Jaꞌ Tzet Chi Kalaꞌ
3
Jex wuẍtaj,
jex wanabꞌ,
man ojabꞌ ecꞌaloj jex che yaoc je bꞌa cuywawomal,
yutol je yotaj,
tol jaon cuywam jon tiꞌ,
oj cam snaꞌle oc kin yu Dios.
2 Yutol cu masanil,
caw kocꞌtaj cꞌal chi oc cu penail.
Ta tol cꞌam bꞌey chi cu eyqꞌuey yin tzet chi kalaꞌ,
watxꞌ ton sattaj Dios,
chi yal tuꞌ,
catuꞌ chi skeꞌ chi oc tucan masanil cu mimanil.
3 Jaꞌ yet chi kaon oc sfreno junoj noꞌ che,
yu cꞌal ton chꞌen freno tuꞌ,
yuxan jijem cꞌal noꞌ bꞌey chi kiꞌ bꞌeyoj.
4 Kꞌinaloj tol ey junoj teꞌ barco caw miman,
catuꞌ chi low tinna kaꞌeꞌ yin teꞌ,
asanne yu jun yaliẍ slecꞌbꞌanil tuꞌ yuxan yal cꞌal bꞌey chi skeꞌ yiꞌle bꞌey yu naj chi lekꞌon tuꞌ.
5 Jaxca ton tuꞌ yeoc jun kakꞌ tiꞌ.
Yaliẍ chꞌan,
caw tol chi smeyne pax sbꞌa yin tzet miman chi skeꞌ yuneni.
Kꞌinaloj ey junoj bꞌey chi el tzitna kꞌakꞌ yin chi oc can xol junoj miman eltzabꞌ,
manxa jantajoj teꞌ chi tzꞌaꞌtoj yu.
6 Queytuꞌ yeoc jun kakꞌ tiꞌ,
laan yetoj kꞌakꞌ.
Masanil spenail bꞌey yul yibꞌankꞌinal tiꞌ chi skeꞌ yu.
Yetbꞌi sbꞌa cu mimanil yeoc jun kakꞌ tiꞌ.
Jaꞌ pax kakꞌ tiꞌ chi iꞌontoj masanil cu mimanil yin spenail.
Jaꞌ jun kakꞌ tiꞌ chi iꞌontej cuscꞌulal kibꞌan yin tobꞌalkꞌinal.
Jaꞌ bꞌey infierno chi tit masanil spenail chi yal kakꞌ tiꞌ.
7 Jaꞌ junjun tujan noꞌ noꞌ,
noꞌ tzꞌiquin,
noꞌ labꞌa,
cꞌal noꞌ snoꞌal jaꞌ mar,
chi cꞌal ton skeꞌ sucbꞌanele noꞌ.
Jix tzaji sucbꞌanele noꞌ tuꞌ yu ebꞌ ánima.
8 Jal pax jaon ánima jon tiꞌ,
cꞌam junoj jon chi skeꞌ cu sucbꞌanele yetoj jun kakꞌ tiꞌ.
Caw pena jun kakꞌ tiꞌ,
cꞌam mactxequel chi tzaji smitxꞌon eyoj.
Laan jaxca noꞌ labꞌa ey svenenoal,
tol chi cam ebꞌ ánima yu.
9 Jaꞌ yetoj kakꞌ tiꞌ chi kal watxꞌ kꞌane tet Dios Mame,
jacꞌal pax oc yetoj kakꞌ tiꞌ chi iꞌontej sjowal scꞌul Dios yibꞌan ebꞌ ket animail,
tol waꞌnebꞌil yu Dios jaxca yeoc Dios tuꞌ.
10 Jacꞌal oc kakꞌ tiꞌ chi kakꞌbꞌalne yin kalon watxꞌ kꞌane tet Dios,
jacꞌal oc chi kakꞌbꞌalne pax yin pena kꞌane.
Jex wuẍtaj,
jex wanabꞌ,
man smoo oj tol chi kun jaxca tiꞌ.
11 ¿Jacꞌal mi oc bꞌey junoj snukꞌ jaꞌ chi aol jaꞌ watxꞌ,
cꞌal jaꞌ cꞌachiꞌ?
12 Yetoj pax oj,
kꞌinaloj ta ey junoj bꞌocꞌan teꞌ lima,
ma skeꞌ tol sat on xa oj yakꞌ teꞌ.
Ma junoj bꞌocꞌan tzoyol xin,
ma skeꞌ tol sat lima xa oj yakꞌa.a
Catuꞌ ta ey pax junoj snukꞌ jaꞌ cꞌachiꞌ,
ma skeꞌ ya pax tej jaꞌ watxꞌ jaꞌ tituꞌ.
Jun Jelanil Chi Tit Bꞌey Dios
13 Ta ey junoj jex jelan jex,
chi naꞌcha el junoj tzetyetal je yu,
sowalil tol watxꞌ che yute je bꞌeybꞌal xin.
Che txꞌoxel je jelanil tuꞌ yin je yunen masanil tzetyetal yin je yeynajilal sattaj Dios.
14 Ta tol tucꞌal chi tit je jowal xin,
catuꞌ asanne cꞌal je yet che yoche che yalaꞌ,
che yoche tol asan jex che yalaꞌ,
manche je meyne je bꞌa yin jun je jelanil tuꞌ xin.
Ta che meyne je bꞌa xin,
lalan je yakꞌon lekꞌtiꞌal,
yutol man lalan oj je jijen jun cuybꞌanil caw yel.
15 Ta tol queytuꞌ che yute je bꞌa,
manaj bꞌey Dios chi tit jun je jelanil tuꞌ xin,
tol yet sat txꞌotxꞌ tiꞌ,
yet ebꞌ comon ánima.
Jaꞌ jun je jelanil tuꞌ,
yet diablo,
chi yal tuꞌ.
16 Yutol jaꞌ ebꞌ tol jaxa cꞌal yet chi yoche chi yalaꞌ,
catuꞌ chi yocheni tol jaxa cꞌal chi akꞌon mandar,
jaꞌton tituꞌ chi jul somcꞌulal yu ebꞌ xin,
catuꞌ ecꞌal wanxa spenail chi juli.
17 Jal pax jun jelanil chi tit bꞌey Dios xin,
man quey oj tuꞌ yoqui.
Ta tol eyoc jun jelanil tuꞌ kin,
watxꞌ jon cꞌal yul sat Dios,
ey xacꞌal watxꞌcꞌulal yin ket animail.
Watxꞌ ánima jon.
Jijem jon yin yal cꞌal tzet chi kunne.
Chi okꞌ cu cꞌul yin ebꞌ ket animail.
Watxꞌ cꞌal chi kute cu cꞌul yin ebꞌ.
Cꞌam chi kute caabꞌcꞌulal yin ebꞌ.
Cꞌam chi kute caabꞌ satil yin ebꞌ.
18 Ta asan yin watxꞌcꞌulal chi cu eqꞌui,
oj cu chaꞌ spaj cu watxꞌ bꞌeybꞌal tuꞌ,
jaꞌton yet chi cu oc can yin watxꞌcꞌulal cꞌal yin jichan kꞌinale.