2 Yal cꞌal bꞌeytuꞌ eyoc jex ecꞌ bꞌey txꞌotxꞌ tzalquiltaj ma yul-laj bꞌe, yetoj cꞌal bꞌey chi ẍaꞌle sbꞌa bꞌe,

3 yetoj cꞌal bꞌey spuertail conobꞌ, chex awtele cꞌal pax tituꞌ.

4 Je masanil jex ánima bꞌey masanil yul yibꞌankꞌinal tiꞌ, abꞌwej.

5 Jex achꞌe tol cꞌamto je naꞌbꞌal, cuywej je bꞌa yin jelanil, cꞌal jex pena je naꞌbꞌal, seywej ecꞌ watxꞌ naꞌbꞌale.

6 Abꞌwej sicꞌlebꞌil, tol oj al-le wan tzetyetal tol miman yeloc apnoj ey jex, manxa jantajoj swatxꞌil.

7 Jaꞌ wan cuybꞌanile oj al-le tuꞌ, caw yel, cꞌam tzetyetal tucꞌal chi naꞌle aoj.

8 Jaꞌ masanil wan kꞌane tiꞌ, watxꞌ cꞌal eloj; cꞌam niꞌoj lekꞌtiꞌal eyoc xol.

9 Jaꞌ mactxequel jelan snaꞌbꞌal, chi naꞌcha el wan jin kꞌane tiꞌ yu. Jaꞌ ebꞌ ey snaꞌbꞌal, yotaj ebꞌ tzet chi yal yeloc apnoj.

10 Akꞌwej je yip je cuyon jelanil, cꞌal sjelanil je naꞌbꞌal, yutol miman yeloc apnoj yintaj chꞌen oro cꞌal chꞌen plata.

11 Yel xacꞌal watxꞌ jelanilal yintaj chꞌen chꞌen tol watxꞌ yili cꞌal yintaj junojxa tzetyetal tol caw ochebꞌil.

12 Jaꞌ jelanilal, yetbꞌi cꞌal sbꞌa yetoj watxꞌ naꞌbꞌale. Chi yakꞌ kotajne eloj tzet chi yun kiꞌon bꞌey cu naꞌbꞌal.

13 Ta tol ey yeloc apnoj Jehová yul cu sat, sowalil chi cu bꞌejcan pena bꞌeybꞌale, sowalil chi kiꞌel cu bꞌa xol spenail. Ta jelan cu naꞌbꞌal, cꞌam ojabꞌ chi cu meyne cu bꞌa, tam wal mimejtaj chi kute cu bꞌa. Cꞌam ojabꞌ chi kaoc cu naꞌbꞌal yin pena bꞌeybꞌale cꞌal yin lekꞌtiꞌal.

14 Jaꞌ Jehová chi alon jaxca tiꞌ: Jaꞌ yul jin kꞌabꞌ ey masanil jelanil, yuxan chi skeꞌ je naꞌon junoj tzetyetal yin swatxꞌil, chi cꞌal yiꞌ sbꞌa tzet che waꞌne.

15 Jaꞌ yu jelanilal tuꞌ, yuxan chi yakꞌ yaawil ebꞌ rey, chi yalon el ebꞌ eyoc yin yaawilal tuꞌ, tol jaꞌ jin ley jichan ton yeocoj.

16 Ta jelan snaꞌbꞌal ebꞌ eyoc yin yaawil yul conobꞌ, caw chi skeꞌ steynen conobꞌ ebꞌ, watxꞌ chi yute ebꞌ swaꞌnen yeoc junoj jowal chi a xol ebꞌ ánima.

17 Jaꞌ mactxequel chi seyon jelanilal chi ilcha oc yu; jaꞌ mactxequel chi ocheni, chi chꞌibꞌ snaꞌbꞌal yu, jaꞌ mac chin camcꞌulneni, jain xa oj jin camcꞌulne, ẍi Dios.

18 Yu jelanil tuꞌ, chi oc junoj mactxequel yin bꞌeomal, caw chi bꞌinalei, catuꞌ miman yeloc apnoj.

19 Jaꞌ jelanil, yel xacꞌal watxꞌ yintaj chꞌen oro, cꞌal yintaj chꞌen plata tol watxꞌ scawxi.

20 Yu jelanilal tuꞌ, yuxan ey jon oc yin watxꞌ bꞌeybꞌale, cꞌal yin sjichanil.

21 Jaꞌ mactxequel chi camcꞌulnen Jehová, chi akꞌle bꞌeomal tet ebꞌ. Caw oj noel yul sna ebꞌ yu masanil tzetyetal watxꞌ.

22 Jaꞌ Jehová jix akꞌon can jelanil yet tax cꞌamto chi el yich swaꞌxi masanil tzetyetal yul yibꞌankꞌinal tiꞌ,

23 yet cꞌamto chi waꞌnele txꞌotxꞌ txꞌotxꞌ tiꞌ,

24 yet cꞌamto chi waꞌxi jaꞌ mimej mar, yet cꞌam tocꞌal chi aol jaꞌ mimej snukꞌ jaꞌ, cꞌal jaꞌ niẍtej snukꞌ jaꞌ,

25 yet cꞌam tocꞌal chi waꞌnele txꞌotxꞌ tzalquiltaj, cꞌal yetoj txꞌotxꞌ mimej wonan, eyxa cꞌaltaꞌ ecꞌ jun jelanil tuꞌ.

26 Jaꞌ jelanil tuꞌ, eyxa cꞌaltaꞌ yet cꞌamto chi waꞌnele txꞌotxꞌ txꞌotxꞌ tiꞌ yu Jehová, yet cꞌam tocꞌal spojojal jun yul yibꞌankꞌinal tiꞌ.

27 Jaꞌ yet jix jenbꞌaletoj satcan yu Jehová, masantaꞌcꞌal bꞌey chi ẍaꞌle sbꞌa yetoj jaꞌ miman mar, eyxa cꞌaltaꞌ ecꞌ Dios yetoj cꞌal jelanil tuꞌ.

28 Jaꞌ yet jix waꞌnele asun bꞌey satcan yu Jehová, catuꞌ jix smitxꞌon can oc tucan snukꞌ jaꞌ mar,

29 jaꞌ yet jix yalon tet jaꞌ mar tuꞌ, tol cꞌam chi el jaꞌ bꞌey ey can ey smoonal jaꞌ, yet jix yaon can ey sbꞌatxlubꞌal yich txꞌotxꞌ txꞌotxꞌ tiꞌ, eyxa cꞌaltaꞌ ecꞌ jun jelanil tuꞌ.

30 Jaꞌ yetoj sjelanil Dios jix swaꞌne masanil tzettaj yetal. Caw jix tzala Naj yu tzetyetal jix swaꞌne tuꞌ, yutol jaꞌ chi txꞌoxon el sjelanil.

31 Jix tzala yetoj yul yibꞌankꞌinal tiꞌ, cꞌal yu ebꞌ ánima jix swaꞌne.

32 Jaꞌ tinaniꞌ jex wuninal, abꞌwej tzet chi al-le ey jex, bꞌeybꞌalnewej jin bꞌeybꞌal, yet watxꞌ ey cꞌal je tzalacꞌulal.

33 Chaꞌwej je yabꞌ cuybꞌanile, cꞌam ojabꞌ che yintajne el jelanil.

34 Caw tzalacꞌulal yet mactxequel chi cam yabꞌen skꞌaneal yet jelanil,

35 yutol jaꞌ mactxequel chi ilcha jelanil yu, chi ilcha cꞌal pax skꞌinal, catuꞌ chi ilcha oc syaaxilal Jehová yu.

36 Jal mactxequel cꞌam chi ẍaꞌ yabꞌ skꞌaneal yet jelanil, jacꞌal oc chi yiꞌtej syaꞌtajilal yibꞌan. Jaꞌ mactxequel chi yintajne el jelanil tuꞌ, jaxca tol jaꞌ scamichal chi yoche.