Watxꞌ Xa Keoc Yetoj Dios
5
Jaꞌ tinaniꞌ xin,
jix yal Dios,
tol watxꞌ jon yul sat,
yutol chi kaoc cu cꞌul yin,
yuxan ey watxꞌcꞌulal snan cu xol yetoj Dios yu cꞌal Naj Kaawil Jesucristo.
2 Yu Cristo,
yuxan ey kalon ket cu chaꞌon swatxꞌcꞌulal Dios,
yutol chi kaoc cu cꞌul yin.
Yuxan miman swatxꞌcꞌulal chi xꞌox ey jon tinaniꞌ.
Caw chi cu tzalai,
yutol chi kaoc yipoj cu cꞌul,
tol oj tzajlo cu watxꞌil jaxca swatxꞌil Dios.
3 Man asanne oj yu jun tuꞌ yuxan chi cu tzalai,
tzalajonwej pax yet chi kabꞌen syaꞌil tuꞌ.
Yutol kotaj,
tol jaꞌ wan syaꞌilal tuꞌ,
jaꞌ chi cu cam tecꞌbꞌaneni.
4 Yu tecꞌan chi kute cu bꞌa,
yuxan chi tzala Dios ketoj.
Yuxan chi skeꞌ kaon oc Dios yipoj cu cꞌul.
5 Cꞌam bꞌakꞌin oj tac cu cꞌul yu jix kaoc Dios yipoj cu cꞌul,
yutol tzꞌajan chi yute yakꞌon scamcꞌulal Dios yin cu pixan yu Naj Santo Espíritu jix yakꞌ ey jon.
6 Jaꞌ yet yalantoj,
ma skeꞌ kaon oc niꞌoj cu bꞌa yin watxꞌil yul sat Dios.
Cꞌam cu watxꞌil cu masanil bꞌey yul yibꞌankꞌinal tiꞌ.
Jaxa yet jix jul stiempoal jix cam Cristo cu yaꞌiloj.
7 Kꞌinaloj ta ey junoj mac watxꞌ sbꞌeybꞌal tinaniꞌ,
tejan cꞌam mac chi yakꞌ cam sbꞌa yu.
Tejan ta ey junoj mac caw watxꞌ sbꞌeybꞌal,
tejan ey mi junoj mactxequel chi stecꞌbꞌa sbꞌa scam yu.
8 Jal Dios xin,
jix xꞌox smiman scamcꞌulal ey jon yutol jaꞌ Naj Cristo jix yakꞌ cam sbꞌa ku yet caw penawom jon to.
9 Ta jix yun Dios jaxca tuꞌ yet penawom jon to,
jaꞌ tinaniꞌ xin,
watxꞌ jon yul sat Dios,
yutol ku cꞌal jix cam Cristo.
Yu jun tuꞌ,
yuxan caw kotaj,
oj cu colcha el yin jun miman syaꞌtajilal tol oj jul yu sjowal scꞌul Dios.
10 Jaꞌ yet yalantoj,
caxcꞌal acꞌul jon oc yin Dios,
jaxa pax jix yunne,
tol jix cu oc yin watxꞌcꞌulal yetoj,
yutol ku cꞌal yuxan jix cam Scꞌaal Dios.
Jaꞌ tinaniꞌ xin,
watxꞌ xa keoc yetoj,
yu jun tuꞌ,
yuxan kotaj tol oj cu colcha yu Scꞌaal Dios yutol iquis cꞌal ecꞌ Naj.
11 Man asanne oj yu wan tiꞌ,
caw chi cu tzala pax yin Dios yu Naj Kaawil Jesucristo.
Yutol yu Naj,
yuxan watxꞌ xa keoc yetoj Dios tinaniꞌ.
Jaꞌ Naj Adán Yetoj Cristo
12 Yu chꞌan jun winaj,
yuxan jix el yich spenail yul yibꞌankꞌinal tiꞌ.
Jaꞌton naj Adán.
Yu spenail tuꞌ,
yuxan jix el yich camich.
Yuxan jix tit can camich yibꞌan masanil ánima,
yutol jix oc cu penail cu masanil tet Dios.
13 Jaꞌ yet cꞌamto chi akꞌle sley Moisés,
ey xacꞌal spenail ánima chi oc yul sat Dios.
Asan xin,
jaꞌ spenail ebꞌ tuꞌ ma to can yibꞌan ebꞌ,
yutol cꞌamto ley.
14 Jal pax yul stiempoal naj Adán masantaꞌcꞌal jix eltej sley Moisés,
jix cam masanil ebꞌ ánima,
yutol jix oc spenail ebꞌ.
Man laan oj spenail ebꞌ jaxca yet naj Adán,
yutol ma sjije naj tzet jix al-le tet,
sowalil jix cam cꞌal ebꞌ yu spenail tuꞌ.
Jaꞌ naj Adán tuꞌ,
yechel jun mac oj jul yintaj naj.
15 Jaꞌ spenail naj Adán tuꞌ,
caw man laan oj jaxca cu colbꞌanil chi yakꞌ Dios tinaniꞌ.
Yu spenail jun winaj tuꞌ,
yuxan jix tit can camich yibꞌan masanil ánima.
Yu pax chꞌan jun mactxequel,
jaꞌton Naj Jesucristo,
yuxan ecꞌal jon chi cu chaꞌ swatxꞌcꞌulal Dios.
Jaꞌ jun colbꞌanile tuꞌ,
tucꞌal chi el yin scꞌul Dios chi yakꞌoni,
yel xacꞌal miman yeloc apnoj.
16 Jaꞌ spenail jun winaj tuꞌ,
caw man laan oj jaxca jun colbꞌanile chi yakꞌ Dios ey jon.
Yu chꞌan jun spenail jun winaj tuꞌ,
yuxan jix tit can syaꞌtajilal yibꞌan masanil ánima.
Chi yakꞌ pax Dios cu colbꞌanil yin tucꞌal chi el yin scꞌul.
Yutol caxcꞌal caw ey spenail jix el kunen sattaj Dios,
watxꞌ jon pax yul sat Dios tinaniꞌ.
17 Asan yu spenail chꞌan jun winaj,
yuxan jix tit can camich yibꞌan masanil ánima.
Miman jix yun yeloc apnoj jun tuꞌ,
ey wal junxa yel xacꞌal miman yeloc apnoj.
Yu pax chꞌan junxa mactxequel,
jaꞌton Naj Jesucristo,
caw miman swatxꞌcꞌulal Dios jix xꞌox ey jon,
catuꞌ watxꞌ jon yul sat.
Yu jun tuꞌ,
yuxan oj cu chaꞌ kꞌinale tol ey cꞌal yin tobꞌalkꞌinal,
cꞌal koc yaawilal yetoj naj.
18 Yu jun tuꞌ,
yu spenail naj Adán,
yuxan ey can oc syaꞌtajil yibꞌan masanil ánima.
Ey pax jun tzetyetal caw watxꞌ jix waꞌxi yu Naj Jesucristo tet masanil ánima.
Yu jun tuꞌ,
yuxan chi yal Dios,
tol watxꞌ jon yul sat,
catuꞌ chi yakꞌon cu kꞌinal tol ey cꞌal yin tobꞌalkꞌinal.
19 Yu ma sjije jun winaj tuꞌ,
yuxan jix oc can masanil ánima penawomal.
Ey pax chꞌan jun jix jijeni.
Yu sjijemal jun tuꞌ,
yuxan ecꞌal jon ey jon xa oc watxꞌil yul sat Dios.
20 Jix jul sley Moisés,
yet watxꞌ chi a cꞌal can spenail.
Caxcꞌal jix a cꞌal can spenail tuꞌ,
yel xacꞌal pax jix a can swatxꞌcꞌulal Dios tet.
21 Eyoc masanil ánima yul skꞌabꞌ spenail.
Yu yipalil spenail tuꞌ,
yuxan chi cam ebꞌ.
Jal pax swatxꞌcꞌulal Dios xin,
yel xacꞌal caw ey yip.
Yuxan,
watxꞌ jon yul sat tinaniꞌ.
Jaxca tuꞌ jix yute yakꞌon cu kꞌinal tol ey cꞌal yin tobꞌalkꞌinal yin Naj Kaawil Jesucristo.