Scuybꞌanil Ebꞌ Yetbꞌixa Sbꞌa
3
Jex istile,
jijem che yute je bꞌa tet je yichamil.
Yutol ey jex cꞌamto chi yaoc scꞌul je yichamil yin skꞌane Dios.
Caxcꞌal cꞌam tzet oj je yal tet je yichamil tuꞌ,
yu cꞌal tol watxꞌ je bꞌeybꞌal queytuꞌ oj yun yoc ebꞌ je yu.
2 Yutol oj yil ebꞌ,
tol caw jichan je bꞌeybꞌal,
catuꞌ tol caw chex xiw tet Dios.
3 Ey ojabꞌ je sakꞌalil,
manaj pax je waꞌnen je yili chi wal an.
Man ojabꞌ eyxa smey oj che yute je xion xil je yaꞌ.
Manche je yaoc je naꞌbꞌal yin chꞌen oro che kꞌanbꞌalne,
cꞌal pax yin pichile eyxa smey stool.
Yutol manaj yetoj wan tuꞌ oj jex waꞌxoj ocoj.
4 Tol jaꞌ ojabꞌ je naꞌbꞌal che camcꞌulne je waꞌne ocoj,
yet watxꞌ,
watxꞌ je yili yul sat Dios.
Jaꞌ swatxꞌil je naꞌbꞌal tuꞌ,
cꞌam bꞌakꞌin oj etextoj.
Ta tol ey je watxꞌcꞌulal yin ánima,
ta numomi jex,
jaꞌton wan tuꞌ caw watxꞌ yili yul sat Dios,
catuꞌ caw miman yeloc apnoj yul sat.
5 Jaꞌ yet peyxa,
ey wan ebꞌ ix ix tol yet xa Dios yei.
Watxꞌ yili snaꞌbꞌal ebꞌ ix yul sat Dios,
yutol asan Dios tuꞌ yanaj oc ebꞌ ix yipoj scꞌul.
Catuꞌ jijem cꞌal jix yute cꞌal sbꞌa ebꞌ ix tet yichamil.
6 Ilaꞌ,
ix Sara,
jijem cꞌal jix yute sbꞌa ix tet naj Abraham:
“Jaach Waawil,”
ẍi ix tet naj.a
Jex istile,
watxꞌ ojabꞌ cꞌal che yute je naꞌbꞌal xin,
cꞌam ojabꞌ junoj tzet bꞌey chex xiw niꞌoj.
Ta jaxca tuꞌ,
laan je naꞌbꞌal jaxca ix Sara tuꞌ,
chi yal tuꞌ.
7 Jacꞌalaꞌ pax jaex jex ichamile jex tiꞌ,
watxꞌ che yute je cꞌul yin je yistil.
Otajnewej eloj,
tol laan ebꞌ ix jaxca junoj vaso cꞌuun spoꞌoi.
Ey ojabꞌ yeloc apnoj ebꞌ ix yul je sat,
yutol ey yalon yet pax ebꞌ ix je yetoj yin kꞌinale jix yakꞌ Dios ey jon yu swatxꞌcꞌulal.
Queytuꞌ che yute je cꞌul yin ebꞌ ix,
yet watxꞌ cꞌam niꞌoj tzet chi tenon oc tucan je txa yetoj ebꞌ ix.
Ey Bꞌey Chi Kil Syaꞌilal Yu Cꞌal Cu Watxꞌ Bꞌeybꞌal
8 Yetoj pax oj,
chi waltoj junxa tiꞌ ey jex an,
jun laan ojabꞌ che yute je naꞌbꞌal je masanil.
Ta tol ey ebꞌ chi cusi,
colwaanwej yin ebꞌ.
Che camcꞌulnelewej je bꞌa,
yutol je yuẍtaj je bꞌa,
je yanabꞌ je bꞌa.
Okꞌ ojabꞌ je cꞌul je yin junjun jex.
Yeynajil ánima cꞌal che yute je bꞌa junjun jex.
9 Ta ey ebꞌ pena chi yute sbꞌa ey jex,
man ojabꞌ pena oj che yute pax je bꞌa tet ebꞌ,
jaex tiꞌ.
Ta tol ey ebꞌ chex bꞌuchoni,
manche jex bꞌuchwa yin ebꞌ.
Jaꞌ tiꞌ je yet,
tol che kꞌan swatxꞌcꞌulal Dios yibꞌan ebꞌ.
Yutol yawtenaj jon oc Dios yu koc can yetoj,
yu xꞌoxon swatxꞌcꞌulal ey jon.
10 Yutol jaxca tiꞌ yalon yul An Juun tiꞌ:
Ta tol jaex che camcꞌulne je kꞌinal,
ta che yoche tzalacꞌulal cꞌal chi ecꞌ junjun cꞌu je yu,
sowalil che yakꞌ cuenta je tiꞌ,
yet watxꞌ cꞌam ojabꞌ junoj tzet man watxꞌoj che yalaꞌ,
catuꞌ cꞌam ojabꞌ junoj lekꞌtiꞌal.
11 Sowalil che yiꞌel je bꞌa xol tzet man watxꞌoj,
caw watxꞌ che yute je bꞌa.
Sowalil jaꞌ watxꞌcꞌulal yin ánima che seyaꞌ,
catuꞌ che bꞌeybꞌalnewej watxꞌcꞌulal.
12 Yutol jaꞌ Naj Kaawil,
chi teynen cꞌal ebꞌ watxꞌ cꞌal chi yute sbꞌa,
catuꞌ chi abꞌle cꞌal xa ebꞌ yu Naj.
Jal pax ebꞌ cꞌam swatxꞌil chi yute sbꞌa xin,
jow chi yute eytej sat Naj yin ebꞌ,
ẍi yul An Juun tuꞌ.b
13 Ta asan watxꞌ bꞌeybꞌale chi kakꞌ kip cu bꞌeybꞌalne,
¿mac pax junoj oj akꞌon spenail ey jon xin?
14 Ta chi kabꞌ pax syaꞌil,
yu cꞌal cu watxꞌ bꞌeybꞌal,
caw watxꞌ ket.
Yuxan,
manche jex xiw tet junoj mactxequel.
Manche je yakꞌ somcha el je naꞌbꞌal.
15 Iꞌwej a can Cristo yin eyilal je Yaawiloj.
Naꞌwej tol caw miman yeloc apnoj Naj.
Listo ojabꞌ cꞌal che yute je bꞌa je yalon yabꞌ mactxequel chi skꞌanle yabꞌ ey jex,
tzet yuxan che yaoc Cristo yipoj je cꞌul.
Yin watxꞌcꞌulalil cꞌal che yute je yalon tet ebꞌ.
Yin cꞌuununi kꞌaneal che yute je yalon tet ebꞌ.
16 Ey ebꞌ chex bꞌuchon yu je watxꞌ bꞌeybꞌal,
yutol eyoc je naꞌbꞌal yin Cristo.
Yuxan caw che yakꞌ cuenta je bꞌa yetoj je naꞌbꞌal,
yet watxꞌ jaꞌ yet chex sbꞌuchon ebꞌ tuꞌ,
oj qꞌuixwoj a ebꞌ yu je watxꞌ bꞌeybꞌal tuꞌ.
17 Yel watxꞌ chi kabꞌ syaꞌil yu cu watxꞌ bꞌeybꞌal,
ta tol jaxca tuꞌ chi el yin scꞌul Dios.
Jal ta yu cu pena bꞌeybꞌal xin,
catuꞌ chi kabꞌen syaꞌil,
naꞌbꞌacꞌal.
18 Yutol jix yabꞌ syaꞌil Naj Cristo yet jix cami.
Asan junel jix cam Naj yu cu penail.
Jaꞌ Cristo tuꞌ,
caw watxꞌ ton Naj.
Jaon tiꞌ xin,
caxcꞌal man watxꞌoj jon,
jix yabꞌ cꞌal syaꞌil Naj cu yaꞌiloj,
yu cu yiꞌontoj Naj bꞌey Dios.
Jaꞌ smimanil jix cami,
jaxa yet jix pitzcꞌu aoj,
jix pitzcꞌu a yin Espíritu.
19 Jaꞌ Yespíritu tuꞌ,
bꞌetnaj ecꞌ yalel skꞌane Dios tet spixan ebꞌ preso xa yei.
20 Jaꞌ ebꞌ tuꞌ,
man jijemoj yutenaj sbꞌa ebꞌ tet Dios yet yalantoj,
yul stiempoal naj Noé.
Jaꞌ yet jun tiempoal tuꞌ,
miman cꞌal jix yute scꞌul Dios yin ebꞌ,
yet jix yechbꞌanen swaꞌxi jun teꞌ miman arca.
Jaꞌ yul jun teꞌ arca tuꞌ jix colcha can el jaywan ánima bꞌey jaꞌ jaꞌ.
Waxajwan ebꞌ jix colcha can eloj.c
21 Jaꞌ jun tzet yunnaj tuꞌ,
cu cuybꞌanil yeocoj.
Yutol jaꞌ yu jaꞌ jaꞌ yet bautismo chi cu colcha tinaniꞌ.
Jaꞌ jun bautismo tiꞌ,
man yopiso oj yiꞌon el stzꞌilal cu mimanil.
Yu jun tuꞌ chi cu kꞌan tet Dios,
tol chi swaꞌne oc cu naꞌbꞌal.
Chi cu colchai,
yutol jix pitzcꞌu a Jesucristo.
22 Jix paxa Naj bꞌey satcan.
Jatuꞌ eyecꞌ Naj bꞌey swatxꞌ kꞌabꞌ Dios tinaniꞌ.
Jaꞌ chi oc Yaawil ebꞌ ángel,
yetoj wanxa ey yopiso,
ey yipalil.