Yochwan Naj Pablo Chi Colcha El Ebꞌ Yet Israelal
10
Jex wuẍtaj,
jex wanabꞌ,
caw yochwan jin cꞌul chi colcha el ebꞌ wet Israelal.
Chin kꞌan jun tiꞌ tet Dios.
2 Yel toni caw chi yiꞌey sbꞌa ebꞌ yakꞌon servil Dios.
Man pax yotaj oj ebꞌ tzet utbꞌil chi yun yakꞌle servil Dios jaxca chi yoche tuꞌ.
3 Man yotaj oj ebꞌ tzet utbꞌil chi yun yoc ebꞌ watxꞌil yul sat Dios.
Chi yoche ebꞌ chi yaoc sbꞌa ebꞌ watxꞌil yul sat Dios yul yet.
Yuxan cꞌam chi ẍaꞌ scꞌul ebꞌ yoc yin watxꞌil yul sat Dios jaxca chi yoche Dios tuꞌ.
4 Yu Cristo cꞌamxa yalon yet sley Moisés yin yakꞌon waꞌxoj ánima sattaj Dios.
Yutol yal cꞌal mac chi yaoc scꞌul yin Naj,
watxꞌ chi eloc ebꞌ sattaj Dios.
5 Albꞌilcan yu naj Moisés tzet utbꞌil chi kute cu bꞌa,
ta chi koche chi cu oc watxꞌil yul sat Dios yu jun ley tuꞌ.
Chi yal jaxca tiꞌ:
“Ta ey mac chi jijen masanil tzet chi yal ley yin tobꞌalkꞌinal,
oj ẍaꞌ skꞌinal,”
ẍi ley.a
6-7 Jal pax cu colbꞌanil chi cu chaꞌ tiꞌ,
asan yu chi kaoc cu cꞌul yin Cristo,
catuꞌ chi yalon Dios tol watxꞌ jon xa yul sat.
Chi yal yul An Juun jaxca tiꞌ:
“Cꞌam sowalil chi cu too satcan”b yu kiꞌon eytej Cristo yu chi colwa kin,
catuꞌ,
“cꞌam sowalil chi cu eytoj yul txꞌotxꞌ,”c
yu kiꞌon atej Cristo xol ebꞌ camnaj.
8 “Jaꞌ jun skꞌaneal colbꞌanile tiꞌ,
je yotaj xa.
Chi skeꞌ je yalon yetoj je tiꞌ.
Eyxa oc yin je pixan,”
ẍi yul An Juun.d
Jaꞌton jun skꞌaneal tiꞌ chi kaleloj.
Jun chi aloni tol sowalil chi kaoc cu cꞌul yin Cristo.
9 Oj cu colchaoj ta chi kal yetoj cu tiꞌ,
tol jaꞌ Jesús,
Kaawil yin masanil,
catuꞌ chi kaon oc yin cu cꞌul,
tol jaꞌ Dios jix pitzcꞌunen a Jesús xol ebꞌ camnaj,
oj cu colchaoj ta chi kun jaxca tuꞌ.
10 Watxꞌ jon yul sat Dios asan yu chi kaoc cu cꞌul yin Cristo.
Chi cu colchai,
yutol chi kal yetoj cu tiꞌ,
tol jaꞌ Jesucristo,
Kaawil.
11 Chi yal yul An Juun jaxca tiꞌ:
“Jaꞌ mac oj yaoc scꞌul yin Cristo,
man oj somcha el scꞌul yin naj,”
ẍi yul An Juun.e
12 Caxcꞌal Israel jon,
caxcꞌal man Israeloj jon,
laan jon cꞌal yul sat Dios cu masanil.
Yutol jaꞌ Naj Kaawil,
yaaw yeoc kibꞌan cu masanil.
Miman swatxꞌcꞌulal Dios chi yakꞌ tet yal cꞌal mac chi yal sbꞌa tet.
13 Jaxca chi yal yul An Juun:
“Masanil ebꞌ chi yal sbꞌa tet Naj Kaawil,
oj colcha can ebꞌ,”
ẍi yul An Juun.f
14 Jal ebꞌ cꞌamto chi yaoc scꞌul yin Naj Kaawil xin,
¿tzet oj yute yalon sbꞌa ebꞌ tet?
¿Tzet oj yun yaon oc scꞌul ebꞌ yin ta cꞌamto chi yabꞌ skꞌaneal ebꞌ?
Yetoj pax oj,
¿tzet oj yute yabꞌen skꞌaneal ebꞌ ta cꞌam mac chi alon skꞌaneal tet ebꞌ?
15 ¿Tzet mi utbꞌil oj yun stoo ebꞌ yalon el skꞌaneal,
ta cꞌam mac chi chejontoj ebꞌ?
Yuxan chi yal pax yul An Juun jaxca tiꞌ:
“Jaꞌ ebꞌ chi iꞌontoj skꞌaneal tol chi xa skeꞌ koc yin watxꞌcꞌulal yetoj Dios,
catuꞌ chi ecꞌ yalon el watxꞌ kꞌane ebꞌ.
Caw chi ecꞌ akꞌle tzalabꞌoj scꞌul ebꞌ bꞌey chi ecꞌ ebꞌ tuꞌ,”
ẍi yul An Juun.g
16 Man pax masaniloj ebꞌ chi jijen jun skꞌaneal yet colbꞌanile tiꞌ.
Jaxca jix yun yalon can naj Isaías:
“¿Cꞌam mi ebꞌ chi yaoc scꞌul yin jun kꞌane chi kal tiꞌ jon?”
ẍi naj Isaías.h
17 Asan yu chi kabꞌe,
yuxan chi kaoc yin cu cꞌul.
Jaꞌ jun kꞌane chi kabꞌ tiꞌ,
jaꞌton skꞌaneal Cristo.
18 ¿Tzet je chi xin?
Jaꞌ ebꞌ Israel,
¿ma yabꞌ ebꞌ jun skꞌaneal yet colbꞌanile tiꞌ che naꞌ?
Cꞌamaj,
jix yabꞌ ebꞌ masanil.
Yutol queytuꞌ chi yal yul An Juun:
Jaꞌ tzet jix al-le eloj,
jix abꞌle bꞌey masanil sat txꞌotxꞌ tiꞌ.
Jaꞌ jun kꞌane tuꞌ,
jix sajlem yul-laj yibꞌankꞌinal tiꞌ,
ẍi yul An Juun.i
19 Ma pax yaoc ebꞌ yin scꞌul,
¿tzet je chi yin ebꞌ?
¿Ma naꞌcha el jun kꞌane tuꞌ yu ebꞌ Israel tuꞌ che naꞌ?
Jaꞌ naj Moisés jix alon can tzet jix yal Dios tet ebꞌ.
Chi yal jaxca tiꞌ:
Oj wakꞌ chichon oc je cꞌul yin wanxa conobꞌ cꞌam yeloc apnoj.
Yetoj pax oj,
oj jin txꞌemtej je jowal yu tzet oj wakꞌ tet wanxa ánima cꞌam chi naꞌcha el yu,
ẍi Dios yul An Juun.j
20 Jaꞌ naj Isaías,
jix stecꞌbꞌa sbꞌa yalon tzet jix yal Dios tet ebꞌ man Israeloj.
Jix yalon jaxca tiꞌ:
Jaꞌ ebꞌ cꞌam chin seyon ecꞌoj,
jix jin ilcha yu ebꞌ.
Yetoj pax tet ebꞌ cꞌam chin kꞌanlen ecꞌoj,
jix jin txꞌox jin bꞌa tet ebꞌ,
ẍi Dios.k
21 Jaꞌ naj Isaías tuꞌ,
jix yal pax canoj,
tzet jix yal Dios yu ebꞌ yet Israelal.
Chi yal jaxca tiꞌ:
Tobꞌalkꞌinal cꞌal wawtentej ebꞌ Israel jain tiꞌ an,
cꞌam cꞌal niꞌoj chi sjije ebꞌ.
Caw caw snaꞌbꞌal ebꞌ,
ẍi Dios.l