Xeclobꞌal A Jun Yaaw Caw Pena
2
Jaꞌ tinaniꞌ xin,
jex wuẍtaj,
jex wanabꞌ,
oj kaltoj je yabꞌe,
tzet oj yun sjul Naj Kaawil Jesucristo,
catuꞌ oj cu syambꞌan oc yetoj.
2 Chi kaltoj ey jex,
manche somcha el je naꞌbꞌal,
ta ey ebꞌ chi alon ey jex,
tol julnajxa Naj Kaawil.
Caxcꞌal chi yal ebꞌ tol jaꞌ Yespíritu Dios jix alon tet ebꞌ,
caxcꞌal yul yet xꞌojli chi yalon ebꞌ,
manche jex oc il yu tzet chi yal ebꞌ.
Caxcꞌal chi yal ebꞌ tol jix apni cu carta tet ebꞌ,
manche je chaꞌ je yabꞌe.
3 Manche je yakꞌ iꞌle eytej je sat yu junoj mactxequel.
Yutol jaꞌ yet cꞌamto chi jul Naj Kaawil,
ey jun tiempoal ecꞌal ebꞌ oj meltzo oc acꞌulal yin Dios.
Catuꞌ oj xꞌoxa sbꞌa jun yaaw caw pena.
Jaꞌ jun yaaw tuꞌ,
sowalil oj ale cantoj bꞌey syaꞌilal.
Oj yakꞌle jowal yetoj Dios.
4 Oj tit sjowal yin masanil tzet chi al-le oc diosal,
cꞌal yin jantaj tzet bꞌey chi yal sbꞌa ánima,
masantaꞌ oj octoj chotan yul stemplo Dios,
catuꞌ oj yalon oc sbꞌa diosal.
5 Naꞌwejtej tol jaꞌ yet jix jin ecꞌ je yetoj,
jix wal can wan tiꞌ je yabꞌe.
6 Je yotaj tzet yuxan cꞌamto chi chaꞌle jul jun pena yaaw tuꞌ.
Cꞌam chi txeclo a yet man to stiempoal oj.
7 Jaꞌ yipalil spenail tuꞌ,
lalanxa smulna yin ewantajil tinaniꞌ,
masantaꞌcꞌal oj iꞌle el mactxequel chi tenon oc tucan yet chi xꞌoxon a sbꞌa tuꞌ.
8 Catuꞌ oj xꞌoxon can a sbꞌa jun pena yaaw tuꞌ.
Tucꞌal pax oj xuꞌle cam yu Naj Kaawil Jesús.
Jaꞌ wan stzejejial yetbꞌi oc Naj Kaawil yet oj jul tuꞌ,
jaꞌ oj akꞌon qꞌueyel jun pena tuꞌ.
9 Jaꞌ yet oj xꞌoxon a sbꞌa jun winaj pena yaaw tuꞌ,
oj oc Satanás yetoj.
Oj yakꞌ yipal jun winaj tuꞌ.
Yuxan ey wan milagro cꞌal wanxa tzetyetal oj el xꞌoxon yu yetnen ánima.
10 Ecꞌal tzet penataj oj el yuneni,
yu yiꞌon eytej sat ebꞌ oj qꞌueycan eloj.
Oj qꞌueycan el ebꞌ,
yutol cꞌam chi yoche ebꞌ chi yaoc scꞌul yin jun cuybꞌanile caw yel,
yet watxꞌ chi colcha ebꞌ.
11 Yu tuꞌ xin,
oj ẍaꞌ Dios yiꞌle eytej sat ebꞌ yu tzet man yeloj,
catuꞌ oj yaon oc lekꞌtiꞌal ebꞌ yin scꞌul.
12 Yuxan,
masanil ebꞌ cꞌam chi yal scꞌul chi yaoc scꞌul yin jun cuybꞌanile caw yel,
oj ale cantoj ebꞌ bꞌey syaꞌilal,
yutol jix yakꞌ tzalabꞌoj scꞌul ebꞌ yin spenailal.
Sicꞌbꞌil Jon Xa El Yu Dios
13 Jex wuẍtaj,
jex wanabꞌ,
camcꞌulnebꞌil jex yu Naj Kaawil.
Sowalil chi kal yu diosal tet Dios je yu,
yutol peyxa tax sicꞌbꞌil jex el yu Dios ketoj,
yet watxꞌ chex colcha el yu Yespíritu.
Jaꞌ Yespíritu tuꞌ chex aon oc yetoj Dios.
Yuxan chex colcha ketoj,
yu pax che yaoc je cꞌul yin jun cuybꞌanile caw yel.
14 Jaꞌ skꞌaneal yet colbꞌanile albꞌil ey jex ku,
jaꞌ yu jun tuꞌ jix jex yawten Dios yu je yoc yetoj,
yet watxꞌ,
jaxca swatxꞌil Jesucristo,
queytuꞌ chi yun can el je watxꞌil.
15 Yu tuꞌ xin,
jex wuẍtaj,
jex wanabꞌ,
caw tecꞌan che yute je bꞌa.
Manche je bꞌej qꞌueytoj wan cuybꞌanile kalnaj ey jex,
cꞌal wan albꞌiltoj yul carta ku.
16 Jaꞌ Naj Kaawil Jesucristo,
yetoj cu Mam Dios,
caw ey scamcꞌulal ebꞌ kin.
Jaꞌ swatxꞌcꞌulal chi akꞌon smimanil cu cꞌul tobꞌalkꞌinal.
Catuꞌ chi yakꞌon pax kaon oc swatxꞌil yipoj cu cꞌul.
17 Chi koche chi yakꞌ smimanil je cꞌul.
Catuꞌ chi yakꞌon pax je tecꞌanil,
yet watxꞌ masanil cꞌal tzet che yalaꞌ,
cꞌal tzet che yunne,
watxꞌ ojabꞌ cꞌal yul sat Dios.