Jun Laan Cꞌal Chi Kute Cu Cꞌul Tet Masanil Ánima
2
Jex wuẍtaj,
jex wanabꞌ,
ta tol caw yel chi kaoc Naj Kaawil Jesucristo yin cu cꞌul,
Naj tol miman yeloc apnoj,
sowalil laan ojabꞌ cꞌal chi kute cu cꞌul tet masanil ánima.
2 Kꞌinaloj tinaniꞌ,
ey junoj bꞌeom chi apni bꞌey chi cu yambꞌa cu bꞌa,
eyoc oro colkꞌabꞌe yin skꞌabꞌ,
cꞌal pichile eyxa smey stool eyoc yu.
Catuꞌ chi oc pax apnoj junoj mebꞌa,
tol yeynajil pichile chꞌan eyoc yu.
3 Kꞌinaloj tol asanne yetoj jun eyoc pichile eyxa smey stool tuꞌ yu chi cu tzala yetoj,
catuꞌ chi kalon tet:
“Eyan chotan bꞌey caw watxꞌ tiꞌ jaach tiꞌ,”
ta cu chi tet,
catuꞌ chi kalon tet jun mebꞌa tuꞌ jaxca tiꞌ:
“Watxꞌ ja weoc linan tituꞌ,
jaach tiꞌ,
ta cꞌamaj xin,
eyan chotan bꞌey wajantaj tiꞌ an,”
ta cu chi tet.
4 Ta tol queytuꞌ chi kute jaxca tuꞌ,
chi yal yeloc apnoj,
tol ey mactxequel ey yeloc apnoj yul cu sat,
catuꞌ ey mactxequel tol cꞌam yeloc apnoj yul cu sat.
Lalan cu naꞌon oc yin man watxꞌoj yu tzet chi koche oc yin ebꞌ,
chi yal tuꞌ.
5 Jex wuẍtaj,
jex wanabꞌ,
abꞌwej:
Jaꞌ ebꞌ mebꞌa yul sat ebꞌ ey bꞌey yul yibꞌankꞌinal tiꞌ,
jaꞌton ebꞌ chi sicꞌle can el yu Dios,
yet watxꞌ chi yaoc scꞌul ebꞌ yin Naj.
Jaxca ton tuꞌ jix yun sbꞌeomnele can ebꞌ yu Dios,
yutol oj yiꞌcan ebꞌ sattaj bꞌey eyoc Naj yin Yaawilal,
jun tol jix yalcantej,
tol oj yakꞌ tet ebꞌ chi camcꞌulneni.
6 Jal pax jex tol cꞌam yeloc apnoj ebꞌ mebꞌa yul je sat,
naꞌwej,
¿mactxequel ebꞌ chi cu etneni,
catuꞌ chi cu yiꞌontoj sattaj yaaw?
Jaꞌton ebꞌ bꞌeom.
7 Jaꞌton ebꞌ tuꞌ chi bꞌuchon sbꞌi Cristo bꞌey ey jon xa oc tiꞌ,
tol caw miman pax yeloc apnoj jun bꞌie tuꞌ.
8 Ey ton jun sley Naj Kaawil,
jaxca tiꞌ yalon can yul An Juun Tzꞌibꞌebꞌilcanoj,
chi yal jaxca tiꞌ:
“Camcꞌulnewej ebꞌ je yet animail,
jaxca che yute je camcꞌulnen je bꞌa,”
ẍi yul An Juun tuꞌ.a
Ta tol chi cu jije tzet chi yal jun ley tuꞌ,
watxꞌ chi kute cu bꞌa,
chi yal tuꞌ.
9 Ta tol man laan oj chi kute cu camcꞌulnen masanil ánima xin,
pena chi kute cu bꞌa.
Jaꞌcꞌal oc jun ley tuꞌ chi aloni,
tol pena chi kute cu bꞌa.
10 Ta ey junoj tzetyetal chi chejle kun yu ley tuꞌ,
ta cꞌam pax chi kun pax oj,
yu cꞌal chꞌan jun tuꞌ,
chi tit bꞌulna kibꞌan masanil wan xax cu jije tuꞌ.
11 Jix yal can Dios jaxca tiꞌ:
“Manche jex oc yin amulal,
manche jex makꞌwi pax cam ánima,”
ẍi Dios.b
Jaꞌton Dios jix alon can scaabꞌil.
Yuxan,
caxcꞌal tol cꞌam chi cu oc yin amulal,
ta tol chi kakꞌ pax cam junoj ket animail,
chi yal yeloc apnoj xin,
tol ma cu jije tzet chi yal ley tuꞌ xin.
12 Yuxan,
watxꞌ ojabꞌ cꞌal chi kute kꞌanabꞌ cu bꞌa,
watxꞌ ojabꞌ chi kute cu bꞌeybꞌal.
Yutol oj naꞌle oc kin yu jun ley chi akꞌon cu jajbꞌanilal.
13 Ta tol cꞌam chi okꞌ cu cꞌul yin ebꞌ ket animail,
man oj okꞌ pax scꞌul Dios kin yet oj snaꞌon oc kin.
Ta tol chi okꞌ cu cꞌul yin ebꞌ ket animail xin,
oj okꞌ pax scꞌul Dios kin yet scꞌual oj snaꞌon oc kin tuꞌ.
Man Kꞌojbꞌil Oj Tol Chi Kalaꞌ, Tol Eyoc Dios Yin Cu Cꞌul
14 Jex wuẍtaj,
jex wanabꞌ,
ta tol chi kal yetoj cu tiꞌ,
tol chi kaoc cu cꞌul yin Dios,
catuꞌ man pax watxꞌ oj tzet chi el kuneni,
tucꞌal chi kalaꞌ,
chi yal tuꞌ.
Ta jaxca tuꞌ chi kute kaon oc cu cꞌul yin Dios,
¿chi cu colcha che naꞌ?
15 Kꞌinaloj ta ey junoj kuẍtaj,
ma junoj kanabꞌ tol mebꞌa chꞌan,
cꞌam spichil,
catuꞌ cꞌam pax sloꞌbꞌe,
16 catuꞌ chi kalon tet jaxca tiꞌ:
“Cha wil cꞌal ja bꞌa xin,
manche jaach oc il,
kꞌaẍnan,
lowan,”
ta cu chi tet,
ta cꞌam pax niꞌoj tzet chi kakꞌ tet yu scawxinajil tuꞌ,
¿watxꞌ mi che naꞌ?
17 Yuxan,
ta chi kaoc cu cꞌul yin Dios,
catuꞌ man pax watxꞌoj cu bꞌeybꞌal,
naꞌbꞌacꞌal chi kalaꞌ,
tol chi kaoc cu cꞌul yin Dios.
18 Tejan ey mactxequel oj alon jaxca tiꞌ:
“Jaach tiꞌ,
asanne cha waoc ja cꞌul yin Dios.
Jal jin pax xin,
jaꞌ tzetyetal watxꞌ chi el wunen an,”
ẍi.
Ta chi wal jain tiꞌ an,
tol cꞌam mactxequel chi skeꞌ xꞌoxon eloj,
ta yel eyoc scꞌul yin Dios,
ta cꞌam tzet watxꞌ chi el yuneni.
Ey mactxequel xin,
tol jaꞌ yin watxꞌ tzet chi el yuneni chi txeclo eloj,
tol yel eyoc scꞌul yin Dios.
19 Ey mactxequel chi yaoc yin scꞌul,
tol junne Dios,
watxꞌ ton snaꞌoni.
Jacꞌalaꞌ ebꞌ pena espíritu chi ya pax oc ebꞌ yin scꞌul,
catuꞌ chi bꞌilwi ebꞌ yu xiwcꞌulal sattaj.
20 Ey jaywan jex jaxca tol cꞌam je naꞌbꞌal,
naꞌcha ojabꞌ el wan tiꞌ je yu xin.
Ta tol yel chi kaoc cu cꞌul yin Dios,
ta cꞌam pax tzet watxꞌ chi el kuneni,
cꞌam niꞌoj yeloc apnoj,
chi yal tuꞌ.
21 Jaꞌ naj kichmam chi yij Abraham yet peyxa,
jix yiꞌtoj jun scꞌaal chi yij Isaac,
tol jix yakꞌ tzꞌaꞌ yin xaambꞌalil snaꞌoni,
yutol queytuꞌ jix yun yalon Dios tet.
Yu tzet jix yun Abraham tuꞌ xin,
yuxan watxꞌ ton naj sattaj Dios tuꞌ.c
22 Cu naꞌwejtej xin,
tol jix yaoc scꞌul naj Abraham yin Dios,
yuxan jix skeꞌ sjijen tzet jix akꞌle yunne.
Jato yet jix yun naj jun tuꞌ,
jix txeclo el sicꞌlebꞌil,
tol ey ton oc scꞌul naj yin Dios.
23 Jaxca ton tiꞌ jix yunen can el tzet tzꞌibꞌebꞌilcan yul An Juun bꞌey chi yal jaxca tiꞌ:
“Jix yaoc naj Abraham yin scꞌul,
tzet jix yal Dios tet,
yuxan,
jix al-le Abraham watxꞌil yu Dios,”
ẍi.d
Jacꞌalaꞌ,
chi yalon pax canoj,
tol jaꞌ Abraham,
yamigo sbꞌa yetoj Dios.e
24 Yuxan,
naꞌcha ojabꞌ el jun tiꞌ je yu,
man asanne oj yutol chi kaoc cu cꞌul yin,
yuxan watxꞌ jon yul sat Dios,
tol yu pax tzet watxꞌ chi el kuneni,
yuxan watxꞌ jon yul sat Dios.
25 Quey pax tuꞌ jix yun jun ix ix chi yij Rahab yet peyxa,
amul ix ton ix,
akꞌbꞌil sposada ebꞌ ẍejabꞌ ebꞌ Israel yu ix.
Jacꞌal oc ix jix chejon meltzo ebꞌ bꞌey junxa bꞌe,
yet watxꞌ cꞌam chi michꞌcha ebꞌ.f
Yu jun swatxꞌcꞌulal ix tuꞌ yin ebꞌ,
yuxan jix al-le ix watxꞌil yu Dios.
26 Jaxca junoj mimanile camnajxa,
yutol cꞌamxa spixan,
queyton tuꞌ keocoj,
ta tol tucꞌal chi kaoc cu cꞌul yin Dios,
catuꞌ man pax watxꞌoj cu bꞌeybꞌal.