Tzet Chi Kunne Yet Chi Cu Jajcha El Yalan Ley
7
Jex wuẍtaj,
jex wanabꞌ,
je yotaj xa sley Moisés,
tol jaꞌ jun ley tuꞌ,
ey yalon yet yin junoj mactxequel yet iquisto ecꞌoj.
2 Kꞌinaloj junoj ix ey yichamil.
Jaꞌ yet iquis ecꞌ yichamil tuꞌ,
tol moan ix yetoj yichamil tuꞌ yu jun ley tuꞌ.
Ta tol chi cam yichamil ix tuꞌ,
jajbꞌil xa ix yu jun ley tuꞌ.
3 Kꞌinaloj ta iquisto yichamil ix tuꞌ,
catuꞌ chi too ix scꞌatan junojxa winaj,
chi too ix yin amul ixal jaxca tuꞌ.
Ta tol chi cam yichamil ix xin,
chi jajcha el ix yalan jun ley tuꞌ.
Caxcꞌal chi yiꞌ junojxa winaj ix,
man amulal oj chi yun ix jaxca tuꞌ.
4 Jex wuẍtaj,
jex wanabꞌ,
jaxca tuꞌ keoc yet yalantoj,
yutol yalan sley Moisés ey jon ocoj.
Jal tinaniꞌ xin,
jaꞌ yul sat Dios,
camnaj jon xa el yin sley Moisés,
yutol jix cu juncꞌune cu bꞌa yetoj Jesucristo,
catuꞌ jix cu camel yin jun ley tuꞌ,
yet watxꞌ chi skeꞌ koc yetoj naj jix pitzcꞌu a xol ebꞌ camnaj,
yet watxꞌ ey kopiso yul sat Dios.
5 Jaꞌ yet yalantoj,
asan cu pena ochwanilal jix kunne.
Jaꞌ yu sley Moisés jix pitzcꞌu a wan tzet man watxꞌoj chi yoche oc cu mimanil tiꞌ.
Jaꞌ wan tuꞌ chi cu iꞌontoj bꞌey camich yin junelne.
6 Jaꞌ yet yalantoj tuꞌ,
jaꞌ jun ley tuꞌ ey yalon yet kin.
Jal tinaniꞌ xin,
camnaj jon xa el yin yul sat Dios.
Yuxan jajbꞌil jon xa tinaniꞌ,
yet watxꞌ asan Dios chi kakꞌ servil.
Yuxan,
lalan kunen jun acꞌ bꞌeybꞌale jix yakꞌ Naj Espíritu ey jon.
Jal jun icham ley tzꞌibꞌebꞌilcan tuꞌ,
cꞌamxa yalon yet kin tinaniꞌ.
Jaꞌ Spenail Eyoc Kin
7 ¿Tzet je chi xin?
Jaꞌ sley Moisés tuꞌ,
¿tumi pena che naꞌ?
Cꞌamaj,
yu jun ley tuꞌ,
yuxan jix wotajne eloj,
tol pena tzet jix el wuneni.
Jaꞌ yet jix wilon oc jin cꞌul yin stzetyetal junojxa mactxequel,
jix wotajne el an,
tol cꞌam swatxꞌil tzet chi el wuneni,
yutol chi yal jun ley jaxca tiꞌ:
“Manche ja waoc ja cꞌul yin stzetyetal junojxa mactxequel,”
ẍi jun ley tuꞌ.a
Kꞌinaloj ta cꞌam tzet chi yalaꞌ,
man wotaj oj an,
ta pena jun tuꞌ.
8 Jal xin,
yu wan chejbꞌanile tuꞌ,
yuxan jix pitzcꞌu a tzet man watxꞌoj win an.
Yuxan,
miman tzet man watxꞌoj jix woche oc an.
Kꞌinaloj ta cꞌam jun ley tuꞌ,
cꞌam mi yeloc apnoj spenailal.
9 Yet man to wotaj oj jun ley tuꞌ,
iquis jin yul sat Dios,
jin naꞌoni.
Jaxa yet jix wotajne el jun ley tuꞌ an,
jix naꞌcha el wu an,
tol cꞌam niꞌoj jin watxꞌil an.
Jaxca tuꞌ xin,
jix wotajne eloj,
tol camnaj jin yul sat Dios yu jun ley tuꞌ an.
10 Jaꞌ jun ley tuꞌ,
ey yopiso yakꞌon kꞌinale,
jaꞌ jix iꞌon pax tej camich wibꞌan an.
11 Yu jun ley tuꞌ,
yuxan jix pitzcꞌu a spenail win an.
Caw jix jin etex el yu wan tuꞌ an.
Jaꞌ wan spenail tuꞌ,
jaꞌ jix iꞌontej camich wibꞌan an,
yu jun ley tuꞌ.
12 Jaꞌ jun ley tuꞌ,
cꞌal wan chejbꞌanile,
tzꞌajan yeoc ebꞌ,
caw jichan ebꞌ,
caw watxꞌ ebꞌ.
13 ¿Tzet mi je chi?
¿Tumi jaꞌ jun tzet watxꞌ tuꞌ jix iꞌontej camich wibꞌan an?
Cꞌamaj,
manaj jun tuꞌ.
Jaꞌ spenail eyoc win an,
jaꞌ jix iꞌontej camich wibꞌan an.
Yuxan queytuꞌ jix yun xeclo eloj,
tol cꞌam swatxꞌil wan tuꞌ.
Jaꞌ wan tuꞌ jix iꞌontej camich wibꞌan yu jun watxꞌ ley tuꞌ.
Jaxca ton tuꞌ jix yun wiꞌontej camich wibꞌan yu jun watxꞌ ley tuꞌ an.
Jaxca ton tuꞌ,
jix yute xꞌoxon el jun ley tuꞌ,
tol jaꞌ tzet man watxꞌoj tuꞌ caw pena.
14 Kotaj tol jaꞌ Yespíritu Dios anentej jun ley tuꞌ.
Jal jin jain tiꞌ,
jacꞌalaꞌ iꞌbꞌil cꞌal oc jun jin pena ochwanilal tiꞌ wu an.
Jaxca tol txonbꞌil jin yu woc yakꞌomaloj servil spenail.
15 Cꞌam chi naꞌcha el wu an,
tzet yuxan chi wun tzet chi el wunen an,
yutol jaꞌ tzet chi el wunen an,
man watxꞌoj chi wil an.
Ey tzet watxꞌ chi woche chi wun an,
cꞌam pax chi wunne,
jaxa wan tzet man watxꞌoj yul jin sat an,
jaꞌ chi wun pax oj.
16 Jal wan tzet man watxꞌoj chi wun tuꞌ an,
ta tol man watxꞌoj yul jin sat an,
chi yal yeloc apnoj,
wotaj an,
tol caw watxꞌ jun ley tuꞌ.
17 Yutol manaj jin jaꞌcaw chi el wunen wan tuꞌ.
Jaꞌ spenailal ey cꞌaltaꞌ oc win an,
jaꞌ chi el wunen an.
18 Wotaj an,
tol cꞌam niꞌoj tzet watxꞌ eyoc win an,
yu jun jin pena naꞌbꞌal tiꞌ an.
Yutol jaꞌ tzetyetal watxꞌ chi woche chi wun an,
cꞌam pax chi skeꞌ wunen an.
19 Cꞌam chi wun tzet watxꞌ jaxca chi woche tuꞌ an.
Jaꞌ tzet cꞌam swatxꞌil cꞌam chi woche tuꞌ,
asanne cꞌal chi wun pax oj.
20 Ta chi wun pax tzetyetal cꞌam chi woche,
chi yal yeloc apnoj,
tol manaj jin lalan wunen an.
Jaꞌ spenailal ey cꞌaltaꞌ oc win tuꞌ an,
jaꞌ chin uteni.
21 Yuxan,
jaxca tiꞌ ey jin ecꞌ tinaniꞌ.
Tol jaꞌ yet chi woche chi wunen junoj tzetyetal watxꞌ,
jaxa chi wilon an,
jaꞌ tzet man watxꞌoj lalanxa wunen an,
chi wilontej an.
22 Jaꞌ jin pixan an,
caw chi tzala yetoj sley Dios.
23 Yuxan wotaj an,
jaꞌ jun jin mimanil tiꞌ an,
ey junxa jaxca ley chi chejoni,
jaꞌton spenailal.
Jaꞌ chi yakꞌle jowal yetoj jun ley bꞌey chi tzala jin pixan tuꞌ an.
Yuxan,
jaxca tol preso weoc yu jin penail chi chejon jin mimanil tiꞌ an.
24 Caw okꞌbꞌalcꞌule weoc yu an.
Jaꞌ jun jin mimanil tiꞌ,
chin iꞌontoj bꞌey camich yin junelne.
¿Mac mi txequel chi skeꞌ jin scolon el yul skꞌabꞌ jin mimanil tiꞌ?
25 Asan Dios,
yin yakꞌbꞌalnen Naj Kaawil Jesucristo.
Yuxan caw chi wal yu diosalil tet Dios tinaniꞌ,
cꞌal yetoj jin pixan chi wakꞌ servil Dios.
Jal jin pena ochwanil tiꞌ an,
eyoc yakꞌomaloj servil junxa jaxca ley ey cꞌaltaꞌ oc win tuꞌ an,
jaꞌton spenailal.