3 Jaꞌ mactxequel chi yakꞌ junoj xaambꞌal tuꞌ,

chi yiꞌel junoj tujan yin noꞌ xaambꞌal tuꞌ,

yet chi akꞌle tzꞌaꞌ sattaj Dios,

jaꞌton masanil ẍepuꞌal yul scꞌul noꞌ,

4 yetoj caabꞌ yubꞌal noꞌ,

cꞌal masanil ẍepuꞌal eyoc yin yubꞌal noꞌ tuꞌ,

cꞌal yinlaj sbꞌajil yichin noꞌ,

cꞌal yin niꞌoj skꞌej noꞌ.

5 Jaxa ebꞌ yakꞌomal xaambꞌal tuꞌ,

chi aon oc yibꞌan teꞌ siꞌ,

catuꞌ chi yakꞌon tzꞌaꞌ ebꞌ masanil yibꞌan yet xaambꞌal tuꞌ,

caw watxꞌ yoc sabꞌ chi wabꞌe,

ẍi Dios.

6 Ta chi akꞌle junoj noꞌ meꞌ,

ma junoj noꞌ chiw yibꞌan jun yet xaambꞌal yet watxꞌcꞌulal tuꞌ,

chi skeꞌ je yakꞌon noꞌ icham ma noꞌ txutxe,

watxꞌ ojabꞌ cꞌal el noꞌ masanil.

7 Ta meꞌ junoj noꞌ chi akꞌle yin xaambꞌalil ey jin,

jaꞌ jun chi akꞌon tuꞌ,

chi yaoc skꞌabꞌ yibꞌan sjolom noꞌ,

8 catuꞌ chi smakꞌon cam bꞌey sattaj jun na bꞌey chin chaꞌle jin bꞌa je yetoj.

Jaxa ebꞌ yakꞌomal xaambꞌal chi txion oc ẍiqꞌuil noꞌ yin scanpaqꞌuil jun yet xaambꞌal tuꞌ.

9 Jaꞌ mac chi yakꞌ junoj xaambꞌal tuꞌ,

chi yiꞌel junoj tujan yin noꞌ xaambꞌal tuꞌ yet chi akꞌle tzꞌaꞌ jin sattaj,

jaꞌton wan ẍepuꞌal noꞌ chi iꞌle el yin sne yetoj cꞌal ẍiꞌbꞌeal yul scꞌul noꞌ,

10 cꞌal caabꞌ yubꞌal noꞌ yetoj ẍepuꞌal cꞌal niꞌoj skꞌej noꞌ chi iꞌle el yin noꞌ,

junne cꞌal chi yun yiꞌle el yin masanil.

11 Jaxa naj yakꞌomal xaambꞌal tuꞌ chi akꞌon tzꞌaꞌ masanil jin sattaj,

jaxca wal junoj loꞌbꞌe chi yun yakꞌle ey jin,

tol watxꞌ yoc sabꞌ chi wabꞌe.

12 Ta chiw junoj noꞌ chi akꞌle yin xaambꞌal ey jin,

jaꞌ mac chi akꞌon tuꞌ,

chi yaoc skꞌabꞌ yibꞌan sjolom noꞌ,

13 catuꞌ chi smakꞌon cam noꞌ bꞌey sattaj jun kꞌap na bꞌey chin chaꞌle jin bꞌa je yetoj.

Jaxa ebꞌ yakꞌomal xaambꞌal tuꞌ chi txion oc ẍiqꞌuil noꞌ yin scanpaqꞌuil jun yet xaambꞌal tuꞌ.

14-15 Yuxan jaꞌ mac chi akꞌon junoj xaambꞌal tuꞌ,

chi yiꞌel junoj tujan yin noꞌ,

yet chi akꞌle tzꞌaꞌ jin sattaj,

jaꞌton wan tiꞌ:

Noꞌ ẍepuꞌal chi iꞌle el yin ẍiꞌbꞌeal yin yul scꞌul noꞌ,

yetoj cꞌal yubꞌal noꞌ,

yetoj ẍepuꞌal eyoc yinlaj,

cꞌal niꞌoj yin skꞌej noꞌ,

junne cꞌal chi yun yiꞌle el yin masanil.

16 Jaxa naj yakꞌomal xaambꞌal tuꞌ chi akꞌon tzꞌaꞌ masanil yibꞌan jun yet xaambꞌal tuꞌ,

jaꞌ jun xaambꞌal chi akꞌle tzꞌaꞌ tuꞌ,

caw watxꞌ yoc sabꞌ chi wabꞌe,

yuxan che naꞌwejtej masanil ẍepuꞌal noꞌ,

wet cꞌal chi yun can ocoj,

ẍi Dios.

17 Cꞌam che chiꞌ ẍepuꞌal noꞌ yetoj ẍiqꞌuil.

Jaꞌ jun tiꞌ ley chi yun can ey jex,

oj sbꞌeybꞌalne cꞌal ebꞌ je yicꞌaal yet bꞌakꞌin,

yal cꞌal bꞌeytuꞌ caan jex ecꞌoj,

ẍi Dios tet naj Moisés.