios.
Catuꞌ junxane pax keoc yetoj Jesucristo Scꞌaal Dios.
4 Yu wan tuꞌ yuxan chi cu tzꞌibꞌetoj wan tiꞌ ey jex,
yet watxꞌ chi cꞌal a can cu tzalacꞌulal.
Jaꞌ Dios Jaxca Sajkꞌinal Yei
5 Jaꞌ jun oj kaltoj je yabꞌ tinaniꞌ,
skꞌaneal Naj Jesucristo jix cu cuyuꞌ.
Chi kal ey jex,
tol jaꞌ Dios sajkꞌinal yei,
catuꞌ cꞌam niꞌoj kꞌejkꞌinal yin.
6 Ta chi kalaꞌ,
tol junxane keoc yetoj Dios,
ta chi cu ee pax ecꞌ xol kꞌejkꞌinal,
chi cu xijwi pax a kꞌane,
catuꞌ chi kakꞌon pax lekꞌtiꞌal yetoj cu bꞌeybꞌal tuꞌ.
7 Jaꞌ Dios sajkꞌinal yei.
Ta chi cu ee ecꞌ xol sajkꞌinal jaxca Dios chi ee ecꞌ xol sajkꞌinal,
junxane keoc yetoj ebꞌ kuẍtaj cꞌal ebꞌ kanabꞌ.
Catuꞌ jaꞌ ẍiqꞌuil Naj Jesucristo,
yuninal Dios,
jaꞌ chi joꞌon qꞌuey masanil cu penail.
8 Ta chi kalaꞌ tol cꞌam cu penail chi cu xija kibꞌan,
catuꞌ man yeloj chi kalaꞌ.
9 Ta chi kal cu bꞌa tet Dios yu cu penail,
chi sjoꞌqꞌuey masanil cu penail,
catuꞌ chi yiꞌon pax el masanil tzet man watxꞌoj Naj kin.
Yutol watxꞌ ton Naj,
catuꞌ chi yun cꞌal tzet chi yalaꞌ.
10 Ta chi kalaꞌ,
tol cꞌam cu penail,
ta chi kal jaxca tiꞌ,
chi kalaꞌ,
tol Dios lekꞌtiꞌ,
catuꞌ cꞌam chi kaoc cu cꞌul yin skꞌane Dios.