Jaꞌ Ebꞌ Israel Sicꞌbꞌil El Yu Dios
9
Eyoc jin cꞌul yin Cristo je yetoj an.
Yuxan,
jaꞌ wan oj waltoj ey jex tiꞌ an,
caw yel,
man lekꞌtiꞌal oj.
Jaꞌ Naj Santo Espíritu chi akꞌon jin naꞌ an,
jaꞌ chi akꞌon wotajne el an,
tol yel wan oj waltoj ey jex tiꞌ an.
2 Caw chi tac jin cꞌul yu ebꞌ wet Israelal.
Ey cꞌal oc ebꞌ yin jin cꞌul tobꞌalkꞌinal an,
caw chi woche chi colcha el ebꞌ an.
3 Ta chi colcha ebꞌ wet conobꞌ tuꞌ an,
yu chin kꞌantej sjowal scꞌul Dios wibꞌan an.
Caxcꞌal chi poꞌocha jin nan yetoj Cristo yu scolcha el ebꞌ wet conobꞌ an,
caw chin tzala jaxca tuꞌ an.
4 Yicꞌaal Israel ebꞌ wetoj an.
Jaꞌ Dios jix aon oc ebꞌ yuninal oj.
Jix xꞌoxtej stzejejial tet ebꞌ,
yet jix ecꞌ yetoj ebꞌ.
Ey swa kꞌane jix yakꞌ yetoj ebꞌ.
Jix yakꞌ pax can sley tet ebꞌ.
Jix yal can tet ebꞌ tzet chi yute yiꞌon ey sbꞌa ebꞌ tet.
Ey wan tzetyetal bꞌey jix yakꞌ stiꞌ tet ebꞌ.
5 Ey wan ebꞌ,
mimej yeloc apnoj yul sat Dios yet peyxa,
jaꞌton ebꞌ yichmam ebꞌ.
Jix oc Cristo yet conobꞌ oj ebꞌ,
yet jix oc animail.
Jaꞌ Cristo tuꞌ,
Dios,
yaaw yeoc yibꞌan masanil tzettaj yetal.
Al-le ojabꞌ watxꞌ kꞌane yin Dios tobꞌalkꞌinal.
Amén.
6 Caxcꞌal ma colcha ebꞌ Israel masanil,
ma cꞌal skeꞌ kaloni,
tol ma yun wan tzet bꞌey jix yakꞌ can stiꞌ Dios tet ebꞌ.
Yutol jaꞌ ebꞌ yicꞌaal Israel tuꞌ man masaniloj ebꞌ yel sconobꞌ Dios.
7 Jaꞌ ebꞌ yicꞌaal naj Abraham tuꞌ,
man masaniloj ebꞌ yel yuninal Dios.
Yutol yalnaj can Dios tet naj Abraham tuꞌ jaxca tiꞌ:
“Jaꞌ yin naj jaꞌ cꞌaal Isaac,
jatuꞌ oj pitzcꞌu can el ebꞌ ja wicꞌaal sicꞌbꞌilxa el wu an,”
ẍi Dios tet naj.a
8 Jaꞌ jun tiꞌ,
chi yal yeloc apnoj tol cꞌam junoj mactxequel chi skeꞌ yoc yuninal oj Dios yu cꞌal yichmam.
Asan ebꞌ yicꞌaal naj Abraham jix pitzcꞌu el jaxca jix yun yakꞌon can stiꞌ Dios tet naj,
jaꞌton ebꞌ tuꞌ yel yuninal Dios ebꞌ.
9 Jaꞌ tzet yalnaj can Dios tet naj Abraham tuꞌ yet jix yakꞌon can stiꞌ tet naj.
Jix yal Dios jaxca tiꞌ:
“Oj jin jul junelxa jaxca tiempo tinaniꞌ an.
Jaꞌ ix Sara xin,
oj aloj jun winaj unin yu ix,”
ẍi Dios tet naj.b
10 Man asanne oj wan tiꞌ chi waltoj ey jex an.
Yutol jaꞌ kichmam Israel yetoj yetbꞌi Rebeca pax oj,
ey cawan yuneꞌ ebꞌ,
tioẍ unin ebꞌ tuꞌ.
Yet Isaac ebꞌ scawanil.
11-13 Jaꞌ yet cꞌamto chi ali cawan unin tuꞌ,
cꞌamto tzet chi el yunen ebꞌ,
cꞌamto junoj tzet watxꞌ ma junoj tzet pena chi el yunen ebꞌ.
Jix yalon pax Dios tet ix Rebeca tuꞌ jaxca tiꞌ:
“Jaꞌ naj bꞌabꞌel oj aloj,
jaꞌ naj oj akꞌon servil naj tzunan xa oj aloj,”
ẍi Dios tet ix.c
Jaꞌ jun tiꞌ chi ẍaꞌle sbꞌa yalon yetoj junxa tzet tzꞌibꞌebꞌil pax can yul An Juun bꞌey chi yal jaxca tiꞌ:
“Jaꞌ naj Jacob,
sicꞌbꞌil el wu an.
Jaxa naj Esaú,
bꞌejbꞌil can naj wu an,”
ẍi Dios yul An Juun tuꞌ.d
Jaꞌ wan kꞌane tiꞌ,
chi txꞌoxon eloj,
tol ey yalon yet Dios sicꞌon el junoj mac chi yoche.
Man yu oj tzet chi el kuneni,
yuxan chi cu sicꞌle el yu Dios.
14 ¿Tzet mi cu chi,
che naꞌ?
¿Ta man jichanoj chi yute Dios jaxca tuꞌ?
Cꞌamaj,
jichan toni.
15 Yutol jix yal can tet naj Moisés jaxca tiꞌ:
“Oj wakꞌ jin mimancꞌulal tet mac chi yal jin cꞌul,
catuꞌ oj okꞌ jin cꞌul yin mac tet chi yal jin cꞌul,”
ẍi Dios tet naj.e
16 Caxcꞌal chi koche chi cu colchai,
caxcꞌal caw chi cu mulna yu cu colbꞌanil,
man yu oj wan tuꞌ,
chi cu colchai.
Yutol asan yu chi okꞌ scꞌul Dios kin.
17 Tzꞌibꞌebꞌilcan yul An Juun tzet jix yal Dios tet naj Faraón,
naj yaaw bꞌey Egipto.
Chi yal jaxca tiꞌ:
“Jix jaach waoc yin yaawil bꞌey jun conobꞌ tiꞌ an,
yet watxꞌ oj txeclo el wipal yu tzet oj jaach wute an.
Oj yabꞌ ebꞌ ánima bꞌey masanil yul yibꞌankꞌinal,
tol miman weloc apnoj an,”
ẍi Dios tet naj Faraón.f
18 Jaꞌ yu wan tiꞌ kotaj tol Dios chi okꞌ scꞌul yin mac tet jatacꞌalaꞌ bꞌey chi yal scꞌul.
Ilaꞌ pax chi yakꞌ cawxo el scꞌul tet mac bꞌey chi yal scꞌul chi yakꞌa.
19 Tejan ey mi jex oj je yal ey jin jaxca tiꞌ:
“Ta jaxca tuꞌ xin,
¿tzet yuxan chi yal pax Dios tol jaon penawom jon xin?
¿Mac junoj chi skeꞌ stenon oc wan tzet chi yoche Dios?
Tejan je chi jaxca tuꞌ.”
20 Caw cꞌam chi skeꞌ kalon jaxca tuꞌ.
Cꞌam junoj mac chi skeꞌ stakꞌwi jaxca tuꞌ tet Dios.
Jaꞌ junoj txꞌotxꞌ xi,
¿chi skeꞌ yalon jun xi tet stzꞌajomal jaxca tiꞌ?
“¿Tzet yuxan chin ja waꞌne jaxca tiꞌ?”
ta ẍi jun xi tuꞌ.g
21 Yutol jaꞌ jun tzꞌajlom tuꞌ chi skeꞌ stzꞌajon junoj txꞌotxꞌ jaxca chi yoche scꞌul.
Caxcꞌal junne bꞌey chi tit xꞌotxꞌ chi skꞌanaꞌ,
chi cꞌal skeꞌ swaꞌnen junoj txꞌotxꞌ watxꞌ tzet chi ey yul,
catuꞌ chi skeꞌ swaꞌnen junoj txꞌotxꞌ pena tzet chi ey yul.
22 Yuxan,
quey pax tuꞌ Dios yetoj ebꞌ ánima.
Ey ebꞌ smoo ẍaꞌon sjowal scꞌul Dios.
Smoo ebꞌ chi too can bꞌey syaꞌtajilal yin junelne.
Caxcꞌal chi yoche Dios chi xꞌoxel sjowal scꞌul yibꞌan ebꞌ,
catuꞌ chi txeclo el yipalil,
caw miman cꞌal chi yute scꞌul,
chi yakꞌ cꞌal techa spenail ebꞌ.
23 Jaxca ton tiꞌ jix yute xꞌoxon el Dios tol caw miman yeloc apnoj swatxꞌcꞌulal ey jon,
yet jix okꞌ scꞌul kin.
Yutol peyxa tax jix cu ya can oc yetoj,
yet watxꞌ ey kalon ket yin swatxꞌil.
24 Caxcꞌal Israel jon,
caxcꞌal man Israeloj jon,
awtebꞌil jon xa yu koc yetoj Dios.
25 Yuxan jix yal Dios yul libro Oseas yul An Juun Tzꞌibꞌebꞌilcan jaxca tiꞌ:
Jaꞌ wan ebꞌ man jin conobꞌoj yet yalantoj,
oj wiꞌoc ebꞌ jin conobꞌoj an.
Jaꞌ ebꞌ man camcꞌulnebꞌil oj wu yet yalantoj an,
oj jin camcꞌulne ebꞌ an,
ẍi Dios.h
26 Ey jun lugar bꞌey jix yal Dios tet ebꞌ jaxca tiꞌ:
“Jaex tiꞌ,
man jin conobꞌoj jex an,”
ẍi Dios.i
Jacꞌal ton oc ebꞌ a lugar tuꞌ oj al-le oc yuninal oj Dios iquis,
ẍi yul An Juun tuꞌ.j
27 Albꞌilcan wan kꞌane tiꞌ yu naj Isaías,
naj ẍejabꞌ Dios,
yin ebꞌ Israel.
Chi yal can jaxca tiꞌ:
“Caxcꞌal oj chꞌibꞌ sbꞌisil ebꞌ wet Israelal jaxca sbꞌisil yarenail jaꞌ mar,
jaywanne pax ebꞌ oj colchaoj.
28 Yutol niꞌanxane tiempo,
catuꞌ oj naꞌle oc yin jun yul yibꞌankꞌinal tiꞌ yu Naj Kaawil.
Yuxan,
jaxca tiꞌ oj yun can el skꞌane yin tzꞌajanil,”
ẍi yul An Juun.k
29 Jacꞌalaꞌ naj Isaías tuꞌ jix yal can pax naj jaxca tiꞌ:
Jaꞌ Naj Kaawil,
yaawil ebꞌ a satcan pax oj,
kꞌinaloj ta ma col-le can el jaywan ebꞌ jix cancan kicꞌaal oj yu Naj.
Jix mi cu lawi el cu masanil,
jaxca jix yun slawi el ebꞌ a Sodoma yetoj ebꞌ a Gomorra,
ẍi naj Isaías yul An Juun.l
Jaꞌ Ebꞌ Israel Ma Yaoc Jun Watxꞌ Kꞌane Yin Scꞌul
30 Tol chi waltoj tzet chi yal yeloc apnoj wan chi wal ey jex tiꞌ an.
Jaꞌ ebꞌ man Israeloj,
ma ecꞌ nanon scꞌul ebꞌ tzet chi yun yoc ebꞌ watxꞌil yul sat Dios.
Yuxan jix yal Dios tol ey ebꞌ watxꞌ yul sat.
Jix yal Dios yin ebꞌ jaxca tuꞌ,
yutol chi yaoc scꞌul ebꞌ yin.
31 Jal pax ebꞌ Israel,
caw jix yaoc snaꞌbꞌal ebꞌ yin sley Moisés,
yet watxꞌ chi oc ebꞌ watxꞌil yul sat Dios,
snaꞌoni.
Cꞌam pax chi skeꞌ sjijen jun ley tuꞌ ebꞌ.
32 ¿Tzet yuxan jaxca tuꞌ jix elol yibꞌan ebꞌ?
Yutol cꞌam chi yaoc scꞌul ebꞌ yin Cristo.
Jaꞌ snaꞌon ebꞌ tol chi skeꞌ yoc ebꞌ watxꞌil yul sat Dios yu wan chi el yunen ebꞌ tuꞌ.
Yutol jaxca junoj chꞌen chꞌen bꞌey chi ẍaqꞌuel yajan ebꞌ,
catuꞌ chi chichon oc scꞌul ebꞌ yin,
queytuꞌ Cristo yul sat ebꞌ.
33 Jix yal Dios skꞌaneal yin Cristo tuꞌ yul An Juun,
yet chi yal jaxca tiꞌ:
Jaꞌ bꞌey conobꞌ Sión,
* jaꞌ tituꞌ oj jin txꞌoxa jun mactxequel snan xol ebꞌ Israel.
Jaxca junoj chꞌen chꞌen bꞌey chi ẍaqꞌuel yajan ebꞌ,
catuꞌ chi telcꞌotoj ebꞌ yu,
queytuꞌ oj yun jun mactxequel tuꞌ yul sat ebꞌ.
Jal ebꞌ oj yaoc scꞌul yin xin,
man oj somcha el scꞌul ebꞌ yu,
ẍi Dios yul An Juun tuꞌ.m