2 Jix apni skꞌanon wan carta bꞌey chi akꞌle yopiso yoctoj yul-laj snail sculto ebꞌ Israel bꞌey conobꞌ Damasco.

Catuꞌ chi smitxꞌontej masanil ebꞌ chi yaoc scꞌul yin Jesús.

Caxcꞌal winaj ma ix,

tucꞌal chi iꞌletej ebꞌ preso yu bꞌey Jerusalén.

3 Yuxan jix toi.

Jaxa yet lalan yapni scawilal conobꞌ Damasco tuꞌ,

ey jun sajkꞌinal jix tit kopna satcan,

jix eyol yibꞌan naj.

4 Jix telcꞌo naj sat txꞌotxꞌ.

Catuꞌ jix yabꞌen yoc jayebꞌ kꞌane tuꞌ.

Jix yalon jayebꞌ kꞌane tuꞌ jaxca tiꞌ:

—Saulo,

Saulo,

¿tzet yuxan chin ja wujte ecꞌoj?

ẍi tet Saulo.

5 —Mamin,

¿mac jaach txequel?

ẍi a naj Saulo tuꞌ tet.

—Jain ton Jesús jin an.

Jain lalan jin ja wetnen an.

/Tol jaach cꞌal oc cha wetne ja bꞌa jaxca junoj noꞌ wacax chi tejle oc teꞌ eel xaam yin,

catuꞌ chi tecꞌwa yin xaam teꞌ tuꞌ,

ẍi Jesús tet.

6 Jaꞌ naj Saulo tuꞌ,

caw jix bꞌilwi a yu xiwcꞌulal.

—Mamin,

¿tzetyetal chi yoche ja cꞌul chi wun an?

ẍi naj tet Jesús.

—Aan linanoj,

catuꞌ chach too yul conobꞌ tiꞌ.

Jatuꞌ oj al-le ey jaach tzet sowalil oj ja wunne,

ẍi Jesús tuꞌ tet naj./

7 Jal ebꞌ yetbꞌi naj Saulo tuꞌ xin,

caw jix sucbꞌi can el scꞌul ebꞌ yu xiwcꞌulal.

Jix yabꞌ ebꞌ yoc jun nukꞌe tuꞌ,

cꞌam cꞌal pax mac jix yil yin ebꞌ.

8 Catuꞌ jix a waan naj Saulo tuꞌ sat txꞌotxꞌ.

Jix sjajon sat yaloni,

jaxca cꞌaltaꞌ chi yunne,

ma xacꞌal skeꞌ pax yilwi.

Jaꞌ ebꞌ yetbꞌi naj tuꞌ jix oc quetzan ebꞌ yin skꞌabꞌ naj.

9 Jaꞌ yet jix apni yul conobꞌ tuꞌ xin,

oxebꞌ cꞌu cꞌam chi ilwi niꞌoj,

catuꞌ cꞌam chi lowi,

cꞌal yuqꞌuen jaꞌ.

10 Jaꞌ bꞌey Damasco tuꞌ xin,

ey jun creyente chi yij Ananías.

Jix yalon Naj Kaawil yin jaxca weyicheal tet naj jaxca tiꞌ:

—Ananías,

ẍi Naj tet.

—Ti ey jin an Mamin,

ẍi naj,

catuꞌ jix takꞌwi Naj Kaawil.

11 —Aan waanoj,

catuꞌ chach toocꞌal yul jun calle chi yij Jichan.

Jaꞌ yet oj jaach apnoj bꞌey sna naj Judas,

catuꞌ cha kꞌanlen tet naj bꞌeytuꞌ eyoc ecꞌ naj Saulo a conobꞌ Tarso.

Lalan xali naj.

12 Ey jun tzetyetal jix jin txꞌox tet.

Jix wakꞌ yilaꞌ,

tol jaach tiꞌ oj jaach apnoj scꞌatan,

catuꞌ oj ja waon atoj ja kꞌabꞌ yibꞌan sjolom,

catuꞌ oj jajcha can sat naj tuꞌ,

ẍi Naj Kaawil tet naj Ananías tuꞌ.

13 Yuxan jix yal naj Ananías tet Naj Kaawil jaxca tiꞌ:

—Mamin,

ecꞌal mac chi alon ey jin an yu naj Saulo tuꞌ.

Jaꞌ bꞌey Jerusalén,

caw miman penacꞌulalil chi yakꞌ yin ebꞌ chi yaoc scꞌul ja win.

14 Tinaniꞌ xin,

jix jul titiꞌ.

Jix akꞌle yopiso yu ebꞌ yaaw yakꞌomal xaambꞌal ey jaach,

catuꞌ chi smitxꞌon masanil ebꞌ chi yiꞌey sbꞌa ey jaach,

ẍi naj Ananías.

15 Catuꞌ jix yalon Naj Kaawil tuꞌ tet naj jaxca tiꞌ:

—Asiꞌ,

yutol jaꞌ naj Saulo tuꞌ,

sicꞌbꞌilxa el naj wu an.

Jaꞌ oj alon el jin kꞌaneal snan xol ebꞌ man Israeloj,

cꞌal tet ebꞌ rey,

yetoj snan xol ebꞌ yet Israelal.

16 Oj wakꞌ yotajne eloj,

tol sowalil oj yil syaꞌilal jin yaꞌilal oj an,

ẍi Naj Kaawil tuꞌ tet naj Ananías.

17 Catuꞌ jix too naj Ananías bꞌey sna naj tuꞌ.

Jaꞌ yet jix apni naj xin,

catuꞌ jix oc yul na.

Jix sbꞌatxbꞌan atoj skꞌabꞌ naj yibꞌan sjolom naj Saulo tuꞌ,

catuꞌ jix yalon jaxca tiꞌ:

—Wuẍtaj Saulo,

jaꞌ Naj Kaawil Jesús jix xꞌoxa sbꞌa ey jaach yul bꞌe yet chach juli.

Jaꞌ jix jin chejontej ey jaach tiꞌ,

yet watxꞌ chach ilwi can aoj,

catuꞌ chi oc can Santo Espíritu ja win,

ẍi naj tet.

18 Jaꞌ yet jun txolan tuꞌ,

jix el tiẍna wan jaxca sol pescado yin sat naj tuꞌ.

Jix ilwi xa a tuꞌ,

jix a linanoj,

19 jix slow xa tuꞌ,

jix oc yip.

Ecꞌal tocꞌal cꞌual jix eecꞌ yetoj ebꞌ creyente a Damasco tuꞌ.

20 Jix ecꞌ naj Saulo tuꞌ yalon el skꞌane Dios yul-laj snail sculto ebꞌ yet Israelal.

Jix yaloni,

tol jaꞌ Jesús,

Scꞌaal ton Dios.

21 Jaꞌ jantaj ebꞌ chi abꞌen yaloni,

tuxa cꞌal chi qꞌueya scꞌul ebꞌ yu,

catuꞌ chi yalon ebꞌ jaxca tiꞌ:

—Jaꞌ jun winaj tiꞌ,

jix ecꞌ etnen jantaj ebꞌ chi yiꞌey sbꞌa tet Jesús bꞌey Jerusalén.

Jaꞌ cu naꞌoni,

tol yu smitxꞌontoj creyente yuxan jix jul titiꞌ.

Catuꞌ chi yiꞌontoj sattaj ebꞌ yaaw yakꞌomal xaambꞌal tet Dios,

ẍi ebꞌ.

22 Jal naj Saulo tuꞌ xin,

tol jix slaoc yip yalon eloj.

Jix txeclo eloj tol yel jaꞌ Jesús jaꞌton Cristo.

* Jal pax ebꞌ a Israel bꞌey Damasco tuꞌ,

cꞌam chi naꞌcha yu ebꞌ,

tzet chi yute spajtzen tet.

23 Tutun caw ecꞌal cꞌual jix ecꞌ naj Saulo bꞌey tituꞌ.

Jix slatiꞌne el sbꞌa ebꞌ Israel yin.

Jix yijbꞌan yal ebꞌ,

tol oj yakꞌ cam Saulo ebꞌ.

24 Chi smaj ebꞌ cꞌualil cꞌal akꞌbꞌalil yul-laj bꞌe stiꞌ conobꞌ,

catuꞌ chi yakꞌon cam naj ebꞌ,

yaloni.

Jix yabꞌ cꞌal pax skꞌumal naj Saulo tzet chi yal ebꞌ yin.

25 Yuxan,

jaꞌ ebꞌ scuywom jix iꞌon el yet akꞌbꞌalil.

Jix yiꞌon eltej Saulo ebꞌ yul jun miman xuc.

Jix ale eltej naj yu ebꞌ yul swentanail smuroal jun conobꞌ tuꞌ.

Jix bꞌejon eytoj tꞌununoj ebꞌ sat jun muro tuꞌ,

catuꞌ queytuꞌ jix yun scolcha naj Saulo.

Catuꞌ jix paxtoj naj Saulo bꞌey Jerusalén.

26 Jaꞌ yet jix apni naj Saulo tuꞌ bꞌey Jerusalén,

chi yoche chi sjunbꞌane sbꞌa yetoj ebꞌ creyente tituꞌ.

Tol caw chi xiwa masanil ebꞌ tet naj.

Ma ẍaꞌ ebꞌ yabꞌe,

ta yel creyente xa naj.

27 Jal naj Bernabé xin,

jaꞌ naj jix iꞌontoj Saulo tuꞌ bꞌey ebꞌ ẍejabꞌ Jesús,

catuꞌ jix yalon tet ebꞌ jaxca tiꞌ:

—Jaꞌ naj Saulo tiꞌ,

jix yil yin Naj Kaawil yul bꞌe.

Jix kꞌanabꞌ yetoj.

Yuxan,

caw jix stecꞌbꞌa sbꞌa yalon el skꞌaneal Jesús bꞌey conobꞌ Damasco tuꞌ,

ẍi naj Bernabé tet ebꞌ.

28 Yuxan jix eyecꞌ naj Saulo tuꞌ bꞌey Jerusalén tuꞌ.

Catuꞌ jix sjunbꞌane sbꞌa yetoj ebꞌ creyente tituꞌ.

29 Caw jix stecꞌbꞌa sbꞌa yalon el skꞌaneal Naj Kaawil.

Jix steele sbꞌa yetoj ebꞌ yet Israelal,

ebꞌ chi alon stiꞌ ebꞌ Griego.

Yuxan jix slatiꞌne sbꞌa ebꞌ tzet chi yute yakꞌon cam naj ebꞌ.

30 Jaꞌ yet jix yabꞌen ebꞌ creyente jaxca tuꞌ xin,

catuꞌ jix iꞌletoj naj Saulo yu ebꞌ bꞌey conobꞌ Cesarea.

Jix apni cꞌal ebꞌ yetoj tituꞌ,

jix ẍejon cantoj Saulo ebꞌ bꞌey conobꞌ Tarso.^a

31 Jaꞌ jun tiempoal tuꞌ,

cꞌam mac jix etnen ebꞌ creyente bꞌey Judea,

cꞌal bꞌey Galilea,

yetoj cꞌal Samaria.

Tecꞌan xacꞌal jix yute sbꞌa ebꞌ.

Ey xiwcꞌulalil ebꞌ tet Naj Kaawil.

Yu scolwal Santo Espíritu yin ebꞌ,

yuxan jix a can sbꞌisil ebꞌ.

32 Jaꞌ junel,

yet eyecꞌ naj Pedro yilon ebꞌ creyente,

jix apni bꞌey ebꞌ creyente bꞌey conobꞌ Lida.

33 Ey jun winaj chi yij Eneas jix yil-le el sbꞌa Pedro yetoj tituꞌ.

Waxajebꞌxa abꞌil stoo telan jun winaj tuꞌ,

yutol sicbꞌinaj el smimanil.

34 Jix yalon Pedro tet naj jaxca tiꞌ:

—Eneas,

jaꞌ Jesucristo lalan yakꞌon waꞌxoj ja cꞌul.

Yuxan,

aan waanoj.

Iꞌa ja weyubꞌ,

ẍi naj Pedro tet naj.

Catuꞌ jix a waan naj yet jun txolan tuꞌ.

35 Jix yil masanil ánima a Lida yetoj ebꞌ a Sarón,

tol jix waꞌxi can naj.

Yuxan jix sqꞌuexbꞌa sbꞌeybꞌal ebꞌ,

catuꞌ jix yaon oc snaꞌbꞌal ebꞌ yin Naj Kaawil.

36 Jaꞌ bꞌey conobꞌ Jope,

ey jun ix creyente chi yij Tabitá.

Jaꞌ yin Griego,

Dorcas sbꞌi ix.

Ecꞌal tzet watxꞌ jix el yunen ix.

Jix colwa yin ebꞌ mebꞌa.

37 Jix michꞌcha cꞌal pax oc ix yu jun yaꞌbꞌil,

catuꞌ jix cam ix.

Jix bꞌijle can el smimanil ix,

catuꞌ jix iꞌle atoj smimanil tuꞌ bꞌey jun cuarto naat eyaoj.

38 Jaꞌ jun conobꞌ chi yij Jope tuꞌ,

scawilal conobꞌ Lida,

bꞌey eyecꞌ naj Pedro.

Jaꞌ yet jix yabꞌen ebꞌ creyente tol jatuꞌ eyecꞌ Pedro,

jix ẍejontoj cawan winaj ebꞌ scꞌatan,

jix bꞌet yalon ebꞌ tet jaxca tiꞌ:

—Toon ketoj bꞌey Jope yin eymanil,

ẍi ebꞌ tet naj.

39 Jix too naj yetoj ebꞌ tuꞌ.

Jix apni cꞌal xin,

jix yiꞌon atoj ebꞌ bꞌey jun cuarto naat eyaoj,

bꞌey eyecꞌ smimanil ix Dorcas tuꞌ.

Ey wan ebꞌ ix ix camnajxa yichamil eecꞌ yiloni.

Masanil ebꞌ chi okꞌ yu.

Ey spichil ebꞌ cꞌal scamiẍ ebꞌ jix swaꞌne ix Dorcas tuꞌ yet iquis ix yetoj ebꞌ.

Catuꞌ jix cꞌoli xꞌoxon ebꞌ tet Pedro.

40 Catuꞌ jix chejle eytej ebꞌ yu naj Pedro.

Catuꞌ jix ey kaan naj,

catuꞌ jix txali.

Jix oc tꞌanan yin ix Dorcas tuꞌ,

catuꞌ jix yalon tet ix jaxca tiꞌ:

—Tabitá,

aan waanoj,

ẍi naj tet ix.

Catuꞌ jix jajcha sat ix.

Jaꞌ yet jix yilon naj Pedro tuꞌ ix,

jaxa ya chotan ix tuꞌ.

41 Jix oc mitxꞌan naj Pedro yin skꞌabꞌ ix,

catuꞌ jix quetzle a linan ix yu naj.

Catuꞌ jix awtele atoj ebꞌ ix camnajxa yichamil tuꞌ,

cꞌal wanxa ebꞌ creyente.

Jix txꞌoxle eltej ix yu Pedro tuꞌ yil ebꞌ.

Jix yil ebꞌ tol jix pitzcꞌu a ix.

42 Masanil ebꞌ a Jope tuꞌ jix yabꞌ skꞌumal jun tiꞌ.

Yuxan,

ecꞌal ebꞌ jix yaoc scꞌul yin Naj Kaawil.

43 Jal naj Pedro tuꞌ xin,

jix can jayebꞌ xa cꞌu bꞌey Jope tuꞌ.

Jatuꞌ jix eyecꞌ bꞌey sna jun winaj waꞌnem tzꞌuum,

chi yij Simón.