Sjulbꞌal Naj Kaawil
3
Jex jin camcꞌulnebꞌil,
yet xa scaabꞌ jun jin carta tiꞌ chi watoj ey jex an.
Tol jacꞌalaꞌ chin jej je naꞌ wan cuybꞌanile je yotaj xa,
yet watxꞌ chi waꞌxi oc je naꞌbꞌal sicꞌlebꞌil.
2 Yuxan,
sowalil che naꞌtej wan tzet tzꞌibꞌebꞌilcan yu ebꞌ ẍejabꞌ Dios yet peyxa,
ebꞌ ẍejabꞌ sicꞌbꞌil el yu.
Naꞌwejtej ẍejbꞌanil Naj Kaawil,
cu Colomal tuꞌ,
albꞌilxa can ey jex ku jaon ẍejabꞌ jon tiꞌ.
3 Jaꞌ junxa oj waltoj tiꞌ an,
caw chi woche che yotajne eloj.
Jaꞌ yet jun slawubꞌal tiempoal tiꞌ oj a waan ebꞌ comon cꞌal chi bꞌuchwa yin yet Dios.
Asan tzet man watxꞌoj chi yoche oc ebꞌ bꞌey chi yaoc snaꞌbꞌal.
4 Oj yal ebꞌ jaxca tiꞌ:
“Yakꞌnaj can stiꞌ Cristo tuꞌ,
tol oj juloj.
¿Bꞌeytuꞌ eyoc tinaniꞌ?
Miman oj tzꞌaj takꞌwinaj can ebꞌ kichmam,
camnajxa pax ebꞌ.
Ilaꞌla,
laan cꞌal yeoc masanil tzetyetal,
yet tax cꞌal jix waꞌxi yul yibꞌankꞌinal tiꞌ,
jacꞌalaꞌ cꞌal yeoc masanil tinaniꞌ,
jacꞌalaꞌ cꞌam mac chi jul pax oj,”
ẍi ebꞌ oj yalon ebꞌ.
5 Jaꞌ ebꞌ chi alon jaxca tuꞌ,
cꞌam chi yoche chi snaꞌtej ebꞌ tzet jix jul yul yibꞌankꞌinal tiꞌ yet peyxa tuꞌ.
Asan skꞌane Dios jix akꞌon waꞌxoj satcan,
cꞌal sat txꞌotxꞌ tiꞌ.
Catuꞌ jix txeclo a txꞌotxꞌ txꞌotxꞌ snan jaꞌ.
Yu jaꞌ jaꞌ tuꞌ,
yuxan watxꞌ yeoc sat txꞌotxꞌ tinaniꞌ.
6 Jaꞌ yet jix lawi jun tuꞌ,
catuꞌ jix lawi el masanil tzet ey yul yibꞌankꞌinal tiꞌ yu jaꞌ,
yutol masanil paxnaj ey yich jaꞌ.
Jaꞌton wan tiꞌ cꞌam chi yal scꞌul ebꞌ chi snaꞌtej.
7 Jaꞌ satcan yetoj sat txꞌotxꞌ tiꞌ,
ey cꞌal ton ecꞌ tinaniꞌ.
Yalnaj pax can Dios,
tol watxꞌ ojabꞌ tocꞌal ye bꞌel,
masantaꞌcꞌal oj bꞌejletej kꞌakꞌ yibꞌan.
Yet oj jul jun cꞌual oj naꞌle oc yin,
catuꞌ oj qꞌueycan el ebꞌ cꞌam niꞌoj yeloc apnoj Dios yul sat yin junelne.
8 Jex jin camcꞌulnebꞌil,
chi woche chi naꞌcha el je yu,
catuꞌ cꞌam chi too qꞌueycꞌulal je yu,
tol jaꞌ yul sat Naj Kaawil,
jaꞌ jun cꞌu,
laan jaxca yecꞌ junoj mil abꞌil.
Junoj mil abꞌil tuꞌ,
laan yecꞌ jaxca junoj cꞌual.
9 Ey ebꞌ chi naꞌoni,
tol lalan yecꞌ tiempo yu Naj Kaawil tuꞌ,
cꞌam chi yun jaxca jix yute yakꞌon can stiꞌ tuꞌ,
snaꞌon ebꞌ.
Man pax yeloj jaxca chi yute snaꞌon ebꞌ tuꞌ.
Cꞌamto chi jul Naj,
yutol lalantocꞌal yakꞌon mimancꞌulal kin bꞌey yul yibꞌankꞌinal tiꞌ.
Chi yoche cꞌam junoj mac oj qꞌueycan eloj.
Tol chi yoche chi snaꞌ sbꞌa ebꞌ masanil.
10 Jaxca yet chi jul junoj elkꞌom yet akꞌbꞌalil,
queytuꞌ oj yun sjul scꞌual yet oj jul Naj Kaawil tuꞌ.
Oj lawoj ey satcan yet jun cꞌual tuꞌ,
eyxa smey snilili yet oj ecꞌ eloj.
Jaꞌ masanil tzettaj yetal ey,
oj tzꞌaꞌtoj masanil yu jun miman kꞌakꞌ,
catuꞌ jaꞌ jun sat txꞌotxꞌ tiꞌ,
yetoj masanil tzettaj yetal ey sat oj qꞌueyle eloj.
11 Queytuꞌ oj yun slawoj masanil tzetyetal.
Yu jun tuꞌ,
yuxan sowalil tool chi kute cu bꞌeybꞌal.
Asan ojabꞌ yin Dios chi kaoc cu naꞌbꞌal.
12 Kechbꞌanewej sjul jun scꞌual Dios tuꞌ.
Kakꞌwej kip cu mulna yin yet Dios,
yet watxꞌ chi jul yin eymanil.
Jaꞌ yet jun cꞌual tuꞌ,
oj lawoj satcan yu kꞌakꞌ.
Catuꞌ oj ulitoj masanil tzet ey sat txꞌotxꞌ tiꞌ yu kꞌakꞌ tuꞌ.
13 Jal jon jaon tiꞌ,
lalan kechbꞌanen junxa acꞌ satcan,
cꞌal jun acꞌ yul yibꞌankꞌinal,
yutol jaxca tuꞌ yalon can Dios.
Jaꞌ ebꞌ oj eey tituꞌ,
watxꞌ xacꞌal snaꞌbꞌal ebꞌ.
14 Jex jin camcꞌulnebꞌil,
lalan kechbꞌanen sjul wan jix waltej tiꞌ.
Yuxan kakꞌwej kip,
yet watxꞌ cꞌam ojabꞌ niꞌoj cu penail cꞌal niꞌoj cu man tzꞌajanoj yul sat Naj yet jun cꞌual tuꞌ.
Ta tol jaxca tuꞌ ey watxꞌcꞌulal kin yetoj Naj.
15 Naꞌcha ojabꞌ el je yu,
tol ey smimancꞌulal Naj Kaawil,
yuxan cꞌamto chi jul Naj,
yet watxꞌ eyto mac oj colchaoj.
Ilaꞌ pax kuẍtaj Pablo,
camcꞌulnebꞌil ku,
queytuꞌ chi yute stzꞌibꞌen pax toj ey jex,
yutol queytuꞌ jix yun yakꞌle can sjelanil yu Dios.
16 Tzꞌibꞌebꞌil cꞌal can wan tiꞌ yul junjun scarta naj.
Ey bꞌey caw yaꞌtaj snaꞌcha eloj.
Jaꞌ mac cꞌamto snaꞌbꞌal,
man to tecꞌan oj yeoc yin screyenteal,
chi sqꞌuex cantoj skꞌaneal ebꞌ.
Jacꞌalaꞌ chi yun ebꞌ yin wanojxa skꞌane Dios tzꞌibꞌebꞌilcanoj.
Yu jun tuꞌ,
yuxan oj qꞌueycan el ebꞌ.
17 Jal jex jin camcꞌulnebꞌil,
yin eyojto jix je yabꞌen tzettaj yetal oj juloj.
Yuxan ilwej cꞌal je bꞌa tet ebꞌ cꞌam swatxꞌil snaꞌbꞌal jix waltoj tiꞌ,
yet watxꞌ cꞌam junoj jex chex somcha el yu wan pena scuybꞌanil tuꞌ.
Ta cꞌamaj,
caw oj etex el je naꞌbꞌal,
catuꞌ oj jex el yin je tecꞌanil.
18 Sowalil watxꞌ chi yun je yotajne el Naj Kaawil,
Naj cu Colomal Jesucristo.
Yetoj pax oj,
yel ojabꞌ cꞌal chex chꞌibꞌa yin swatxꞌcꞌulal junjun cꞌu.
Miman ojabꞌ yeloc apnoj Naj Kaawil tuꞌ tinaniꞌ,
cꞌal yin tobꞌalkꞌinal.
Amén.