Ta jaach tiꞌ yetoj ebꞌ ja wuninal cꞌal ebꞌ yicꞌaal Leví,

ta ey junoj jex chi oc je penail bꞌey jin calubꞌal,

yu cꞌal spenail junoj mactxequel tuꞌ,

oj jul syaꞌilal ja wibꞌan yetoj ebꞌ ja wuninal,

yutol chi oc je penail jin sattaj yin je yopiso,

yutol yakꞌomal xaambꞌal je yeocoj.

2 Jal pax ebꞌ ja wicꞌaal yetoj ebꞌ yicꞌaal Leví,

watxꞌ chi colwa ebꞌ ja wetoj yetoj ebꞌ ja cꞌaal,

yet chex mulna yin je yopiso bꞌey jun Kꞌap Na yetoj cꞌal teꞌ scaẍail jin chejbꞌanil.

3 Jaꞌton ebꞌ chi mulna ja wetoj bꞌey snail jin calubꞌal,

asan xin,

txequelne yeoc bꞌey watxꞌ chi colwa ebꞌ.

Cꞌam chi skeꞌ yoc ebꞌ scawilal wan mitxꞌkꞌabꞌe bꞌey snail jin calubꞌal,

cꞌal bꞌey yet xaambꞌal,

ta cꞌamaj oj cam ebꞌ,

yetoj pax jex jaex tiꞌ.

4 Jaꞌjun ebꞌ chi mulna je yetoj,

asan xin,

jaex che yal tzet chi yun ebꞌ,

yet chi swaꞌnen jun mulnail tuꞌ ebꞌ bꞌey snail jin calubꞌal bꞌey chin chaꞌle jin bꞌa je yetoj,

cꞌam junojxa comon ánima chi skeꞌ yapni oc je cawilal.

5 Asanne jaex tiꞌ eyoc je yibꞌan je waꞌnen masanil mulnail bꞌey snail yet xaambꞌal tuꞌ,

yet watxꞌ man oj tit jin jowal yin ebꞌ conobꞌ Israel.

6 Jain tiꞌ,

jix jin poꞌocan el ebꞌ Levita xol ebꞌ je yet Israelal,

yet chi wakꞌon ebꞌ ey jex,

yet chi mulna ebꞌ je yetoj bꞌey snail bꞌey chin chaꞌle jin bꞌa je yetoj.

7 Jal jaach,

jaach tiꞌ yetoj ebꞌ ja cꞌaal,

asanne jex chex oc yin jun opiso tuꞌ yet che yakꞌon xaambꞌal ey jin,

cꞌal bꞌey yintaj octoj an cortina eyocoj.

Jaꞌ jun mulnail chi wal tuꞌ,

asanne jex chi skeꞌ je yilontoj,

yutol jain jix wakꞌ jun opiso tiꞌ ey jex.

Ta ey junoj comon cꞌal chi yaoc sbꞌa yin jun opiso tiꞌ,

ta man sicꞌbꞌiloj oc yin yakꞌon xaambꞌal,

jaꞌ jun tuꞌ chi cami,

ẍi Dios.

8 Jix yalon Jehová tet naj Aarón jaxca tiꞌ:

Jain jix waoc ja wopiso yu ja chaꞌon wan saꞌbꞌeal ebꞌ Israel chi yakꞌ ey jin.

Jaꞌ wan saꞌbꞌeal ebꞌ conobꞌ chi yakꞌ ey jin,

chi wakꞌ ebꞌ ey jaach yetoj tet ebꞌ ja cꞌaal,

yu je mulnail che yun ey jin.

Jaꞌ jun chejbꞌanile tiꞌ,

ley chi yun can ey jex yin junelne.

9 Masanil ixim jarina chi akꞌle yin ofrendail yu ebꞌ Israel,

jaꞌton wan tol cꞌam chi tzꞌaꞌi,

je yet chi yun can ocoj,

jaxca ofrenda yin ixim tiriw,

cꞌal xaambꞌal yu yakꞌle tan spenail,

cꞌal xaambꞌal yu stooloj spenail ebꞌ.

10 Masanil ebꞌ winaj je xol,

chi skeꞌ ẍiꞌon wan xaambꞌal tuꞌ ebꞌ,

asan xin,

jaꞌ tituꞌ chi ẍiꞌ ebꞌ bꞌey junoj lugar tol wet yeocoj.

Yutol jaꞌ ey jin chi akꞌle wan xaambꞌal tuꞌ.

11 Chi wakꞌ cꞌal pax ey jaach yetoj tet ebꞌ ja wuninal cꞌal tet ebꞌ ja wicꞌaal,

jaꞌton wan ofrenda caw watxꞌ chi yiꞌtej ebꞌ ja wet Israelal tiꞌ jin sattaj.

Jaꞌ jun chejbꞌanile tiꞌ,

ley chi yun can ey jex;

yal cꞌal mactxequel ebꞌ caan ecꞌ ja wetoj ta tol watxꞌ yeocoj jaxca yalon jin chejbꞌanil,

chi skeꞌ sloꞌon wan xaambꞌal tuꞌ ebꞌ.

12 Catuꞌ chi wakꞌon cꞌal pax bꞌabꞌel sat awo ey jaach,

jaꞌton wan chi yakꞌ ebꞌ Israel ey jin yin junjun abꞌil:

Jaꞌton aceite olivo caw wal watxꞌ,

yal uva yetoj cꞌal ixim tiriw caw wal watxꞌ,

13 yetoj cꞌal pax bꞌabꞌel sat awo chi yiꞌtej ebꞌ ánima ey jin.

Jaꞌ wan tuꞌ ja wet chi yun can oc yetoj ebꞌ ja wuninal cꞌal masanil ebꞌ caan ja wetoj.

Asantane tol watxꞌ yeoc ebꞌ jaxca yalon jin chejbꞌanil,

chi skeꞌ sloꞌon ebꞌ.

14 Masanil ofrenda chi yakꞌ ebꞌ Israel ey jin,

ja wet chi yun can ocoj.

15 Masanil sbꞌabꞌel winaj unin ebꞌ ja wet Israelal cꞌal yetoj sbꞌabꞌel yuneꞌ sjobꞌbꞌeal noꞌ ebꞌ,

tol chi yakꞌ ebꞌ ey jin,

je yet cꞌal pax chi yun can ocoj.

Asan xin,

ta yu ebꞌ bꞌabꞌel winaj unin tuꞌ,

yetoj cꞌal sbꞌabꞌel yuneꞌ noꞌ jobꞌbꞌeal noꞌ tol cꞌam chi oc cꞌaltaꞌ yin xaambꞌal,

jaꞌ chꞌen tumin chi yakꞌ ebꞌ sqꞌuexeloj.

16 Junxa xꞌaaw yali ebꞌ unin tuꞌ,

catuꞌ chi stoolane ebꞌ yin tuminal,

chi yakꞌ joebꞌoj siclo chꞌen tumin plata ebꞌ,

jatacꞌalaꞌ chꞌen chi kꞌanle bꞌey snail jin calubꞌal.

17 Cꞌam chi skeꞌ ja qꞌuexon ecꞌ noꞌ bꞌabꞌel yuneꞌ wacax,

noꞌ meꞌ cꞌal noꞌ chiw.

Yutol jaꞌ wan noꞌ noꞌ tuꞌ,

wet yeocoj,

yuxan sowalil che makꞌ cam noꞌ,

catuꞌ che secon ey ẍiqꞌuil noꞌ yibꞌan jun yet xaambꞌal,

jaxa ẍepuꞌal che yakꞌ tzꞌaꞌoj yet chi oc yin ofrendail,

caw watxꞌ yoc sabꞌ chi wabꞌe.

18 Jaꞌ noꞌ ẍiꞌbꞌeal,

ja wet chi yun can masanil noꞌ xaamscꞌul cꞌal sbꞌajil xubꞌ bꞌey swatxꞌ noꞌ,

yetoj wan ofrenda chi bꞌatxle oc sattaj jun yet xaambꞌal tuꞌ.

19 Jaꞌ masanil scolwal ebꞌ ja wet Israelal chi spoꞌoeloj tol wet yeocoj,

chi wakꞌ pax ey jaach,

cꞌal tet ebꞌ ja wuninal,

yetoj tet masanil ebꞌ eyecꞌ ja wetoj.

Jaꞌ jun jin kꞌane chi wal can ey jex tiꞌ cꞌam bꞌakꞌin chi qꞌuexle junelxa,

tol oj wun jaxca chi yun walon can ey jaach yetoj cꞌal tet ebꞌ ja wicꞌaal,

ẍi Dios.

20 Jix yalon Jehová tet naj Aarón jaxca tiꞌ:

Jaach tiꞌ,

cꞌam ja walon ja wet yin xꞌotxꞌ ebꞌ ja wet Israelal,

yutol jaach tiꞌ jaxca tol ja majul weoc xol ebꞌ ja wet Israelal tiꞌ.

21 Jaꞌ tet ebꞌ Levita tuꞌ,

jaꞌ tituꞌ jix wakꞌcan masanil sdiezmoal sat yawo ebꞌ ja wet Israelal.

Jaꞌton eyoc stooloj masanil smulnail ebꞌ chi swaꞌne bꞌey snail bꞌey chin chaꞌle jin bꞌa je yetoj.

22 Jaxa masanil wanxa ebꞌ ja wet Israelal,

cꞌam chi skeꞌ comon cꞌal chi apni oc ebꞌ scawilal jun na bꞌey chin chaꞌle jin bꞌa je yetoj,

ta cꞌamaj chi oc spenail ebꞌ,

catuꞌ oj cam ebꞌ tituꞌ.

23 Yu tuꞌ xin,

asan ebꞌ Levita ey yalon yet swaꞌnen jun mulnail tuꞌ,

ta ey bꞌey chi oc spenail ebꞌ yin smulnail tuꞌ,

chi tit yibꞌan ebꞌ;

jaꞌ jun tiꞌ ley chi yun can ey jex.

Jaꞌ ebꞌ Levita cꞌam xꞌotxꞌ ebꞌ oj ẍaꞌ xol ebꞌ je yet Israelal tiꞌ.

24 Yuxan tol yet ebꞌ yeoc masanil sdiezmoal sat yawo ebꞌ Israel chi yakꞌ ey jin;

yuxan jix walaꞌ tol cꞌam yalon yet ebꞌ ẍaꞌon xꞌotxꞌ tet ebꞌ Israel,

ẍi Dios.

25 Jix yalon pax Jehová tet naj Moisés jaxca tiꞌ:

26 Al tet masanil ebꞌ Levita:

Jaꞌ yet oj ẍaꞌon masanil sdiezmoal smulnail ebꞌ je yet Israelal tiꞌ,

sowalil chi yiꞌel sdiezmoal wan diezmo tuꞌ ebꞌ,

yet chi yakꞌon ebꞌ ey jin.

Yutol jaꞌ wan tuꞌ eyoc smajuloj ebꞌ.

27 Jaꞌ jun diezmo chi yakꞌ ebꞌ tuꞌ,

laan jaxca sdiezmoal ixim tiriw cꞌal yal teꞌ uva chi yakꞌ ebꞌ conobꞌ Israel yin smulnail.

28 Jaꞌ wan diezmo chi yakꞌ ebꞌ je yet Israelal tuꞌ,

jaꞌ yin chi yiꞌel sdiezmo ebꞌ Levita chi yakꞌ ey jin an,

jaxa tet Aarón naj yakꞌomal xaambꞌal,

jaꞌ tet naj chi yakꞌ jun saꞌbꞌeal ebꞌ tuꞌ.

29 Yuxan jaꞌ masanil tzetyetal chi akꞌle ey jex,

sowalil che poꞌocan el junoj tujan yin,

yet che yakꞌon ey jin;

jaꞌ jun tujan che yakꞌ ey jin tuꞌ,

jaꞌ ojabꞌ caw swatxꞌil che sicꞌ can el xol.

30 Al tet ebꞌ:

Jaꞌ yet xax yiꞌcan el ebꞌ tzet chi yakꞌ ey jin,

jal jantaj to chi cani,

jaxa ebꞌ chi naꞌoni tzet chi yute,

jaxca chi yun junoj mactxequel yetoj stiriw cꞌal yetoj yal uva.

31 Chi xa skeꞌ je loꞌon yetoj ebꞌ je yuninal yal cꞌal bꞌeytuꞌ eyoc jex ecꞌoj;

yutol je tool yeocoj,

yutol chex mulna bꞌey snail jin calubꞌal bꞌey chin chaꞌle jin bꞌa je yetoj.

32 Jaꞌ yet xax je poꞌocan el jun tujan wan caw watxꞌ tuꞌ ey jin,

chi xa skeꞌ je loꞌon jantaj to chi cani.

Jaꞌ jun tuꞌ man penaoj,

ta jaxca tuꞌ,

cꞌam che yetnetoj yofrenda ebꞌ je yet Israelal tol wet yeocoj,

yuxan cꞌam chi jul camich je yibꞌan,

ẍi Dios.