Watxꞌ Ojabꞌ Chi Kute Kilontoj Kopiso Akꞌbꞌil Yu Dios
4
Tutun caw yabꞌnaj syaꞌil Cristo yetoj smimanil.
Yuxan,
cu naꞌwej xin,
tol jaꞌ yet chi kabꞌen syaꞌil,
jaon tiꞌ,
cꞌamxa chi cu ijbꞌale yin spenail.
2 Yu jun tuꞌ xin,
yuxan jaxca ojabꞌ tuꞌ chi kute cu bꞌa,
yet watxꞌ jaꞌ ojabꞌ tzet chi ẍaꞌ scꞌul Dios chi kunne,
yajbꞌan tol ey jon to ecꞌ bꞌey yul yibꞌankꞌinal tiꞌ.
Manche xa kun jaxca chi yoche cu mimanil tiꞌ.
3 Jaꞌ yet yalantoj,
miman tiempo jix je yun wan tzet bꞌey eyoc snaꞌbꞌal ebꞌ man otajnenoj Dios.
Jal tinaniꞌ,
cam ojabꞌ che yun wan tuꞌ.
Yutol jaꞌ yet jun tiempoal tuꞌ,
asan cꞌal amulal chi el je yuneni,
asan cꞌal tzet man watxꞌoj che yoche ocoj.
Caw uqꞌuem jex an,
caw pekꞌ jex,
caw miman an je yucꞌnaj eytoj.
Yetoj pax oj,
je yakꞌnaj servil wan tzet chi al-le oc diosal,
manxa jantaj oj spenail jix el je yuneni.
4 Jaꞌ ebꞌ man otajnenoj Dios,
chi qꞌueya scꞌul ebꞌ tinaniꞌ,
yutol cꞌamxa chi cu waꞌne wan tzet caw cꞌam swatxꞌil tuꞌ yetoj ebꞌ.
Yuxan chi bꞌuchwa ebꞌ kin.
5 Yuxan sowalil oj yakꞌ scuenta ebꞌ tet Dios,
Naj tol watxꞌ xa yeoc yu chi snaꞌoc yin masanil ánima,
ebꞌ iquis,
cꞌal ebꞌ camnaj.
6 Yu ton tuꞌ,
yuxan jix al-le el skꞌaneal yet colbꞌanile tet ebꞌ camnajxa.
Yuxan,
caxcꞌal xax cam smimanil ebꞌ yet jix naꞌle oc yin ebꞌ yu Dios,
jaxca cꞌaltaꞌ chi yun masanil ánima,
jal spixan ebꞌ,
chi skeꞌ ẍaꞌon skꞌinal,
jaxca skꞌinal Dios.
7 Jaꞌ tinaniꞌ,
janicꞌxane catuꞌ chi jul stiempoal slawubꞌal masanil tzetyetal.
Yuxan watxꞌ ojabꞌ che yute je bꞌa tinaniꞌ.
Tecꞌan cꞌal che yute je naꞌbꞌal je txali.
8 Catuꞌ ey junxa oj waltoj ey jex tiꞌ an,
yelcꞌulal tol che bꞌeybꞌalne.
Tol che camcꞌulnele je bꞌa yin masanil je cꞌul.
Caxcꞌal caw miman spenail junoj mactxequel ey jon,
ta tol ey cu camcꞌulal,
oj kakꞌ mimancꞌulal yin.
9 Akꞌwej sposada ebꞌ kuẍtaj,
ebꞌ kanabꞌ,
manche je yal pax can skꞌumal ebꞌ yintaj.
10 Akꞌlewej servil je bꞌa junjun jex,
jatacꞌalaꞌ tzet opisoal jix akꞌle ey jex yu Dios.
Watxꞌ chi kute cu kꞌanbꞌalnen kopiso jix yakꞌ Dios tuꞌ ey jon junjun jon yu swatxꞌcꞌulal.
11 Ta tol ey jex chi skeꞌ je kꞌanabꞌ eloj,
jaꞌ ojabꞌ skꞌane Dios che yaleloj.
Ta tol ey jex chi skeꞌ je yakꞌwi servil,
akꞌwej servil yetoj je yip chi yakꞌ Dios.
Watxꞌ cꞌal che yute je waꞌnen masanil tzetyetal,
yet watxꞌ chi al-le watxꞌ kꞌane tet Dios yu Naj Jesucristo.
Yutol caw miman yeloc apnoj Naj,
miman yipal Naj yin tobꞌalkꞌinal.
Amén.
Syaꞌilal Chi Kilaꞌ Yu Creyente Jon Xa
12 Jex jin camcꞌulnebꞌil,
jaꞌ yet chi cu akꞌle porobꞌal yu wan syaꞌilal caw yaꞌ yoqui,
cꞌam chi skeꞌ sqꞌueya cu cꞌul yu.
Cꞌam chi cu naꞌ tol cꞌam cꞌaltaꞌ bꞌey chi jul wan tuꞌ.
13 Tzalajonwej cꞌal,
yutol jun laan xa kabꞌen syaꞌil yetoj Cristo.
Yuxan jaxa yet oj kilon sjul Naj xol stzejejial,
tol oj a can cu tzalacꞌulal.
14 Ta tol ey ebꞌ chi cu bꞌuchoni,
yutol eyoc cu naꞌbꞌal yin Cristo,
caw tzalacꞌulal ket.
Yutol jaꞌ Naj Yespíritu Dios,
Naj miman yeloc apnoj,
caan ecꞌ kin.
Jaꞌ ebꞌ tuꞌ,
pena chi yal ebꞌ yin Naj.
Jal jon jaon tiꞌ xin,
miman yeloc apnoj Naj yul cu sat.
15 Ta ey junoj jex che yil syaꞌil,
man ojabꞌ yu oj makꞌo cam ánima,
man ojabꞌ yu oj elkꞌan,
man ojabꞌ yu oj je yunen wan tzet ey sleyal yu ebꞌ yaaw,
man ojabꞌ yu oj comon cꞌal che yaoc je bꞌa yin junoj tzetyetal bꞌey cꞌam je yalon je yet.
Ta yu je yunen wan tiꞌ xin,
catuꞌ che yilon syaꞌil,
caw che yakꞌ je qꞌuixwiloj,
chi yal tuꞌ.
16 Ta jaex yu cꞌal yet jex xa Cristo xin,
catuꞌ che yilon syaꞌilal,
manche jex qꞌuixwi.
Alwej watxꞌ kꞌane tet Dios,
yutol yet jex xa Cristo.
17 Tuxa oj jul stiempoal chi naꞌle oc yin masanil ánima.
Jaꞌ jaon yuninal jon xa Dios tiꞌ,
oj naꞌle oc kin yin sbꞌabꞌelal.
Ta tol oj bꞌabꞌoj naꞌle oc kin,
jaon tiꞌ,
¿tzet utbꞌil oj eloc ebꞌ ma ẍaꞌ yabꞌ skꞌaneal yet colbꞌanile yet Dios?
18 Jaxca chi yal yul An Juun Tzꞌibꞌebꞌilcanoj:
“Jaꞌ jaon watxꞌ xa cu naꞌbꞌal tiꞌ,
ian man oj cu colchaoj.
Ta queytuꞌ oj yun cu colcha el jaon tiꞌ,
¿jajxa tam wal ebꞌ cꞌam yeloc apnoj Dios yul sat,
cꞌal ebꞌ penawom?”
ẍi yul An Juun tuꞌ.a
19 Yuxan,
jaꞌ yet chi jul jun syaꞌtajil kibꞌan,
jaxca chi yoche scꞌul Dios,
sowalil jacꞌalaꞌ watxꞌ ojabꞌ cꞌal chi kute cu bꞌeybꞌal.
Chi kaon oc cu bꞌa yul skꞌabꞌ Naj mac jix cu waꞌneni,
yutol jaꞌ Naj tuꞌ,
chi cꞌal yun tzet chi yal Naj.