Manche Cu Camcꞌulne Jun Yul Yibꞌankꞌinal Tiꞌ
4
¿Je yotaj mi bꞌey chi titoc wan jowal cꞌal cajlebꞌail ey je xol?
Jaꞌ yet che yochen oc wan spenail yet je mimanil,
jaꞌ yet tuꞌ chi pitzcꞌu a wan jowal tuꞌ yin je naꞌbꞌal.
2 Che yoche oc junoj tzetyetal,
cꞌam pax chi akꞌle ey jex.
Yuxan listo xa jex yu makꞌwoj cam ánima.
Caw eyoc yin je cꞌul je yochen oc tzettaj yetal,
ma pax cꞌal akꞌle je naꞌbꞌaloj,
yu cꞌal jun tuꞌ yuxan che yakꞌle cꞌal jowal.
Cꞌam chi akꞌle ey jex,
yutol cꞌam che kꞌan tet Dios.
3 Caxcꞌal mi tol che kꞌanaꞌ,
man cꞌaltaꞌ oj akꞌle ey jex,
yutol txꞌoj yoc je naꞌbꞌal yet che kꞌanon tuꞌ.
Jaꞌ je naꞌoni,
tol oj akꞌle ey jex,
catuꞌ oj je yakꞌon je naꞌbꞌal yin wan tzet che kꞌan tuꞌ.
4 Jaex laan jex jaxca junoj ánima jacꞌal amulal chi sey yunne,
queytuꞌ je yili yul sat Dios.
¿Tumi man je yotaj oj xin,
tol jaꞌ yet chi cu camcꞌulnen yul yibꞌankꞌinal,
yetoj cꞌal masanil tzet ey bꞌey,
chi cu oc can acꞌulal yin Dios?
Yuxan,
yal cꞌal mactxequel chi yoche chi oc yamigo oj jun yul yibꞌankꞌinal tiꞌ,
chi oc can acꞌulal yin Dios.
5 ¿Tumi che naꞌ xin,
tol cꞌam cꞌal niꞌoj tzet chi yal yeloc apnoj skꞌane Dios yul An Juun Tzꞌibꞌebꞌilcan bꞌey chi yal jaxca tiꞌ?:
“Jaꞌton Dios jix aon can oc Naj Santo Espíritu kin,
catuꞌ chi yochen Yespíritu tuꞌ,
tol yet jon yin junelne,”
ẍi yul An Juun tuꞌ.
6 Yuxan,
caw miman swatxꞌcꞌulal Dios chi yakꞌ ey jon.
Yutol chi yal yul An Juun Tzꞌibꞌebꞌilcan tiꞌ jaxca tiꞌ:
“Jaꞌ Dios chi uchontoj ebꞌ mimej chi yute sbꞌa yet chi eqꞌui,
jal tet ebꞌ yeynajil chi yute sbꞌa chi ecꞌ xin,
jaꞌ swatxꞌcꞌulal Dios chi xꞌox tet ebꞌ,”
ẍi yul An Juun tuꞌ.a
7 Yuxan jijem ojabꞌ chi kute cu bꞌa tet Dios,
catuꞌ tecꞌan cꞌal ojabꞌ chi kute cu bꞌa tet diablo,
catuꞌ oj el ey jon.
8 Cu jitzwej oc cu bꞌa scꞌatan Dios,
catuꞌ oj sjitzontej sbꞌa Dios cu cꞌatan.
Waꞌnewej je bꞌeybꞌal,
jex tol pena je bꞌeybꞌal.
Waꞌnewej oc je naꞌbꞌal mac jex tol caabꞌ sat jex.
9 Ocanwej yin cuscꞌulal,
michꞌcha ojabꞌ je cꞌul je yokꞌ sicꞌlebꞌil.
Cꞌam ojabꞌ che tzee,
chex okꞌi.
Meltzo ojabꞌ can oc je tzalacꞌulal yin cuscꞌulalil.
10 Iꞌwej ey je bꞌa sattaj Naj Kaawil,
catuꞌ oj jex iꞌle a can yu naj.
Manche Kal Skꞌumal Junoj Ket Creyenteal
11 Jex wuẍtaj,
jex wanabꞌ,
manche je yal-le je kꞌumal.
Jaꞌ mactxequel chi yal skꞌumal junoj yet creyenteal,
ma chi snaꞌoc yin,
chi yal yeloc apnoj tol jaꞌ sley Dios pena yaloni,
cꞌal cꞌam swatxꞌil.
Ta tol chi cu naꞌoc yin sley Dios xin,
chi yal yeloc apnoj tol lalan kalon oc cu bꞌa yin juezalil,
catuꞌ cꞌamxa chi cu jije ley tuꞌ.
12 Jaꞌ Dios jix waꞌnen ley,
catuꞌ jacꞌal pax eyoc yin Juezal.
Jaꞌton Naj chi skeꞌ cu scoloni,
catuꞌ chi skeꞌ pax sqꞌueyel masanil ánima yu.
Yuxan,
¿tumi ey je yalon je yet je naꞌon oc yin je yet animail?
Man Kotajoj Tzet Ey Jon Yet Yecal, Caabꞌe
13 Abꞌwej xin.
Ey jex lalan je yalon jaxca tiꞌ tinaniꞌ:
“Jaꞌ tinaniꞌ,
ma yecal,
oj cu toj bꞌey junoj conobꞌ,
jun abꞌil oj cu ecꞌ tituꞌ.
Oj kaon oc cu txon,
catuꞌ oj kakꞌon ganar cu tumin,”
je chi.
14 Man pax kotajoj tzet ey jon yecal tuꞌ.
Yutol jaꞌ cu kꞌinal,
junne chꞌan txolan chi lawi el yul yibꞌankꞌinal tiꞌ.
Laan jaxca xobꞌ txꞌotxꞌ,
jun chꞌan txolan chi a wacacoj,
catuꞌ chi qꞌuey pax aoj.
15 Yel xacꞌal watxꞌ,
ta quey tiꞌ chi kute kꞌanabꞌ cu bꞌa jaxca tiꞌ:
“Ta chi el yin scꞌul Naj Kaawil,
catuꞌ ta tol iquis jon to ecꞌoj,
oj kun jun tiꞌ,
cꞌal jun tuꞌ.”
Je chi ojabꞌi.
16 Ey jex xin,
miman cꞌal che yute je bꞌa,
catuꞌ miman che yute kꞌanabꞌ je bꞌa.
Masanil mactxequel chi yun jaxca tuꞌ xin,
man watxꞌoj chi yute sbꞌa sattaj Dios.
17 Ta tol kotaj tzet chi yoche scꞌul Dios chi kunne,
ta cꞌam chi kun pax oj,
caw chi oc cu penail tet.