Sowalil Chi Kun Jaxca Chi Yoche Yespíritu Dios
8
Jaꞌ tinaniꞌ,
junxane keoc yetoj Cristo Jesús,
cꞌamxa syaꞌtajilal eyoc kibꞌan,
jaon chi kun jaxca chi yoche Yespíritu Dios,
manaj tzet chi yoche cu mimanil tiꞌ.
2 Jaꞌ Yespíritu Dios chi akꞌon cu kꞌinal yin junelne,
yutol junxane keoc yetoj Cristo Jesús.
Yu yipal Yespíritu tuꞌ,
yuxan jix cu colcha el yul skꞌabꞌ spenailal,
cꞌal yul skꞌabꞌ camich.
3 Yu cu pena ochwanil tiꞌ,
cꞌam chi skeꞌ cu jijen tzet chi yal sley Moisés.
Yuxan,
cꞌam yopiso jun ley tuꞌ ku yu cu scoloni.
Jal pax Dios xin,
jaꞌ chi cu coloni.
Jaꞌ Dios jix yatej Scꞌaal,
catuꞌ jix jul yute sbꞌa animail.
Laan smimanil Naj tuꞌ jaxca ket jaon penawom jon tiꞌ.
Jaꞌ jix jul cam yu cu penail.
Jaꞌ yet jix cam smimanil tuꞌ,
jix cancan spenail yalan yu, yet watxꞌ cꞌamxa yalon yet wan spenail tuꞌ kin.
4 Jaxca tuꞌ jix yute sbꞌa,
yet watxꞌ chi kun jaxca chi yal ley.
Yutol jaon tiꞌ,
cꞌamxa chi cu ecꞌ yin wan tzetyetal chi yoche cu pena ochwanil.
Lalan kecꞌ yin jaxca chi yoche Yespíritu Dios.
5-6 Jaꞌ ebꞌ chi unen pena ochwanileal,
jacꞌal yin chi yaoc snaꞌbꞌal ebꞌ.
Asan yin tzet man watxꞌoj chi yaoc snaꞌbꞌal ebꞌ,
yuxan chi too can ebꞌ bꞌey camich yin junelne.
Jal ebꞌ lalan yunen jaxca chi yoche Yespíritu Dios tuꞌ xin,
asan yin jun tuꞌ chi yaoc snaꞌbꞌal ebꞌ.
Yu jun tuꞌ,
yuxan oj ẍaꞌ skꞌinal ebꞌ tol ey cꞌal yin tobꞌalkꞌinal.
Catuꞌ chi oc ebꞌ yin swatxꞌilal yetoj Dios.
7 Jal ebꞌ chi unen pena ochwanileal tuꞌ xin,
tucꞌal chi xꞌemoc sbꞌa ebꞌ yin Dios.
Cꞌam chi yoche ebꞌ chi sjije sley Dios tuꞌ.
Catuꞌ cꞌam chi skeꞌ pax sjijen ebꞌ.
8 Yuxan,
jaꞌ ebꞌ chi unen pena ochwanileal tuꞌ,
caw cꞌam chi skeꞌ yunen ebꞌ jaxca chi yoche Dios,
catuꞌ cꞌam chi tzala Dios yetoj ebꞌ.
9 Jal jon jaon tiꞌ,
cꞌamxa chi kun cu pena ochwanilal.
Asanne ojabꞌ tzet chi yoche Yespíritu Dios,
asanne ojabꞌ chi kunne,
yutol jaꞌ eyoc kin.
Jaꞌ ebꞌ man eyoj oc Yespíritu Cristo yin,
man yetoj Cristo ebꞌ.
10 Jal jon jaon tiꞌ,
eyxa oc Cristo kin.
Yuxan,
caxcꞌal oj cam cu mimanil tiꞌ yu spenail,
jal cu pixan iquis cꞌal ecꞌoj,
yutol watxꞌ jon yul sat Dios tinaniꞌ.
11 Jaꞌ Dios jix akꞌon pitzcꞌu a Jesús xol ebꞌ camnaj.
Ta tol eyoc Yespíritu kin,
jaꞌ jun mac jix akꞌon pitzcꞌu a Jesucristo tuꞌ,
jaꞌ oj pitzcꞌunen pax a cu mimanil cambꞌeal yei,
yutol eyoc Yespíritu Dios kin.
12 Yu jun tuꞌ xin,
jex wuẍtaj,
jex wanabꞌ,
sowalil chi kunne jaxca tzet chi yoche Yespíritu Dios.
Cꞌam chi kunne jaxca chi yoche cu pena ochwanilal.
13 Ta jacꞌalaꞌ kunen tzet chi yoche cu pena ochwanilal,
oj cu cam yu yin junelne.
Jal ta yetoj yipal Yespíritu Dios chi cu bꞌejon can kunen cu pena ochwanilal tiꞌ,
oj cu chaꞌ kꞌinale tol ey cꞌal yin tobꞌalkꞌinal.
14 Yal cꞌal mac chi yun tzet chi xꞌox Yespíritu Dios tet,
jaꞌton ebꞌ tuꞌ yel yuninal Dios.
15 Manxa sowalil oj chi cu xiwi,
yutol man jaxca junoj yakꞌomal servil kei,
yutol yuninal jon Dios yu jix yaoc Espíritu kin.
Yu Espíritu tiꞌ,
yuxan chi skeꞌ kalon tet Dios jaxca tiꞌ:
“Mamin,”
cu chi tet.
16 Kotaj junjun jon yin cu pixan,
yetoj pax oj,
jaꞌ Yespíritu Dios chi akꞌon kotajne eloj,
tol yel yuninal Dios jon.
17 Yutol yuninal Dios jon,
yuxan oj cu chaꞌ tzet oj yakꞌa,
laan ket oj cu chaꞌ yetoj Cristo,
ta chi kabꞌ syaꞌil yetoj,
catuꞌ junne oj cu eey yetoj bꞌey swatxꞌilal.
18 Jain tiꞌ,
chin naꞌ an,
jaꞌ wan syaꞌilal lalan kabꞌen tiꞌ tinaniꞌ,
caw cꞌam chi apni yintaj swatxꞌil Dios oj yakꞌ ey jon yet jun tiempoal tuꞌ.
19 Masanil tzettaj yetal waꞌnebꞌil yu Dios,
caw chi yechbꞌane ebꞌ xeclonen el cu watxꞌil,
jaon yuninal Dios jon tiꞌ.
20 Yutol jaꞌ wan tzet waꞌnebꞌil yu Dios,
pilan chi etextoj,
oj oc yin cꞌam swatxꞌilal.
Manaj wan tzetyetal tuꞌ chi yetnetoj sbꞌa yul yet jaxca tuꞌ,
jaꞌ Dios chi akꞌon etextoj ebꞌ.
Ey pax jun tiempoal echbꞌanebꞌil sjuli.
21 Yutol masanil wan tuꞌ oj colcha eloj,
yet watxꞌ cꞌamxa tzet chi ioni.
Jaxca tuꞌ oj yun cu colcha el,
jaon yuninal jon xa Dios tiꞌ.
Jaxa koc yin swatxꞌil tuꞌ,
jaxca tuꞌ oj yun scolcha pax el wan tuꞌ ketoj.
22 Kotaj,
tol masanil wan tzet waꞌnebꞌil yu Dios yet peyxa tuꞌ,
eyoc yalan syaꞌilal.
Jaxca junoj ix ix,
lalan yabꞌen syaꞌil unin,
jaxca tuꞌ yabꞌen syaꞌil wan tzettaj yetal tinaniꞌ.
23 Man asanne oj wan tuꞌ lalan yabꞌen syaꞌil,
tol quey jon pax tuꞌ,
lalan kabꞌen syaꞌil.
Eyxa oc Naj Espíritu kin,
yet watxꞌ chi txeclo eloj,
tol ey tzet oj yakꞌ Dios ey jon.
Caxcꞌal jaxca tuꞌ xin,
tol lalan kabꞌen syaꞌil tinaniꞌ.
Lalan kechbꞌanen bꞌakꞌin oj cu oc yuninal oj Dios sicꞌlebꞌil.
Catuꞌ jaꞌ yet tuꞌ oj colcha can el cu mimanil tiꞌ.
24 Jix cu colchai,
yutol jix kaoc yipoj cu cꞌul.
Kꞌinaloj ta xax cu chaꞌ cu colbꞌanil tinaniꞌ,
manxa sowalil oj chi kechbꞌane sjuli.
Yutol jaꞌ tzet xax kiloc yetoj cu sat,
cꞌamxa chi kechbꞌane sjuli.
25 Jal pax tzet chi kaoc yipoj cu cꞌul,
cꞌam chi kiloc yetoj cu sat.
Yuxan,
sowalil tecꞌan chi kute cu bꞌa kechbꞌanen sjuli.
26 Jacꞌalaꞌ pax Naj Yespíritu Dios,
caw chi oc Naj ketoj yet man tzꞌajanoj cu naꞌbꞌal.
Yutol man kotajoj tzet chi kute txaloj cu bꞌa jaxca chi yoche Dios.
Ey bꞌey tucꞌal chi nanon cu cꞌul,
yutol cꞌam chi naꞌcha ku tzet chi kute kalon cu bꞌa tet Dios,
yuxan jaꞌ Naj Espíritu chi txali ku.
27 Jaꞌ Dios chi ilon tzet eyoc yin cu pixan junjun jon.
Chi naꞌcha el yu tzet chi yal Yespíritu yin cu pixan.
Yuxan chi txali Yespíritu ku jaxca chi yoche Dios,
jaon yet jon xa tiꞌ.
Ey Scamcꞌulal Cristo Kin Yin Tobꞌalkꞌinal
28 Kotaj tol jaꞌ masanil cꞌal tzet chi jul kibꞌan,
chi jul yu cu watxꞌiloj,
ta ey cu camcꞌulal yin Dios,
cꞌal awtebꞌil jon yu Dios yu chi kun jaxca chi yoche Dios.
29 Yotaj xa Dios yet peyxa,
tol yet jon jaon tiꞌ.
Jaꞌ yet tuꞌ sicꞌbꞌil jon can eloj,
yet watxꞌ laan chi kun can el jaxca Scꞌaal.
Jix cu yute Dios jaxca tiꞌ,
yet watxꞌ jaꞌ Scꞌaal tuꞌ chi oc cu bꞌabꞌel uẍtajeal oj cu masanil.
30 Jaꞌ mac jon sicꞌbꞌil jon el yu,
awtebꞌil jon pax yu Dios.
Jaꞌ pax chi alon kin jaon awtebꞌil jon yu tiꞌ,
tol watxꞌ jon yul sat.
Catuꞌ chi yakꞌon swatxꞌil ey jon.
31 Yu wan chi wal tiꞌ an,
caw cꞌamxa tzet chi cu naꞌ tinaniꞌ.
Caw eyoc Dios ketoj,
yuxan cꞌam junoj mac chi skeꞌ cu yetneni.
32 Jaꞌ Dios jix yaoc Scꞌaal yul skꞌabꞌ camich ku cꞌal cu masanil.
Caxcꞌal Scꞌaal,
ma pax scoloꞌ.
Yutol jix yatej Scꞌaal tuꞌ,
yuxan kotaj,
tol oj yakꞌ masanil tzetyetal watxꞌ ey jon.
33 Jaꞌ mac jon sicꞌbꞌil jon el yu Dios,
cꞌam junoj mac chi skeꞌ yakꞌon parte kin tet Dios.
Yutol jaꞌ Dios chi aloni tol watxꞌ jon yul sat.
34 Yuxan,
cꞌam junoj mac oj skeꞌ yaon oc junoj kꞌane kibꞌan,
yutol jaꞌ Cristo jix cami,
jix akꞌle pitzcꞌu pax aoj.
Jaxa tinaniꞌ xin,
eyecꞌ bꞌey swatxꞌ kꞌabꞌ Dios,
lalan yalon tet Dios ku.
35 Cꞌam junoj tzetyetal chi skeꞌ spoꞌon ey cu nan yetoj scamcꞌulal Cristo.
Caxcꞌal syaꞌilal,
caxcꞌal jun miman cuscꞌulal,
caxcꞌal ey mac chi aon oc junoj tzetyetal kibꞌan,
caxcꞌal chi jul wail kibꞌan,
caxcꞌal caw mebꞌa jon,
caxcꞌal ey junoj tzetyetal eyxa smey,
caxcꞌal mi chi cu makꞌle camoj,
jacꞌalaꞌ chi cu scamcꞌulne Cristo.
36 Jaxca chi yun yalon can yul An Juun:
Junjun cꞌu ey smey chi cu cami,
yutol chi kaoc cu naꞌbꞌal ja win.
Jaxca junoj noꞌ meꞌ,
chi iꞌletoj camoj,
queytuꞌ chi cu yute ebꞌ,
ẍi yul An Juun.a
37 Caxcꞌal oj jul wan tiꞌ kibꞌan,
oj kakꞌwej cꞌal ganar yu yipal jun mac chi cu camcꞌulneni.
38 Yuxan,
wotajxa an,
bꞌey cꞌal tet chi jul kibꞌan,
jacꞌalaꞌ caw camcꞌulnebꞌil jon yu Dios.
Caxcꞌal chi tit camich kibꞌan,
ma iquis jon.
Caxcꞌal junoj ángel,
caxcꞌal junoj tzetyetal oj juloj.
Caxcꞌal junoj tzetyetal ey yip,
39 caxcꞌal junoj eyecꞌ bꞌey satcan,
caxcꞌal junoj ey yalan txꞌotxꞌ tiꞌ,
yal cꞌal junoj tzetyetal waꞌnebꞌil yu Dios,
tutun cꞌam chi skeꞌ spoꞌon ey cu nan yetoj cu Mam Dios.
Jaꞌ Dios chi cu camcꞌulneni yu Cristo Jesús,
jaꞌton Naj Kaawil.