Chi Yiꞌle Pax Sbꞌa Naj Oseas Yetoj Yistil
3
Jix yalon Jehová ey jin jaxca tiꞌ: Camcꞌulne pax ix ja wistil junelxa,caxcꞌal chi mulwi ix yetoj mac chi yoche. Jaxca tuꞌ chi yun jin camcꞌulne ebꞌ ja wet Israelal, caxcꞌal chi yaoc snaꞌbꞌal ebꞌ yin wan comon dios, cꞌal yiꞌontoj tajin uva ebꞌ yin ofrendail tet wan comon dios tuꞌ, ẍi Dios.
2 Catuꞌ jix jin toolanen el sjec ix yin 15 siclo chꞌen tumin plata, yetoj canebꞌ quintal ixim cebada, yu yoc ix wistiloj junelxa.
3 Catuꞌ jix walon tet ix jaxca tiꞌ: Oj jaach caey cꞌal ecꞌ wetoj bꞌey jin na; cꞌam ojabꞌxa cha sey ja mul yul jin kꞌabꞌ, man oj jaach toj yetoj junojxa winaj. Tam wal jain tiꞌ, cꞌam cꞌal pax chi kiꞌle cu bꞌa, jin chi tet ix.
4 Queyton tuꞌ yeoc ebꞌ conobꞌ Israel, naatil oj eecꞌ ebꞌ yin cꞌam sreyal eyocoj, cꞌam cꞌal junoj syaawil ebꞌ eyocoj, cꞌamxa chi yakꞌ xaambꞌal ebꞌ tet Dios, tam wal chꞌen chꞌen yaꞌ yili yu ebꞌ, cꞌamxa an pichile yet ebꞌ yakꞌomal xaambꞌal, tam wal eyto octoj yechel comon dios bꞌey junjun nail ebꞌ.
5 Oj lawoj tuꞌ xin, jaꞌ yet slawubꞌ cꞌual, oj meltzo ebꞌ Israel seyon ecꞌ Jehová sDiosal, cꞌal ẍaꞌon junoj yicꞌaal David ebꞌ, yet chi oc sreyaloj ebꞌ. Queytuꞌ oj yun yiꞌon ey sbꞌa ebꞌ sattaj Jehová, cꞌal ẍaꞌon syaaxilal Dios ebꞌ.