2 Iꞌa sbꞌisil ebꞌ Levita yin xolilal,

jaꞌton ebꞌ yicꞌaal Quehat,

3 chi el yich yin ebꞌ 30 abꞌil skꞌinal,

catuꞌ chi apni oc yin ebꞌ 50 abꞌil skꞌinal,

jaꞌton ebꞌ caw smoo yoc yin yakꞌwi servil bꞌey jun Kꞌap Na bꞌey chin chaꞌle jin bꞌa je yetoj.

4 Jaꞌ smulnail ebꞌ yicꞌaal Quehat,

jaꞌton wan tiꞌ:

Tol chi steyne wan tzetyetal ebꞌ tol wet yeocoj.

5 Jaꞌ yet chi a waan ebꞌ conobꞌ yet chi too ebꞌ,

jaach Aarón jaach tiꞌ yetoj ebꞌ ja cꞌaal,

jaex oj je yiꞌel an kꞌap eyoc smajiloj jun Lugar Tol Asan Jin Ey Wet Jin Txꞌojli,

catuꞌ che majchen el teꞌ Scaẍail Jin Wa Kꞌane yetoj an.

6 Chi lawi tuꞌ,

che yaon oc jun tzꞌuum caw labꞌabꞌi xacꞌal yin smajiloj,

jaxa yibꞌan tuꞌ che yaoc jun an kꞌejweinaj kꞌap,

catuꞌ che yaon oc teꞌ sbꞌatxlubꞌal yet chi iꞌletoj.

7 Che yaon cꞌal pax toj jun an kꞌejweinaj kꞌap yibꞌan jun meẍa eey jin sattaj,

jaxa yibꞌan tuꞌ che yaey wanoj chꞌen plato,

cꞌal wan chꞌen mimej cuchara,

cꞌal secꞌ yetoj cꞌal wan ẍalu yet yal uva chi akꞌle yin ofrendail,

yetoj cꞌal ixim pan chi akꞌle cꞌaltaꞌa.

8 Jaꞌ yibꞌan masanil wan tuꞌ che yaatoj jun an cajin kꞌap,

catuꞌ che majchen ey yetoj jun tzꞌuum tol labꞌabꞌi xacꞌal tuꞌ,

che yaon cꞌal pax oc teꞌ sbꞌatxbꞌal yet chi iꞌletoj.

9 Chi lawi tuꞌ,

che yiꞌon cꞌal pax tej junxa an kꞌejweinaj kꞌap,

catuꞌ che majchen el jun sbꞌatxlubꞌal tzejtebꞌal cꞌal yetoj wan tzejtebꞌal,

cꞌal chꞌen chꞌen chi iꞌon el staanil smechail,

cꞌal wan niẍtej plato,

yetoj cꞌal masanil neet chi kꞌanle yetoj aceite.

10 Masanil wan tuꞌ che majche el yetoj jun tzꞌuum tol chi labꞌabꞌi xacꞌal tuꞌ,

catuꞌ che yaon oc yibꞌan wan teꞌ sbꞌatxlubꞌal yet chi skeꞌ yiꞌletoj.

11 Catuꞌ che yaon cꞌal pax toj junxa an kꞌejweinaj kꞌap yibꞌan jun sneetal xaambꞌal tol oro cꞌal eloj.

Che pichon ey yetoj wan noꞌ tzꞌuum labꞌabꞌi xacꞌal,

catuꞌ che yaon cꞌal pax oc steꞌal yet chi bꞌatxletoj.

12 Catuꞌ che cꞌubꞌan a masanil mitxꞌkꞌabꞌe chi kꞌanle bꞌey yul snail jin calubꞌal tuꞌ,

che pichon oc yul jun an kꞌejweinaj kꞌap,

che yaon cꞌal pax oc wanxa labꞌabꞌi tzꞌuum yin,

che yaon oc yibꞌan teꞌ sbꞌatxlubꞌal tuꞌ.

13 Sowalil che yiꞌel jantaj ẍepuꞌ tol calan ye yetoj stikꞌakꞌil taan eey bꞌey yet xaambꞌal tuꞌ,

chi lawi tuꞌ che majchen el yetoj jun an púrpura kꞌap.

14 Jaxa yibꞌan oj ale ey masanil tzettaj yetal chi kꞌanbꞌalnele bꞌey yet xaambꞌal tuꞌ:

Jaꞌton sneetal stzakꞌakꞌ cꞌal wan chꞌen slutxbꞌanil stzakꞌakꞌ,

chꞌen pala,

cꞌal mimej secꞌ,

yetoj cꞌal masanil smitxꞌkꞌabꞌeal jun yet xaambꞌal tuꞌ.

Jaꞌ yibꞌan masanil wan tuꞌ chi ale atoj noꞌ tzꞌuum labꞌabꞌi xacꞌal tuꞌ yibꞌan,

che yaon cꞌal pax oc teꞌ teꞌ yet chi bꞌatxletoj.

15 Jaꞌ yet chi lawi je pichon ey masanil wan tzetyetal tol miman yeloc apnoj tuꞌ,

watxꞌ xa yeocoj yet chi iꞌletoj,

catuꞌ oj tit ebꞌ yicꞌaal naj Quehat,

yet chi yiꞌontoj masanil wan tzettaj yetal tiꞌ ebꞌ.

Jaꞌ masanil wan tzetyetal tol wet yeoc tuꞌ,

cꞌam chi skeꞌ smitxꞌon ebꞌ,

yet watxꞌ cꞌam chi cam ebꞌ.

Masanil jantaj mitxꞌkꞌabꞌe eyoctoj yul jun kꞌap na bꞌey chin chaꞌle jin bꞌa je yetoj,

jaꞌ ebꞌ yicꞌaal naj Quehat,

sowalil jaꞌ ebꞌ chi iꞌontoj.

16 Jaꞌ naj Eleazar,

naj scꞌaal Aarón yakꞌomal xaambꞌal ey jin,

jaꞌ chi ilon yaceiteal yet tzejtebꞌal chi kꞌanlei,

yetoj teꞌ incienso tol sukꞌukꞌi yoc sabꞌ,

yetoj cꞌal ofrenda yin ixim tiriw tol sowalil chi akꞌle ey jin,

yetoj cꞌal aceite olivo chi kꞌanbꞌalnele yet chi sicꞌle oc junoj mactxequel yet chi oc can wetoj,

ma junojxa tzetyetal.

Jaꞌ chi teynen snail jin calubꞌal yetoj cꞌal masanil mitxꞌkꞌabꞌe,

ẍi Jehová.

17 Jix yalon pax Jehová tet naj Moisés cꞌal tet naj Aarón jaxca tiꞌ:

18 Cꞌam ojabꞌ chi qꞌueyel ebꞌ yicꞌaal naj Quehat xol ebꞌ Levita,

19 yet watxꞌ man comonoj chi cam ebꞌ yet chi smitxꞌon junoj tzetyetal ebꞌ tol wet yeocoj,

sowalil che bꞌeybꞌalne wan tiꞌ:

Jaach Aarón,

yetoj ebꞌ ja cꞌaal sowalil chex octoj yetoj ebꞌ yul snail jin calubꞌal;

jaex tiꞌ che yal tet junjun ebꞌ,

tzetyetal chi yiꞌtej ebꞌ cꞌal tzetyetal oj yun junjun ebꞌ.

20 Yuxan ma skeꞌ yoctoj junoj txolan ebꞌ yu yilon yin wan tzetyetal tol wet yeocoj,

yet watxꞌ cꞌam chi cam ebꞌ yu,

ẍi Dios.

21 Jix yalon pax Jehová tet naj Moisés jaxca tiꞌ:

22 Iꞌa sbꞌisil ebꞌ yicꞌaal Guersón yin xolilal,

23 chi el yich yin ebꞌ 30 abꞌil skꞌinal,

catuꞌ chi apni oc yin ebꞌ 50 abꞌil,

jaꞌton ebꞌ tiꞌ smoo yoc yopiso yin yoc ebꞌ yakꞌon servil bꞌey jun kꞌap na bꞌey chin chaꞌle jin bꞌa je yetoj.

24 Jaꞌton smulnail ebꞌ yicꞌaal naj Guersón tiꞌ:

25 Jaꞌ ebꞌ tiꞌ sowalil chi iꞌontoj an kꞌap chi oc smajiloj yibꞌan snail jin calubꞌal,

yetoj caabꞌxa jenan an smajil yibꞌan,

yetoj noꞌ tzꞌuum labꞌabꞌi xacꞌal eyoc smajiloj yibꞌan,

yetoj cꞌal an cortina eyoc bꞌey smajil stiꞌ bꞌey chi cu octoj;

26 yetoj cꞌal an cortina eyoc yinlaj yamakꞌil sattaj snail jin calubꞌal,

cꞌal yinlaj jun yet xaambꞌal,

yetoj cꞌal an kꞌap eyoc bꞌey smajiloj snail jin calubꞌal yetoj jun yet xaambꞌal,

yetoj mitxꞌkꞌabꞌe,

cꞌal jantaj xꞌanil eyoc yet chi oc yin yopiso tuꞌ.

27 Jaach Aarón yetoj cꞌal ebꞌ ja cꞌaal,

jaex oj je yijbꞌa masanil ebꞌ yicꞌaal Guersón,

jatacꞌalaꞌ tzet mulnail oj yun ebꞌ cꞌal yiꞌontoj tzetyetal ebꞌ tol chi iꞌletoj,

jaex tiꞌ oj je yalaꞌ tzet oj yiꞌtoj junjun ebꞌ.

28 Jaꞌton wal yopiso ebꞌ yicꞌaal Guersón tiꞌ,

yet oj mulna ebꞌ bꞌey jun kꞌap na bꞌey chin chaꞌle jin bꞌa je yetoj;

sjije ojabꞌ masanil ebꞌ tzet chi yal Itamar,

naj scꞌaal Aarón tuꞌ.

29 Cha wiꞌon pax a sbꞌisil ebꞌ yicꞌaal Merarí yin xolilal,

30 jaꞌton ebꞌ eyxa 30 abꞌil skꞌinal,

chi apni oc yin 50 abꞌil,

jaꞌton ebꞌ smoo yoc yopiso yin yakꞌon servil bꞌey jun kꞌap na bꞌey chin chaꞌle jin bꞌa je yetoj.

31 Jaꞌ smulnail ebꞌ,

jaꞌton yiꞌontoj masanil steꞌal jun kꞌap na,

jaꞌton teꞌ chemteꞌ,

sreglail,

yoyal,

cꞌal sbꞌatxlubꞌal,

32 masanil yoyal joyan oc yinlaj sattaj eltoj stiꞌ snail jin calubꞌal,

yetoj sbꞌatxlubꞌal,

cꞌal xꞌanil chi kꞌanbꞌalnele yet eyoc yin yopiso.

Jaex tiꞌ che yalaꞌ tzetyetal sowalil chi yiꞌtoj junjun ebꞌ.

33 Jaꞌ jun mulnail tiꞌ,

chi can yul skꞌabꞌ ebꞌ yicꞌaal Merarí;

jaꞌ naj ja cꞌaal Itamar oj alon tzet chi yun junjun ebꞌ,

ẍi Jehová.

34-48 Jaꞌ naj Moisés,

naj Aarón yetoj cꞌal ebꞌ syaawil conobꞌ,

jaꞌ ebꞌ jix iꞌon a sbꞌisil ebꞌ yicꞌaal Quehat yin xolilal.

Jaꞌ masanil ebꞌ winaj,

jix iꞌle a sbꞌisil tuꞌ,

ey 2,750 ebꞌ yin masanil.

Jaꞌ sbꞌisil ebꞌ yicꞌaal Guersón yin xolilal,

ey 2,630 ebꞌ yin masanil.

Jaꞌ sbꞌisil ebꞌ yicꞌaal Merarí yin xolilal,

ey 3,200 ebꞌ yin masanil.

Yu tuꞌ xin,

jaꞌ sbꞌisil ebꞌ Levita jix tzꞌibꞌcha sbꞌi yin masanil,

ey 8,580 ebꞌ winaj.

Jaꞌton ebꞌ eyoc yin 30 abꞌil skꞌinal,

chi apni oc yin 50 abꞌil,

jaꞌton ebꞌ smoo chi mulna bꞌey jun Kꞌap Na bꞌey chi cu chaꞌle cu bꞌa je yetoj,

ẍi Jehová.

49 Jix lawi yiꞌle a sbꞌisil ebꞌ winaj tuꞌ,

catuꞌ jix al-le tet ebꞌ tzet sowalil oj yun junjun ebꞌ,

yetoj cꞌal tzet smoo yiꞌontoj ebꞌ,

jaxca jix yun yalon Jehová tet naj Moisés.