Xolilal Yeoc Jun Kꞌap Na
2
Jix kꞌanabꞌ Jehová yetoj naj Moisés cꞌal yetoj naj Aarón jaxca tiꞌ:
2 Jaꞌ yet oj swaꞌnen ey bꞌulan sbꞌa ebꞌ Israel bꞌey sat junoj txꞌotxꞌ txꞌotxꞌ,
naat ta wal oj el ebꞌ yinlaj jun Kꞌap Na bꞌey chin chaꞌle jin bꞌa je yetoj;
junjun cꞌal icꞌaaleal oj yun scaey ecꞌ ebꞌ yalan sbandera.
3 Jaꞌ yetcꞌulal bꞌey chi aol cꞌu,
jaꞌ tituꞌ oj caey ecꞌ ebꞌ soldado inen oc sbanderail ebꞌ yicꞌaal Judá.
Jaꞌ ebꞌ akꞌom jowal xol ebꞌ yicꞌaal naj Judá tuꞌ,
jaꞌton Nahasón,
scꞌaal Aminadab,
jaꞌ eyoc syaawiloj ebꞌ.
4 Jaꞌ sbꞌisil ebꞌ yin masanil,
ey 74,600 ebꞌ akꞌom jowal tuꞌ.
5 Jaꞌ yetoj ebꞌ tuꞌ,
jatuꞌ oj ey bꞌulan ebꞌ yicꞌaal Isacar.
Jaꞌ Natanael,
scꞌaal Suar,
jaꞌ eyoc yaawiloj xol ebꞌ.
6 Jaꞌ sbꞌisil ebꞌ yin masanil,
ey 54,400 ebꞌ akꞌom jowal tuꞌ.
7 Jatuꞌ oj ey bꞌulan ebꞌ yicꞌaal Zabulón yetoj ebꞌ.
Jaꞌ Eliab,
scꞌaal Helón,
jaꞌ eyoc syaawiloj ebꞌ.
8 Jaꞌ sbꞌisil ebꞌ akꞌom jowal tuꞌ,
ey 57,400 ebꞌ yin masanil.
9 Yuxan jaꞌ bꞌey bꞌulan ecꞌ ebꞌ a Judá tuꞌ,
ey 186,400 ebꞌ soldado tuꞌ.
Jaꞌton ebꞌ bꞌabꞌel stoo sattaj ebꞌ conobꞌ Israel.
10 Jaxa bꞌey yetcꞌulal sur,
jaꞌ tituꞌ oj ey bꞌulan ebꞌ yicꞌaal Rubén,
iꞌbꞌil oc sbandera ebꞌ yu.
Jaꞌ ebꞌ akꞌom jowal xol ebꞌ yicꞌaal naj Rubén,
jaꞌton Elisur,
scꞌaal Sedeúr,
jaꞌ eyoc syaawiloj ebꞌ soldado tuꞌ.
11 Jaꞌ sbꞌisil ebꞌ yin masanil,
ey 46,500 ebꞌ soldado tuꞌ.
12 Junne pax oj ey bꞌulan ebꞌ yicꞌaal Simeón yetoj ebꞌ.
Jaꞌ Selumiel scꞌaal Surisadai,
jaꞌ eyoc syaawiloj ebꞌ.
13 Jaꞌ sbꞌisil ebꞌ yin masanil,
ey 59,300 ebꞌ soldado tuꞌ.
14 Jatuꞌ oj ey bꞌulan ebꞌ yicꞌaal Gad yetoj ebꞌ.
Jaꞌ Eliasaf,
scꞌaal Reuel,
jaꞌ eyoc syaawiloj ebꞌ.
15 Jaꞌ sbꞌisil ebꞌ yin masanil,
ey 45,650 ebꞌ soldado tuꞌ.
16 Yuxan jaꞌ bꞌey oj ey bꞌulan ebꞌ yicꞌaal Rubén tuꞌ,
ey 151,450 ebꞌ soldado tuꞌ,
jaꞌton ebꞌ yet scaabꞌ tujan.
17 Jaxa ebꞌ yicꞌaal naj Leví,
jatuꞌ chi bꞌey stoo ebꞌ snan xol canebꞌ tujan bꞌey bꞌulan jex ey tuꞌ.
Jaꞌton ebꞌ inen oc jun Kꞌap Na bꞌey chin chaꞌle jin bꞌa je yetoj.
Jaꞌ canebꞌ bꞌulan ebꞌ tuꞌ,
yin ojabꞌ xolilal chi yun sbꞌeytoj,
jatacꞌalaꞌ yeoc bꞌey bꞌulan ecꞌ ebꞌ tuꞌ,
junjun cꞌal yalan sbandera.
18 Jaxa yetcꞌulal bꞌey chi too cꞌu,
jaꞌ tituꞌ oj ey bꞌulan ebꞌ yicꞌaal Efraín iꞌbꞌil oc sbandera ebꞌ yu.
Jaꞌ ebꞌ akꞌom jowal xol ebꞌ yicꞌaal Efraín,
jaꞌton Elisamá,
scꞌaal Amihud,
jaꞌ eyoc syaawiloj ebꞌ.
19 Jaꞌ sbꞌisil ebꞌ yin masanil,
ey 40,500 ebꞌ soldado tuꞌ,
20 junne ey cꞌal pax ebꞌ yicꞌaal Manasés yetoj ebꞌ.
Jaꞌ naj Gamaliel scꞌaal Pedasur,
jaꞌ eyoc syaawiloj ebꞌ.
21 Jaꞌ sbꞌisil ebꞌ yin masanil,
ey 32,200 ebꞌ soldado tuꞌ,
22 jatuꞌ oj ey bꞌulan ebꞌ yicꞌaal Benjamín yetoj ebꞌ.
Jaꞌ Abidán,
scꞌaal Gedeoní,
jaꞌ eyoc syaawiloj ebꞌ.
23 Jaꞌ sbꞌisil ebꞌ yin masanil,
ey 35,400 ebꞌ soldado tuꞌ.
24 Yuxan jaꞌ bꞌey bꞌulan ecꞌ ebꞌ yet Efraín tuꞌ,
ey 108,100 ebꞌ soldado tuꞌ,
jaꞌton ebꞌ chi bꞌey stoo yin yet yox tujan.
25 Jaxa bꞌey yetcꞌulal norte,
jatuꞌ bꞌulan ey oxebꞌ tujan ebꞌ yicꞌaal Dan.
Jaꞌ naj Ahiézer,
scꞌaal Amisadai,
jaꞌ yaaw yeoc xol ebꞌ soldado yin ebꞌ yicꞌaal Dan.
26 Jaꞌ sbꞌisil ebꞌ yin masanil,
ey 62,700 ebꞌ soldado tuꞌ.
27 Junne cꞌal bꞌulan pax ecꞌ ebꞌ yicꞌaal Aser yetoj ebꞌ.
Jaꞌton Paguiel,
scꞌaal Ocrán,
jaꞌ eyoc syaawiloj ebꞌ.
28 Jaꞌ sbꞌisil ebꞌ yin masanil,
ey 41,500 ebꞌ soldado tuꞌ.
29 Junne pax bꞌulan ecꞌ ebꞌ yicꞌaal Neftalí yetoj ebꞌ.
Jaꞌ naj Ahirá,
scꞌaal Enán,
jaꞌ eyoc syaawiloj ebꞌ.
30 Jaꞌ sbꞌisil ebꞌ yin masanil,
ey 53,400 ebꞌ soldado tuꞌ.
31 Yuxan jaꞌ jun bꞌulan ebꞌ yet Dan,
ey 157,600 ebꞌ soldado tuꞌ.
Jaꞌton ebꞌ chi bꞌey stoo yintaj sbandera Dan tuꞌ,
jaꞌton ebꞌ tuꞌ slawubꞌal xacꞌal chi yun yoc tzajan ebꞌ,
ẍi Jehová.
32 Jaꞌ sbꞌisil ebꞌ soldado yin masanil,
ey 603,550 ebꞌ.
33 Ma oc ebꞌ Levita sbꞌisiloj ebꞌ,
jaxca jix yun yalon Jehová tet naj Moisés.
34 Jix sjije ebꞌ Israel jaxca jix yun yalon Jehová tet naj Moisés;
junjun tujan jix eyecꞌ ebꞌ yalan sbandera,
yin cꞌal xolilal jix yun sbꞌey cꞌaltoj ebꞌ,
jatacꞌalaꞌ jantaj sbꞌisil ebꞌ yin junjun tujan icꞌaaleal.