Manaj Yu Chex Al-le Watxꞌil Yu Tzet Che Yun Tet Ebꞌ Ánima, yuxan Che Yun Wan Swatxꞌil Tuꞌ
6
Che yil cꞌal je bꞌa.
Man ojabꞌ asanne oj sattaj ebꞌ ánima,
watxꞌ che yute je bꞌa.
Ta asanne sattaj ebꞌ,
watxꞌ che yute je bꞌa,
cꞌam niꞌoj spaj oj je chaꞌ tet cu Mam eyecꞌ bꞌey satcan.
2 Yuxan,
jaꞌ yet che yakꞌon niꞌoj je saꞌbꞌeal tet junoj mebꞌa,
manche je yalel xol ánima jaxca chi yute sbꞌa ebꞌ caabꞌ sat.
Yutol jaꞌ ebꞌ tuꞌ,
chi xꞌox xacꞌal el ebꞌ yul-laj snail yambꞌabꞌail yin culto,
cꞌal yul-laj calle,
yet watxꞌ chi al-le ebꞌ watxꞌil yu ánima.
Caw yel chi wal ey jex,
jaꞌ wan watxꞌ kꞌane chi al-le yin ebꞌ tuꞌ,
chi oc spajtzebꞌaloj ebꞌ.
3 Jal jex jaex tiꞌ xin,
jaꞌ ojabꞌ yet che yakꞌon niꞌoj tzetyetal tet ebꞌ mebꞌa,
ma skeꞌ je yalon tet ánima.
Caxcꞌal tet mac yel xacꞌal watxꞌ je yakꞌon yetoj,
manche je yal tet ebꞌ.
4 Akꞌwej je saꞌbꞌeal tuꞌ yin ewantajil.
Caxcꞌal yin ewantajil che yakꞌa,
jaꞌ cu Mam Dios chi iloni,
catuꞌ oj spajtzen ey jex.
Chi Yaltej Jesús Tzet Utbꞌil Chi Yun Cu Txali
5 Jaꞌ yet chex txali,
manche je yute je bꞌa jaxca ebꞌ caabꞌ sat.
Yutol,
jaꞌ ebꞌ caabꞌ sat tuꞌ,
caw chi ẍaꞌ scꞌul ebꞌ xali yul-laj snail yambꞌabꞌail yin culto,
cꞌal bꞌey chi syambꞌa sbꞌa ebꞌ ánima,
yet watxꞌ chi al-le ebꞌ watxꞌil yu ebꞌ ánima.
Caw yel chi wal ey jex,
jaꞌton wan watxꞌ kꞌane chi al-le yin ebꞌ tuꞌ,
chi oc spajtzebꞌaloj ebꞌ.
6 Jal jex jaex tiꞌ xin,
jaꞌ yet chex txali,
ocanwejtoj yul je na je txꞌojli.
Che majchen je puerta,
catuꞌ chex txali tet cu Mam Dios,
Jaꞌ eecꞌ je yetoj,
caxcꞌal cꞌam che yil yin.
Caxcꞌal cꞌam mac chi ilon je txali,
oj yabꞌ cꞌaltaꞌ Dios catuꞌ oj pajtzele je txa tuꞌ yu Dios.
7 Jaꞌ yet chex txali tuꞌ,
man ojabꞌ jacꞌalaꞌ cꞌal oj tzet che yalaꞌ,
jaxca ebꞌ man to otajnenoj Dios.
Yutol jaꞌ ebꞌ tuꞌ,
jaꞌ snaꞌon ebꞌ tol yu miman chi yute yajan xa ebꞌ,
yuxan oj abꞌle ebꞌ yu Dios.
8 Yuxan,
manche je yute je bꞌa jaxca ebꞌ tuꞌ xin.
Yutol yotaj xa cu Mam Dios tzet caw sowalil chi oc je yu,
yet cꞌamto che kꞌan tet.
9 Yuxan,
queytuꞌ che yute txaloj je bꞌa jaxca tiꞌ:
Mamin,
ey jaach ecꞌ bꞌey satcan.
Miman ojabꞌ yeloc apnoj ja bꞌi.
10 Titan ja wakꞌ Yaawilal titiꞌ.
Jaxca ojabꞌ yunen tzet cha woche bꞌey satcan tuꞌ,
quey ojabꞌ tuꞌ chi yun sat txꞌotxꞌ tiꞌ.
11 Akꞌ cu loꞌbꞌe oj cu loꞌ yet junjun cꞌu jon.
12 Akꞌ mimancꞌulal kibꞌan yu cu penail,
jaxca chi kute kakꞌon mimancꞌulal yibꞌan ebꞌ ey tzet chi cu uteni.
13 Manche jon ja chaꞌ ijbꞌaletoj yin spenail.
Catuꞌ chon ja colon pax el yul skꞌabꞌ jun yaawil spenail.
/Yutol asan jaach Yaaw jaach tobꞌalkꞌinal.
Catuꞌ miman ja wopiso,
catuꞌ miman pax ja weloc apnoj.
Amén./
14 Ta che yakꞌ mimancꞌulal yin ebꞌ ey tzet chex uten jaex tiꞌ,
oj akꞌle pax mimancꞌulal yin je penail yu cu Mam Dios eyecꞌ bꞌey satcan.
15 Asan ta cꞌam che yakꞌ mimancꞌulal yin ebꞌ ey tzet chex uten tuꞌ xin,
ma yakꞌ cꞌal pax mimancꞌulal cu Mam Dios yin je penail.
Chi Yaltej Jesús Yu Yet Chi Kijlen Nocha Cu Bꞌa
16 Jaꞌ yet che yijle nocha je bꞌa,
* manche je yute je bꞌa jaxca ebꞌ caabꞌ sat.
Yutol jaꞌ ebꞌ tuꞌ,
cusiltaj xacꞌal chi yute sat ebꞌ,
yet watxꞌ chi txeclo el sattaj ánima tol lalan yijlen nocha sbꞌa ebꞌ.
Caw yel chi wal ey jex,
tol jaꞌton yu chi il-le ebꞌ yu ebꞌ ánima tuꞌ,
jaꞌton chi oc spajtzebꞌaloj tet ebꞌ,
catuꞌ cꞌamxa spajtzebꞌal ebꞌ oj ẍaꞌ tet Dios.
17 Jal jex jaex tiꞌ xin,
jaꞌ yet che yijle nocha je bꞌa,
tzalacꞌulal yoc je sat,
cꞌal sakꞌal che yute je mimanil,
18 yet watxꞌ cꞌam chi naꞌcha el yu ánima ta jaex lalan je yijlen nocha je bꞌa.
Jaxca tuꞌ xin,
asan cu Mam Dios otajneni tol lalan je yijlen nocha je bꞌa.
Oj pajtzele ey jex yu Dios yu che yun jaxca tuꞌ.
Bꞌeomal Bꞌey Satcan
19 Manche je yambꞌa je bꞌeomal yul yibꞌankꞌinal tiꞌ,
yutol chi iibꞌitoj,
chi kꞌuxbꞌitoj,
ma chi too yu elkꞌom.
20 Yel watxꞌ jaꞌ bꞌey satcan che yambꞌatoj je bꞌeomal.
Jaꞌ bꞌey satcan tuꞌ,
cꞌam chi oc yiꞌal,
cꞌam chi kꞌuxbꞌitoj,
cꞌamxa pax elkꞌom chi elkꞌanentoj.
21 Yutol jaꞌ bꞌey chi cu yambꞌatoj cu bꞌeomal,
jatuꞌ chi ka pax toj cu naꞌbꞌal.
Skꞌaneal Jun Tzejtebꞌal
22 Jaꞌ sbꞌakꞌ cu sat jaxca tol stzejtebꞌal cu mimanil yei.
Yuxan,
ta watxꞌ tzet bꞌey eyoc cu sat,
sajkꞌinal jon toni,
catuꞌ watxꞌ cꞌal tzet chi el kunen yetoj cu mimanil.
23 Asan ta jaex,
pena bꞌey che yaoc je sat,
chex can xol kꞌejkꞌinal yu.
Ta cꞌam je sajkꞌinal xin,
oj jex can xacꞌal can xol jun miman kꞌejkꞌinal.
Jaꞌ Dios Chi Teynen Ebꞌ Yuninal Xa
24 Cꞌam junoj mactxequel chi skeꞌ jun laan cꞌal yakꞌon servil cawanoj spatrón.
Yutol jaꞌ naj chi scajle sbꞌa yetoj junoj,
catuꞌ chi scamcꞌulne sbꞌa pax yetoj junojxa.
Ey junoj chi sjije naj tzet chi yalaꞌ,
catuꞌ junojxa cꞌam yeloc apnoj yul sat naj.
Yuxan cꞌam chi skeꞌ jun laan je camcꞌulnen je yakꞌon servil Dios cꞌal je camcꞌulnen chꞌen tumin.
25 Yuxan chi wal ey jex,
tol manche jex oc il yu je cawil titiꞌ,
yu je loꞌbꞌe,
cꞌal yu je pichil.
Ta chi yakꞌ Dios cu cawil,
¿tumi jato wal cu loꞌbꞌe man oj yakꞌa?
Ta jix yakꞌ Dios cu mimanil,
¿tumi jato wal cu pichil man oj yakꞌa?
26 Ilaꞌ noꞌ tzꞌiquin chi ecꞌ jenenoj satcan.
Cꞌam yawo noꞌ.
Cꞌam sjatxꞌo noꞌ.
Toj ey tzet chi syambꞌa can noꞌ.
Jaꞌ cu Mam Dios ey bꞌey satcan,
jaꞌ chi akꞌon sloꞌbꞌe noꞌ.
Ilaꞌ tax chi yakꞌ sloꞌbꞌe noꞌ tzꞌiquin tuꞌ,
oj yakꞌ pax ey jex tol yel xacꞌal miman je yeloc apnoj yintaj noꞌ yul sat Dios.
27 ¿Ma ey junoj jex chi skeꞌ je yaon oc junojxa cꞌu yakꞌil je kꞌinal yu che yakꞌ bꞌiscꞌulal yin?
28 Yetoj pax oj,
¿tzet yuxan chex oc bꞌiscꞌulal yu je pichil?
Naꞌtej yin an xumac cꞌultaj tinaniꞌ.
Jaꞌ an xumac teꞌ tuꞌ,
cꞌam chi mulna an,
cꞌam chi mulna an tam wal chi skeꞌ xꞌalwi an.
29 Yu tuꞌ xin,
chi wal ey jex,
caxcꞌal caw sakꞌal yili spichil naj rey Salomón* jix yaocoj,
asan xin ma cꞌaltaꞌ apnoj yili jaxca an xumac teꞌ tuꞌ.
30 Caw sakꞌal yili an xumac teꞌ tuꞌ yu Dios.
Tol watxꞌ yili an tinaniꞌ,
jaxa yecal xin,
chi tajeloj,
catuꞌ jaꞌ yet tajnajxa eloj,
catuꞌ chi tzꞌaꞌi.
¿Tumi man oj jex pichle yu Dios?
Jaex cꞌam che yaoc Dios yin je cꞌul.
31 Yuxan,
manche jex oc bꞌiscꞌulal yu bꞌey chi tit je loꞌbꞌe cꞌal yu tzet che yuqꞌueꞌ,
yetoj pax yu je pichil.
32 Jaꞌ ebꞌ man otajnenoj Dios,
caw chi yakꞌ bꞌiscꞌulal ebꞌ seyon ecꞌ wan tzetyetal tuꞌ.
Jal jon pax xin,
jaꞌ cu Mam Dios ey bꞌey satcan yotaj xa tol caw chi oc yopiso wan tiꞌ ku.
33 Yuxan akꞌwej je yip je yaon oc je bꞌa yul skꞌabꞌ cu Mam Dios sicꞌlebꞌil.
Catuꞌ watxꞌ cꞌal che yute je bꞌeybꞌal jaxca chi yoche scꞌul.
Ta oj je yun jaxca chi wal tiꞌ,
oj yakꞌ masanil wan tzetyetal tiꞌ ey jex.
34 Yuxan,
manche jex oc bꞌiscꞌulal yu tzet ey jex yecal,
yutol man je yotaj oj tzet iꞌbꞌil oc yu jun cꞌu yet yecal tuꞌ,
yuxan ma skeꞌ je yoc bꞌiscꞌulal yu.
Kꞌojbꞌil cꞌal che naoꞌtane yin tzettaj yetal iꞌbꞌil oc yu junjun cꞌu.