Swatxꞌ Bꞌeybꞌal Naj Abraham
4
Jaꞌ naj kichmam Abraham,
¿tzet jix yun yeloc apnoj naj yul sat Dios che naꞌ?
2 Watxꞌ naj yul sat Dios,
man pax yu oj tzet watxꞌ jix el yunen naj,
yuxan watxꞌ naj yul sat Dios.
Kꞌinaloj ta yu jun tuꞌ xin,
tejan chi skeꞌ yiꞌon a can sbꞌa naj.
Jal tinaniꞌ,
cꞌam chi skeꞌ yiꞌon a can sbꞌa naj sattaj Dios.
3 Yutol chi yal yul An Juun Tzꞌibꞌebꞌilcan jaxca tiꞌ:
“Jaꞌ naj Abraham jix yaoc yin scꞌul tzet jix yal Dios.
Asan yu jun tuꞌ yuxan jix yal Dios tol watxꞌ naj yul sat,”
ẍi yul An Juun.a
4 Jaꞌ tinaniꞌ,
kꞌinaloj ta chi cu mulna yintaj junoj ánima,
catuꞌ chi cu chaꞌon cu tool.
Jaꞌ cu tool tuꞌ man saꞌbꞌealoj,
yutol sjec xa naj yu cu mulnail tuꞌ.
5 Yuxan jaꞌ Dios,
caxcꞌal cꞌam tzet chi kun yu Dios,
ta tol chi kaoc yin cu cꞌul,
watxꞌ jon yul sat.
Queytuꞌ chi yun junjun penawom yul sat Dios,
ta tol chi yaoc ebꞌ yin scꞌul.
6 Jaꞌ naj rey David,
jix alon can eloj,
tol watxꞌ yet ebꞌ chi al-le watxꞌil yu Dios.
Man yu oj tzet watxꞌ chi el yunen ebꞌ,
yuxan chi yal Dios jaxca tuꞌ.
7 Yalnaj can naj David jaxca tiꞌ:
Jaꞌ ebꞌ chi akꞌle can mimancꞌulal yin spenail yu Dios,
catuꞌ chi joꞌole can qꞌuey spenail ebꞌ tuꞌ,
caw tzalacꞌulal yet ebꞌ.
8 Jaꞌ mac tet chi yal Naj Kaawil tol cꞌamxa spenail ebꞌ yul sat,
caw tzalacꞌulal yet ebꞌ,
ẍi naj David tuꞌ.b
9 Jaꞌ jun tzalacꞌulal chi yal tiꞌ,
man asanne oj yet ebꞌ bꞌey eyoc jun echele chi yij circuncisión yin tuꞌ,
yet pax ebꞌ bꞌey man eyoj oc jun echele tuꞌ yin.
Xax wal ey jex,
tol jaꞌ naj Abraham tuꞌ,
jix yaoc Dios yin scꞌul.
Asan yu jun tuꞌ,
yuxan jix yal Dios tol watxꞌ naj yul sat.
10 Yuxan naꞌwejtej bꞌakꞌini jix yal Dios jaxca tuꞌ.
¿Tumi akꞌbꞌil xa circuncidar* naj Abraham tuꞌ yet jix yalon Dios tuꞌ?
Cꞌamaj,
man to akꞌbꞌil oj circuncidar naj yet jix yalon Dios tuꞌ.
11 Asan yu jix yaoc Dios naj yin scꞌul,
yuxan jix ale oc jun echele tuꞌ yin naj.
Asan tol yu watxꞌ naj yul sat Dios yet cꞌamto chi akꞌle circuncidar,
yuxan mame yeoc naj yin jantaj ebꞌ man akꞌbꞌil oj circuncidar ta tol chi yaoc scꞌul ebꞌ yin Dios.
Jaꞌton ebꞌ tuꞌ,
watxꞌ ebꞌ yul sat Dios jaxca naj Abraham tuꞌ.
12 Yetoj pax oj,
mame yeoc naj yibꞌan ebꞌ akꞌbꞌil circuncidar.
Manaj yu jun echele tuꞌ,
yuxan mame yeoc naj yu ebꞌ,
tol yu chi yaoc scꞌul ebꞌ yin Dios,
jaxca jix yun naj Abraham tuꞌ yet cꞌamto chi akꞌle circuncidar.
Yakꞌnaj Can Stiꞌ Dios Ey jon, Jaon Chi Kaoc Cu Cꞌul Yin
13 Yakꞌnaj can stiꞌ Dios tet naj Abraham yetoj tet ebꞌ yicꞌaal naj,
tol oj yakꞌ jun yul yibꞌankꞌinal tiꞌ tet ebꞌ yin yerencia oj.
Man yu oj jix sjije sley Dios naj yuxan jix yakꞌ can stiꞌ Dios tet naj.
Yu cꞌal tol watxꞌ naj yul sat Dios yu jix yaoc Dios naj yin scꞌul.
14 Kꞌinaloj ta asan tet ebꞌ chi jijen jun ley tuꞌ oj akꞌle tet ebꞌ jun yul yibꞌankꞌinal tiꞌ yu Dios.
Naꞌbꞌacꞌal mi chi kaoc cu cꞌul yin jun tuꞌ,
catuꞌ cꞌam tzet chi oc wan tzet yakꞌnaj can Dios tuꞌ.
15 Yutol jaꞌ jun ley tuꞌ,
jaꞌ chi aon oc syaꞌtajil yibꞌan ánima.
Kꞌinaloj ta cꞌam jun ley tinaniꞌ,
cꞌam mac chi unen spenail tet jun ley tuꞌ.
16-17 Yakꞌnaj can stiꞌ Dios tet naj Abraham,
yutol jix yaoc Dios naj yin scꞌul,
jaxca ton tuꞌ chi yun xeclo eloj,
tol asan yu swatxꞌcꞌulal Dios,
yuxan yakꞌnaj can stiꞌ tet naj,
cꞌal tet masanil ebꞌ yicꞌaal naj.
Man asanne oj ebꞌ chi jijen jun ley tuꞌ ey yet.
Tol ket pax cu masanil yu chi kaoc cu cꞌul yin Dios jaxca jix yun naj Abraham tuꞌ.
Yutol jaxca tol cu mam yeoc naj yul sat Dios,
yutol jix kaoc cu cꞌul yin Dios jaxca jix yun naj tuꞌ.
Jaxca yalon can Dios yul An Juun,
chi yal jaxca tiꞌ:
“Ecꞌal wan conobꞌ oj pitzcꞌu a ja wu,”
ẍi Dios tet naj Abraham.c
Jaꞌ Dios chi akꞌon pitzcꞌu a ebꞌ camnajxa,
catuꞌ asan tol chi yalaꞌ,
catuꞌ chi pitzcꞌu a wan tzetyetal tol cꞌam cꞌaltaꞌa.
18 Jaꞌ yet jix yun naj Abraham jun tiꞌ,
cꞌam niꞌoj tzetyetal chi skeꞌ yaon oc naj yipoj scꞌul,
jix ya cꞌal pax oc Dios naj yin scꞌul.
Jaꞌ tzet albꞌilcan tet naj yu Dios,
jaꞌ jix yaoc naj yipoj scꞌul.
Yuxan ecꞌal wan conobꞌ jix pitzcꞌu can a yicꞌaal oj naj,
jaxca jix yute yalon can Dios tet naj,
yet jix yalon jaxca tiꞌ:
“Jaxca tiꞌ sbꞌisil ebꞌ ja wicꞌaal oj elcanoj,”
ẍi Dios tet naj.d
19 Jaꞌ naj Abraham tuꞌ,
janicꞌxane man cien abꞌil oj jix eqꞌui.
Yotaj tol caw ichamxa naj.
Yotaj pax oj tol man uneꞌwom ix oj ix Sara.
Jacꞌalaꞌ jix yaon oc naj yin scꞌul tzet jix yal Dios tet.
20 Jaꞌ yet jix yakꞌon can stiꞌ Dios tet,
man caabꞌcꞌulal oj jix yute yabꞌeni.
Caw jix yaoc yin scꞌul.
Caw tecꞌan snaꞌbꞌal.
Jix yal watxꞌ kꞌane tet Dios,
21 yutol yotaj naj sicꞌlebꞌil,
tol chi cꞌal skeꞌ yu Dios yunen jaxca yalon tet naj.
22 Yuxan jix yal Dios,
tol watxꞌ naj Abraham tuꞌ yul sat,
yutol jix yaoc yin scꞌul.
23 Tzꞌibꞌebꞌilcan skꞌaneal naj yul An Juun,
tol watxꞌ naj yul sat Dios yutol jix yaoc Dios naj yin scꞌul.
Man asanne oj yu naj jix tzꞌibꞌelecan wan tuꞌ,
24 jix tzꞌibꞌele pax can ku.
Yuxan chi yal Dios tol watxꞌ jon yul sat,
ta tol chi kaoc cu cꞌul yin.
Jaꞌ Dios jix akꞌon pax pitzcꞌu a Naj Kaawil Jesús xol ebꞌ camnaj.
25 Jaꞌ Jesús jix akꞌle cam yu cu penail.
Jix lawi tuꞌ xin,
catuꞌ jix pitzcꞌu aoj yu koc can watxꞌil sattaj Dios yu Jesús.