Wan Cuybꞌanile Chi Akꞌle Tet Junjun Creyente
5
Jaꞌ tinaniꞌ xin,
tol chi waltoj wan chejbꞌanile tiꞌ ey jex,
jex anciano bꞌey junjun conobꞌ,
chi skeꞌ walontoj wan tiꞌ ey jex,
yutol jain tiꞌ,
anciano jin pax je yetoj.
Catuꞌ caw jix wil yabꞌen syaꞌil Naj Cristo.
Catuꞌ ey pax walon wet jin chaꞌon swatxꞌil je yetoj,
jun tol to oj txeclo eloj.
2 Jaxca junoj ilom meꞌ,
quey ojabꞌ tuꞌ che yute je yiloni,
ma je teynen ebꞌ jix akꞌle je cuentane,
yutol jaxca tol smeꞌ Dios yeoc ebꞌ yul je kꞌabꞌ.
Man ojabꞌ yu oj sowalil che yunne,
ma man ojabꞌ yu oj je yochen oc tumin,
yuxan chex mulna yin je yopiso tuꞌ,
tol yu ojabꞌ je yochwan je mulnai,
yutol jaxca tuꞌ chi yoche Dios.
Mulnajonwej yin tzalacꞌulal.
3 Ma skeꞌ tol yaaw oj je yute je bꞌa yibꞌan ebꞌ chi akꞌle je yakꞌ cuentane tuꞌ.
Tol ojabꞌ che txꞌox junoj je watxꞌ bꞌeybꞌal yil ebꞌ,
yet watxꞌ chi sbꞌeybꞌalne pax ebꞌ.
4 Ta queytuꞌ chi el je yunen jaxca chi wal tiꞌ an,
jaꞌ yet oj jul Naj Yaaw ilwawom,
oj je chaꞌ spaj,
tol miman swatxꞌil.
Jaꞌ spaj tuꞌ,
cꞌam bꞌakꞌin oj lawoj.
5 Jaꞌ jaex jex achꞌe,
cꞌal jex kꞌopo,
jijem ojabꞌ cꞌal che yute je bꞌa tet ebꞌ anciano.
Je masanil xin,
yin yeynajil ojabꞌ che yute je bꞌa ey jex junjun jex.
Yutol chi yal yul An Juun jaxca tiꞌ:
Jaꞌ Dios chi oc acꞌulal yin ebꞌ chi smimanbꞌane sbꞌa yet chi eqꞌui.
Jal tet ebꞌ yeynajil chi yute sbꞌa chi ecꞌ xin,
jaꞌ swatxꞌcꞌulal chi xꞌox tet ebꞌ,
ẍi.a
6 Yuxan,
yeynajil che yute je bꞌa yul skꞌabꞌ Dios,
yutol caw miman yipal Naj,
yet watxꞌ oj jex mimanbꞌinele yu Naj,
yet oj jul stiempoal.
7 Kawejtoj masanil cu bꞌiscꞌulal yul skꞌabꞌ Naj,
yutol jaꞌ Naj eyoc cu yiloni.
8 Caw listo che yute je naꞌbꞌal,
majwanwej.
Yutol jaxca junoj noꞌ bꞌalam chi el yaw,
catuꞌ chi ecꞌ seyon ẍiꞌbꞌe,
jaxca tuꞌ yecꞌ naj acꞌul kin,
tol jaꞌton diablo.
9 Caw tecꞌan che yute je bꞌa tet.
Tecꞌan che yute je yaon oc je cꞌul yin Dios.
Yutol je yotaj xa,
jaꞌ ebꞌ kuẍtaj cꞌal ebꞌ kanabꞌ yul-laj masanil yul yibꞌankꞌinal tiꞌ,
lalan yabꞌen pax syaꞌil ebꞌ jaxca jex tiꞌ.
10 Jaꞌ yet oj lawoj kabꞌen syaꞌil janicꞌ tiempoal tiꞌ,
catuꞌ oj cu tzꞌajtzenele oc yu Dios tuꞌ,
oj yakꞌon cu tecꞌanil cꞌal kip.
Oj cu yambꞌale oc yet tuꞌ.
Yutol miman swatxꞌcꞌulal chi xꞌox ey jon.
Ilaꞌ tol jaꞌ jix cu awten oc yetoj,
yet watxꞌ,
jaꞌcaw swatxꞌil oj yakꞌ ey jon yin junelne,
yutol junxane keoc yetoj Jesucristo.
11 Jaꞌ cu Mam Dios tuꞌ,
caw miman yeloc apnoj Naj,
miman yopiso Naj yin tobꞌalkꞌinal.
Amén.
Chi Aletoj Scawil Scꞌul Ebꞌ
12 Jaꞌ kuẍtaj Silvanob tiꞌ,
wotajxa snaꞌbꞌal,
caw jijem naj.
Jaꞌ naj oj iꞌontoj jun jin carta tiꞌ ey jex an.
Jaꞌ jayebꞌ kꞌane jix waltoj tiꞌ,
oj iptzen je naꞌbꞌal.
Jaꞌton jaꞌcaw swatxꞌcꞌulal Dios jun chi wal skꞌaneal tiꞌ.
Tecꞌan cꞌal che yute je bꞌa yin.
13 Jaꞌ ebꞌ kuẍtaj cꞌal ebꞌ kanabꞌ a conobꞌ chi yij Babilonia tiꞌ,
sicꞌbꞌil pax el ebꞌ.
Tol chi yatoj scawil je cꞌul ebꞌ.
Chi ya pax toj scawil je cꞌul naj Marcos.
Jaꞌton naj jaxca jin cꞌaal yeocoj.
14 Jaꞌ yet che yil-len je bꞌa,
che yakꞌle scawil je cꞌul yu je txꞌoxon eloj,
tol che camcꞌulne je bꞌa.c
Je masanil,
jex tol yet jex xa Jesucristo,
chi woche tol ey watxꞌcꞌulal snan je xol yu Dios.