Cꞌamxa Yalon Yet Spenail Kin
6
¿Tzet cu chi che naꞌ xin?
¿Tumi watxꞌ ta jacꞌalaꞌ kunen spenailal,
yet watxꞌ yel xacꞌal chi yakꞌ Dios mimancꞌulal kin,
catuꞌ chi txeclo el swatxꞌcꞌulal Dios jaxca tuꞌ?
2 Cꞌamaj,
caw ma skeꞌ jaxca tuꞌ.
Jaꞌ yul sat Dios,
camnajxa el cu icham bꞌeybꞌal.
Cꞌamxa yalon yet spenail kin.
Yuxan,
¿tumi jacꞌalaꞌ cu bꞌeybꞌalnen spenail?
Cꞌamaj,
caw ma skeꞌ.
3 Je yotaj xa,
tol jaꞌ yet jix cu akꞌle bautizar junjun jon,
jix txeclo eloj,
tol junxane jix kun can el yetoj Cristo Jesús.
Jaꞌ jun tuꞌ,
jix txꞌoxon eloj,
tol jaxca jix yun scam Cristo,
jaxca tuꞌ jix yun cu cam yetoj.
4 Jaꞌ cu bautismo tuꞌ,
jaꞌ chi txꞌoxon eloj,
tol jix cu cami.
Junxane jix yun cu muji yetoj Cristo.
Yu jun tuꞌ,
yuxan jaxca pax jix yun spitzcꞌu a Cristo xol ebꞌ camnaj yu miman yipalil cu Mam Dios,
jaxca pax tuꞌ jix yun cu pitzcꞌu a pax oj.
Chi yal yeloc apnoj,
tol xax cu chaꞌ jun akꞌ kꞌinale tinaniꞌ.
5 Junxane keoc yetoj Cristo.
Yu jun tuꞌ,
yuxan jaꞌ yet jix cam Cristo,
jaxca tol jix cu cam yetoj.
Jaxa tinaniꞌ,
yu jix pitzcꞌu a Cristo qꞌuey pax tuꞌ oj yun cu pitzcꞌu a yetoj.
6 Kotaj,
jaꞌ cu naꞌbꞌal yet yalantoj,
jaꞌ yul sat Dios,
jix a locan yin teꞌ culus yetoj Cristo,
yet watxꞌ chi qꞌueyle can el cu pena naꞌbꞌal,
jaxca tol jix cami.
Jaxca tuꞌ jix kun can eloj,
yet watxꞌ cꞌamxa chi kakꞌ servil spenailal tinaniꞌ.
7 Yutol jaꞌ mac camnajxa,
cꞌamxa chi oc yul skꞌabꞌ spenailal.
8 Jaon tiꞌ,
camnaj jon xa yetoj Cristo yul sat Dios.
Yuxan,
chi kaoc yin cu cꞌul,
tol oj cu pitzcꞌu a yetoj Cristo yin junelne.
9 Yutol kotaj tol jix pitzcꞌunele a Cristo xol ebꞌ camnaj,
cꞌamxa bꞌakꞌin oj cam junelxa,
yutol cꞌamxa chi oc yul skꞌabꞌ camich.
10 Yutol jaꞌ yet jix cami,
cꞌamxa niꞌoj yeloc apnoj spenailal yul sat yin junelne.
Jaxa tinaniꞌ,
iquis yin junelne,
yu yakꞌon servil Dios.
11 Sowalil chi cu naꞌ tol camnaj jon xa el tet spenailal.
Chi cu naꞌwej pax oj,
tol iquis jon yu kakꞌon servil Dios,
yutol junxane keoc yetoj Cristo,
Naj Kaawil.
12 Yuxan,
cꞌamxa chi cu chaꞌ jun spenailal yakꞌon yaawilal yin cu mimanil.
Cꞌamxa chi kun wan spenail chi koche ocoj.
13 Cꞌam chi skeꞌ kakꞌon cu mimanil yul skꞌabꞌ tzet man watxꞌoj,
catuꞌ chi kunen spenailal.
Sowalil jaꞌ tet Dios chi kakꞌ cu bꞌa yutol jaꞌ yul sat Dios jix cu cami,
jix cu pitzcꞌu pax aoj.
Yuxan kakꞌ cu mimanil tet Dios,
yet watxꞌ asan tzet watxꞌ chi el kunen yetoj cu mimanil.
14 Jaꞌ spenailal cꞌamxa ojabꞌ yalon yet kin,
yutol manxa eyoj jon oc yalan sley Moisés.
Jaxa yalan swatxꞌcꞌulal Dios ey jon ecꞌ tinaniꞌ.
Manxa Yakꞌomaloj Servil Spenailal Keoc Tinaniꞌ
15 Jaꞌ tinaniꞌ xin,
ey jon oc yalan swatxꞌcꞌulal Dios,
manxa yalan oj sley Moisés ey jon ocoj.
¿Tzet mi ẍi je cꞌul?
¿Tumi yuxan,
chi skeꞌ kunen spenailal tinaniꞌ?
Cꞌamaj,
caw cꞌamxa chi skeꞌ.
16 Kotaj ta tol ey junoj mactxequel chi yakꞌ sbꞌa yakꞌomaloj servil junoj winaj,
asan jun tuꞌ ey yalon yet yin naj yin junelne.
Sowalil chi sjije tzet chi yal spatrón tuꞌ.
Quey jon ton tuꞌ xin,
ta tol chi kakꞌ servil spenail,
chi cu jije tzet chi yalaꞌ.
Tutun tol asanne spenail ey jon yet,
catuꞌ oj cu cam yu jun tuꞌ yin junelne.
Ta tol jaꞌ Dios chi kakꞌ servil,
chi cu jije tzet chi yalaꞌ.
Ta jaxca tuꞌ,
asanne Dios ey jon yet,
catuꞌ chi waꞌxi oc cu naꞌbꞌal yu jun tuꞌ.
17 Chi wal yu diosalil tet Dios je yu an.
Yutol caxcꞌal jix je yakꞌ servil spenailal yet yalantoj,
jal tinaniꞌ xin,
lalan je jijen yin masanil je cꞌul wan cuybꞌanile jix je chaꞌ.
18 Jix jex colcha el yul skꞌabꞌ spenail,
manxa yakꞌomaloj servil spenail je yeoc tinaniꞌ,
tol yakꞌomal xa servil sjichanil je yeoc tinaniꞌ.
19 Jaꞌ wan chi waltoj ey jex tiꞌ,
jaxca tol txꞌoxbꞌanile kꞌaneal cꞌal chi wute walontoj ey jex,
yutol jaxca tuꞌ chi naꞌcha el wan cuybꞌanile tiꞌ je yu.
Jaꞌ yet yalantoj,
jix kakꞌ cu bꞌa yakꞌomaloj servil spenailal,
yetoj tzet man watxꞌoj,
yuxan caw cꞌam swatxꞌil jix kute cu bꞌa yet tuꞌ.
Jaxa tinaniꞌ xin,
sowalil jaxca ojabꞌ tuꞌ chi kute kakꞌon cu bꞌa tiꞌ yakꞌomaloj servil swatxꞌil,
yet watxꞌ asan yin Dios chi kaoc cu naꞌbꞌal.
20 Jaꞌ yet jix kakꞌon servil yet yalantoj,
cꞌam yalon yet sjichanil kin yet tuꞌ.
21 ¿Ey mi wal niꞌoj cu ganar yin wan jix kun tuꞌ?
Caw chi cu qꞌuixwi yu wan tuꞌ tinaniꞌ.
Yu cꞌal wan tuꞌ,
yuxan chi too can ebꞌ ánima bꞌey camich yin junelne.
22 Jaxa tinaniꞌ xin,
colbꞌil jon xa el yul skꞌabꞌ spenail tuꞌ.
Cꞌamxa yalon yet kin.
Jix cu oc yakꞌomaloj servil Dios.
Yuxan caw ey cu ganar tinaniꞌ,
yutol yet jon xa Dios,
catuꞌ oj cu chaꞌon pax cu kꞌinal tol ey cꞌal yin tobꞌalkꞌinal.
23 Ta tol jaꞌ spenailal chi kunne,
oj cu chaꞌ stool,
jaꞌton camich yin junelne.
Jal pax jun saꞌbꞌeal Dios chi yakꞌ ey jon xin,
jaꞌton cu kꞌinal tol ey cꞌal yin tobꞌalkꞌinal.
Yutol junxane keoc yetoj Naj Kaawil Cristo Jesús.