Jaꞌ Ebꞌ Chi Akꞌon Lekꞌtiꞌal Cuybꞌanile
2
Jaꞌ ebꞌ wet Israelal peyxa,
ey ebꞌ jix tzꞌaj yaloc sbꞌa ẍejabꞌoj Dios.
Jacꞌalaꞌ pax cu xol ey ebꞌ oj yaloc sbꞌa cuywawomal,
catuꞌ oj yakꞌon cuyle lekꞌtiꞌal ebꞌ yin ewantajil wan txꞌoj cuybꞌanile cu xol,
yet watxꞌ ey jon,
oj cu etex el yu ebꞌ.
Caw cꞌam yeloc apnoj Naj Kaawil yul sat ebꞌ,
jaꞌ Naj jix cam pax yu stooloj spenail ebꞌ.
Yu jun tuꞌ,
yuxan yul yet,
eyman oj qꞌueycan el ebꞌ yin junelne.
2 Ecꞌal ebꞌ oj bꞌeybꞌalnen jun spena bꞌeybꞌal ebꞌ tuꞌ.
Yu cꞌal ton ebꞌ,
yuxan oj al-leoj tol cꞌam yeloc apnoj jun bꞌeybꞌale yel bꞌey ey jon oc tiꞌ.
3 Jaꞌ ebꞌ chi akꞌon lekꞌtiꞌal tuꞌ,
asan tumin chi yoche ebꞌ.
Yuxan watxꞌ xacꞌal oj yute yalon lekꞌtiꞌal kꞌane ebꞌ ey jex,
yutol chi yoche ebꞌ chi yakꞌ ganar tumin je yin.
Peyxa tax cꞌal jix naꞌle oc yin ebꞌ yu Dios.
Yuxan,
sowalil oj qꞌueycan el ebꞌ yin junelne.
Ma skeꞌ scolon sbꞌa ebꞌ tet jun syaꞌtajilal tuꞌ.
4 Cu naꞌwejtej tzet jix yun yeloc ebꞌ ángel ocnaj spenail tet Dios.
Tutun ma yakꞌ mimancꞌulal yin ebꞌ.
Jaꞌ tiꞌ yet ebꞌ,
tol jix kꞌojletoj ebꞌ bꞌey jun lugar chi yij infiernoa yu.
Cꞌanani jix yun ebꞌ yetoj cadena.
Preso yeoc ebꞌ xol kꞌejkꞌinal tinaniꞌ,
masantaꞌcꞌal oj naꞌle oc yin ebꞌ.
5 Yetoj pax oj,
ma yakꞌ Dios mimancꞌulal yin ebꞌ ánima yet peyxa.
Yanajtej jun miman yaax nabꞌ yibꞌan ebꞌ cꞌam swatxꞌil tuꞌ.
Asan naj Noé colchanaj can el yetoj jujwan yetbꞌi.
Jaꞌ naj Noé tuꞌ,
yalnaj el xol ánima tuꞌ,
tol watxꞌ ojabꞌ cꞌal chi yute snaꞌbꞌal ebꞌ.b
6 Yetoj pax oj,
yanajtej jun syaꞌtajilal Dios yibꞌan ebꞌ a Sodoma yetoj ebꞌ a Gomorra.
Lawinaj el masanil ebꞌ caabꞌ conobꞌ tiꞌ,
jix tzꞌaꞌtoj yu kꞌakꞌ.
Taan xacꞌal jix yun cantoj masanil.
Jaꞌ ebꞌ lawinaj el tuꞌ,
txꞌoxbꞌanile tet ebꞌ cꞌam yeloc apnoj Dios yul sat.
7 Asanne naj Lot colchanaj el xol ebꞌ,
yutol watxꞌ yeoc snaꞌbꞌal.
Jaꞌ yet cꞌamto chi lawi el ebꞌ tuꞌ,
ocnaj cuscꞌulal yin spixan naj yu ebꞌ.
8 Watxꞌ cꞌal sbꞌeybꞌal naj Lot tuꞌ,
junjun cꞌal cꞌu jix yiloni cꞌal yabꞌen wan tzet man watxꞌoj chi el yunen ebꞌ ánima tuꞌ.
Yuxan cuscꞌulal cꞌal yeoc naj yu ebꞌ.c
9 Jacꞌalaꞌ pax tinaniꞌ.
Yotaj Dios tzet chi yute scolon el ebꞌ eyoc snaꞌbꞌal yin,
yet chi akꞌle porobꞌal ebꞌ.
Yotaj pax tzet chi yute yaon cantoj ebꞌ man watxꞌoj snaꞌbꞌal bꞌey syaꞌilal.
Bꞌey chi too can ebꞌ masantaꞌcꞌal oj jul jun cꞌual yet oj naꞌle oc yin ebꞌ.
10 Ey ebꞌ caw chi yaoc yin scꞌul yunen wan tzet cꞌam swatxꞌil chi yoche oc yetoj smimanil.
Cꞌam niꞌoj yeloc apnoj Naj Kaawil yul sat ebꞌ,
yutol cꞌam chi yal scꞌul ebꞌ chi akꞌle cuenta yu.
Jaꞌton ebꞌ tiꞌ oj ale cantoj bꞌey syaꞌtajilal tuꞌ.
Cꞌamxa chi xiw ebꞌ yunen wan man watxꞌoj.
Comon cꞌal chi yun ebꞌ tzet chi yoche.
Tol tax cꞌam chi xiw sbꞌuchwa ebꞌ yin wan mactxequel caw miman yeloc apnoj bꞌey satcan.
11 Tol tax ebꞌ ángel,
yel ey miman yipal ebꞌ,
catuꞌ yel miman pax yeloc apnoj ebꞌ.
Cꞌam pax chi stecꞌbꞌa sbꞌa ebꞌ yalon a spenail yin wan ey yipal tuꞌ tet Naj Kaawil.
12 Jaxca junoj noꞌ noꞌ cꞌam snaꞌbꞌal,
queytuꞌ ebꞌ ánima tuꞌ,
yutol asan cꞌal tzet chi yoche oc smimanil ebꞌ chi el yuneni.
Yuxan jaxca junoj noꞌ,
asan cꞌal yopiso smitxꞌlei,
catuꞌ chi tejle camoj,
jaxca tuꞌ ebꞌ.
Tucꞌal comon cꞌal chi bꞌuchwa ebꞌ yin wan tzet man yotaj oj ebꞌ.
Oj qꞌueycan el ebꞌ,
yutol cꞌam swatxꞌil chi yute sbꞌa ebꞌ.
13 Jaxca chi yute yaon oc syaꞌilal ebꞌ yibꞌan wanojxa,
queytuꞌ oj yun yale pax oc syaꞌilal ebꞌ.
Caxcꞌal cꞌualil,
chi yaoc snaꞌbꞌal ebꞌ yunen tzet chi yoche ocoj,
yu yakꞌon tzalabꞌoj scꞌul ebꞌ yin.
Caw qꞌuixwiltaj yeecꞌ ebꞌ je xol,
pena je yili yul sat Dios yu cꞌal ebꞌ.
Yutol comon cꞌal chi low ebꞌ je yetoj,
yu yiꞌon eytej je sat ebꞌ.
Tucꞌal chi yakꞌ tzalabꞌoj scꞌul ebꞌ yin tzet chi yoche oc ebꞌ tuꞌ.
14 Txa xacꞌal yilon oc junoj ix ebꞌ,
catuꞌ chi yochen oc ebꞌ.
Caw cꞌam chi skeꞌ smitxꞌon oc tucan sbꞌa ebꞌ yunen amulal.
Chi akꞌle scꞌul ebꞌ cꞌamto stecꞌanil yu ebꞌ.
Qꞌueynajxa ebꞌ yin pekꞌal.
Yuxan caw chi eytej sjowal scꞌul Dios yibꞌan ebꞌ.
15 Jix sbꞌejcan watxꞌ bꞌeybꞌale ebꞌ,
catuꞌ jix qꞌuey cantoj ebꞌ.
Yuxan jaꞌ sbꞌeybꞌal naj Balaam yet peyxa,d
naj scꞌaal Bosor,
jaꞌ chi to sbꞌeybꞌalne ebꞌ.
Jaꞌ naj Balaam tuꞌ yu yakꞌon ganar tumin yin tzet man watxꞌoj jix yoche naj.
16 Jal noꞌ bꞌuru,
tol kotaj tol cꞌam cꞌaltaꞌ chi skeꞌ skꞌanabꞌi,
jaꞌ noꞌ jix tzuon yu spenail tuꞌ,
jix kꞌanabꞌ a noꞌ jaxca ánima.
Jaꞌ noꞌ jix tenon oc tucan naj yin yunen jun cꞌam snaꞌbꞌal tuꞌ.
Tol ẍejabꞌ Dios chi yute pax sbꞌa naj.
17 Jaꞌ ebꞌ akꞌom lekꞌtiꞌal cu xol tiꞌ,
jaxca junoj snukꞌ jaꞌ tannaj xa toj,
queytuꞌ ebꞌ.
Yetoj pax oj,
jaxca junoj asun tucꞌal chi ecꞌ jototoj yu kaꞌeꞌ,
queytuꞌ ebꞌ.
Oj tojcan ebꞌ bꞌey kꞌejkꞌinal yin junelne.
18 Tucꞌal chi yiꞌa can sbꞌa ebꞌ yalon tzet cꞌamxa cꞌal yeloc apnoj.
Ilaꞌ,
chi yal ebꞌ jaxca tiꞌ:
“Chi skeꞌ kunen tzet man watxꞌoj,
chi cꞌal skeꞌ kunen tzet chi koche oc yetoj cu mimanil tiꞌ,”
ẍi ebꞌ chi tzꞌaj yalon ebꞌ.
Queytuꞌ chi yute yakꞌon scꞌul ebꞌ lalanxa scolcha el xol tzet man watxꞌoj.
19 Chi yalon ebꞌ jaxca tiꞌ:
“Chi cꞌal skeꞌ kunen tzet chi koche yutol jajbꞌil jon,”
ẍi ebꞌ chi tzꞌaj yalon ebꞌ.
Jaꞌ ebꞌ tuꞌ,
man jajbꞌil oj ebꞌ,
yutol eyoc ebꞌ yakꞌomaloj servil tzet man watxꞌoj tuꞌ.
Yutol jaꞌ mac cꞌam chi skeꞌ yoc tucan yunen junoj tzetyetal,
chi yal yeloc apnoj,
tol chi oc yakꞌomaloj servil jun tzetyetal tuꞌ.
20 Jaꞌ yet jix kotajne el Naj Kaawil Jesucristo cu Colomal,
jaꞌ tax yet tuꞌ,
jix cu colcha el yul skꞌabꞌ wan tzet man watxꞌoj sat txꞌotxꞌ tiꞌ.
Ta chi kaoc cu bꞌa yul skꞌabꞌ wan tuꞌ junelxa,
ta chi cu can yalan yu,
yel xacꞌal cꞌam swatxꞌil ket yintaj yet yalantoj.
21 Jaꞌ ebꞌ jaxca tuꞌ chi yute sbꞌa,
ebꞌ cꞌamxa chi yaoc snaꞌbꞌal yin jun watxꞌ bꞌeybꞌale tiꞌ.
Yel watxꞌ mi yet ebꞌ xin,
ta ma yaoc snaꞌbꞌal ebꞌ yin sbꞌabꞌel yin tet tol jix el ebꞌ yin jun cu watxꞌ cuybꞌanil akꞌbꞌil xa tet ebꞌ junel.
22 Ey jun kꞌane caw yel,
chi yal jaxca tiꞌ:
“Jaꞌ sbꞌeybꞌal noꞌ txꞌiꞌ,
chi lawi xabꞌ noꞌ,
catuꞌ chi slekꞌon a xaaw noꞌ tuꞌ junelxa.
Yetoj pax noꞌ txitam,
chi lawi xꞌale el noꞌ,
eyman chi too noꞌ xol sokꞌom junelxa,
catuꞌ chi stzꞌilbꞌanen pax toj sbꞌa noꞌ.”
Jaxca ton noꞌ txꞌiꞌ tuꞌ ma noꞌ txitam tuꞌ,
queytuꞌ ebꞌ tiꞌ,
yutol chi too pax ebꞌ xol tzet man watxꞌoj junelxa.