Swatxꞌil Yili Acꞌ Templo
2
Jaꞌ yet 21 yoc yet sjuj xꞌaaw, jaꞌ yet tuꞌ, jix kꞌanabꞌ Jehová tet jun ẍejabꞌ chi yij Hageo. 2 Jix yaloni, tol chi al-le tet Zorobabel, cꞌal tet Josué yetoj cꞌal pax tet masanil ebꞌ ánima: 3 Jaꞌ mac jex je yilnaj to yin jun templo yet yalantoj, yetoj cꞌal swatxꞌil yili, yal ojabꞌi, ta tol laan yili yetoj jun ket tiꞌ tinaniꞌ. ¿Cꞌam mi che naꞌ tol cꞌam niꞌoj yeloc apnoj, ta chi cu laanbꞌane yetoj jun tuꞌ? 4 Jaach Zorobabel, jaach Josué tol sat yakꞌomal xaambꞌal jaach. Yetoj cꞌal jantaj jex conobꞌ; cꞌam ojabꞌ che yakꞌ caabꞌcꞌulal. Mulnaanwej, yutol jain caw Jehová Yaaw jin yibꞌan masanil, ey jin cꞌal ecꞌ je yetoj. 5 Ey cꞌal oc Wespíritu je yetoj jatacꞌalaꞌ jix yun wakꞌon can jin tiꞌ yet jix jex wiꞌon eltej bꞌey txꞌotxꞌ Egipto, yuxan cꞌam cꞌal chex xiwi. 6 Jain Jehová jin chi walaꞌ, tol niꞌanxane catuꞌ oj wakꞌon bꞌilwoj a satcan, cꞌal yul yibꞌankꞌinal tiꞌ, jaꞌ mar yetoj cꞌal txꞌotxꞌ txꞌotxꞌ. 7 Oj wakꞌ bꞌilwoj masanil nacionlaj, queytuꞌ oj yun yiꞌontej sbꞌeomal ebꞌ bꞌey jin templo. Jain caw Jehová Yaaw jin chi walaꞌ, tol oj no xacꞌal el jun templo tiꞌ yu tzetyetal watxꞌ yili. 8 Jain ey wet chꞌen plata cꞌal chꞌen oro. 9 Jain caw Jehová Yaaw jin yibꞌan Masanil chi walaꞌ, tol jaꞌ jun jin templo tiꞌ, yel xacꞌal miman oj yun sbꞌinalei yintaj jun yet sbꞌabꞌelal. Jaꞌ titiꞌ oj wakꞌ jin watxꞌcꞌulal tet ebꞌ jin conobꞌ, ẍi Dios.Jaꞌ Dios Chi Stenchane Ebꞌ Sconobꞌ
10 Jaꞌ yet 24 yoc yet sbꞌalonebꞌ xꞌaaw, jacꞌal oc yet scaabꞌ abꞌil yoc naj Darío yin reyal, jaꞌ yet tuꞌ jix kꞌanabꞌ Jehová tet jun ẍejabꞌ chi yij Hageo, jix yalon jaxca tiꞌ: 11 Kꞌanle tet ebꞌ yakꞌomal xaambꞌal tzet chi yal ley. 12 Kꞌinaloj ta ey junoj winaj iꞌbꞌil oc niꞌoj chiꞌbꞌe yu, tol pichan oc yul spichil, tol wet yeoc noꞌ chiꞌbꞌe tuꞌ, yutol jix akꞌle yin xaambꞌalil. Ta jaꞌ stiꞌ spichil tuꞌ chi low tenna yin ixim pan, yin junoj taanaj loꞌbꞌe, yin vino, ma yin aceite, ma yin yal cꞌal tzet loꞌbꞌeal. ¿Jam yu jun tuꞌ wet xacꞌal chi yun can wan loꞌbꞌe tuꞌ? ja chi tet ebꞌ yakꞌomal xaambꞌal, ẍi Dios. Cꞌamaj, ẍi ebꞌ yakꞌomal xaambꞌal. 13 Jix oc cꞌal ian Hageo tuꞌ skꞌanabꞌi, jix yalon jaxca tiꞌ: Kꞌinaloj ta ey junoj mactxequel man sajoj yul sat ley, yutol jix smitxꞌ junoj mimanile tol camnajxa, catuꞌ chi smitxꞌon cꞌal pax wan tzetyetal jix kal tuꞌ: ¿Chim cancan wan tuꞌ yin man sajoj, jatacꞌalaꞌ yalon ley? ẍi naj Hageo. Jix takꞌwi ebꞌ, jix yalon ebꞌ jaxca tiꞌ: Yel toni, ẍi ebꞌ yakꞌomal xaambꞌal tuꞌ.
14 Jix lawi tuꞌ, jix yalon Hageo: Queyton tuꞌ yalon Jehová: Jaxca wal tuꞌ yeoc wan ánima tiꞌ; jaꞌ masanil tzet chi yun ebꞌ, cꞌal tzet chi yakꞌ ebꞌ ey jin, junelne man sajoj. 15 Jaꞌ tinaniꞌ, naꞌwej ton abꞌi, tzet utbꞌil je yeoc yet cꞌamto che chaꞌel yich je caꞌ waꞌnen a jin templo tiꞌ. 16 Ilaꞌ yet ey mac jix too iꞌontej 20 echbꞌal tiriw yaloni, jaxa yet jix apni oc bꞌey cꞌuan, asanxane 10 echbꞌal ixim eyecꞌoj. Ey cꞌal pax mac jix too bꞌey chi waꞌxi vino yet chi too yiꞌontej junoj 50 mooc vino yaloni, jaꞌ yet jix yiꞌontej, asanne 20 mooc jix yiꞌatej. 17 Jain tiꞌ jix wakꞌ lawoj ey masanil sat je yawo yetoj yaꞌbꞌil, cꞌal yetoj sajbꞌat; ma pax jex meltzotej ey jin. 18 Jaꞌ yet jun cꞌu tiꞌ 24 yoc yet sbꞌalonebꞌ xꞌaaw, jaꞌton yet jun cꞌual tiꞌ, jix je yaey yich jin templo. 19 Jal tinaniꞌ xin, chi cam wal je yilon tzet oj yun je yeloc yet oj jex bꞌey cꞌaltoj. Caxcꞌal cꞌamxa tiriw chi can bꞌey cꞌuan, cꞌal an uva, yetoj cꞌal teꞌ higo, yetoj teꞌ granada, cꞌal teꞌ olivo, cꞌamto chi yakꞌ sat teꞌ, jaꞌ tinaniꞌ cꞌal yet oj bꞌey cꞌaltoj, oj wakꞌ jin yaxilal je yibꞌan, ẍi Jehová, ẍi naj Hageo.
Jix Yakꞌ Stiꞌ Jehová Tet Naj Zorobabel
20 Jacꞌalaꞌ yet jun cꞌual tuꞌ, jix kꞌanabꞌ Jehová tet naj Hageo: 21 Jix yaloni, tol chi yal tet Zorobabel naj eyoc yin gobernadoral bꞌey Judá jaxca tiꞌ: Jain oj wakꞌ bꞌilwoj satcan, cꞌal txꞌotxꞌ txꞌotxꞌ tiꞌ. 22 Oj wakꞌ lawoj ey masanil yipalil wan nacionlaj yul yibꞌankꞌinal tiꞌ, catuꞌ oj jin kꞌojon ey masanil ebꞌ eyoc yin yopiso. Oj jin makꞌa pacꞌlabꞌoj masanil carruaje yet jowal, cꞌal yetoj ebꞌ eyoc yul. Oj cam noꞌ che, yetoj cꞌal mac eyoc yibꞌan noꞌ; junjun cꞌal oj tzokꞌle cam yu mac jaꞌjun yetoj. 23 Jain Jehová Yaaw jin chi wal ey jaach, jaach jin chejabꞌ Zorobabel, scꞌaal Salatiel, tol jaꞌ yet jun cꞌual tuꞌ, oj waoc ja wopiso jaxca jin sello yet wopiso, yutol jain jix jaach jin sicꞌ eloj, ẍi Jehová, ja chi tet, ẍi Dios tet naj Hageo.