Jaꞌ Wan Xaambꞌal Chi Akꞌle Yin Wan Tzet Chi Loꞌlei
2
Ta ey junoj mactxequel chi yiꞌtej ixim jarina yin saꞌbꞌeal tet Dios,
jaꞌ ojabꞌ ixim jarina caw watxꞌ chi yiꞌtej;
jaꞌ yibꞌan ixim tuꞌ chi ale ey aceite olivo cꞌal teꞌ incienso sukꞌukꞌi yoc sabꞌ;
2 catuꞌ chi yiꞌontej tet junoj ebꞌ yakꞌomal xaambꞌal yeoc xol ebꞌ yicꞌaal Aarón.
Jaꞌ junoj ebꞌ tuꞌ chi iꞌon a junoj bꞌetxan ixim jarina yetoj aceite olivo,
cꞌal yetoj masanil teꞌ incienso,
catuꞌ chi akꞌle tzꞌaꞌ jun saꞌbꞌeal tuꞌ yibꞌan yet xaambꞌal tuꞌ,
yu xeclo eloj tol jaꞌ masanil saꞌbꞌeal tuꞌ wet yeocoj.
Caw watxꞌ yoc sabꞌ chi wabꞌe,
ẍi Dios.
3 Jantaj to cꞌam chi lawi nuslei,
catuꞌ chi yakꞌon can ebꞌ tet Aarón,
yetoj cꞌal tet ebꞌ scꞌaal.
Caw miman yeloc apnoj,
yutol yetbꞌi cꞌal sbꞌa jun saꞌbꞌeal jix akꞌle tzꞌaꞌ jin sattaj tuꞌ,
ẍi Dios.
4 Jaꞌ yet chi akꞌle junoj saꞌbꞌeal ey jin tol kꞌanbꞌinaj yul jorna,
jaꞌ ixim jarina cꞌam yich chi oc xol.
Pim chi yun swaꞌnelei,
calbꞌil yetoj aceite olivo;
chi oc cꞌal pax ixim wocꞌox pan cꞌam yich,
catuꞌ chi bꞌonle oc aceite olivo yin.
5 Ta yul ẍaltin chi akꞌle taa jun saꞌbꞌeal tuꞌ,
jaꞌ ixim jarina caw watxꞌ chi akꞌlei,
calbꞌil yetoj aceite olivo,
cꞌam cꞌal yich chi eyi.
6 Chi kocꞌ kꞌubꞌneletoj,
catuꞌ chi ale oc aceite olivo yin,
jaꞌ jun saꞌbꞌeal tuꞌ chi skeꞌ sloꞌlei.
7 Ta tol che yakꞌ junoj je saꞌbꞌeal tol taanaj yul chꞌen xi,
jaꞌ ixim jarina caw watxꞌ che yakꞌa,
calbꞌil yetoj aceite olivo.
8 Jaꞌ yet chi waꞌxi el jun je saꞌbꞌeal tuꞌ,
catuꞌ chi iꞌletej jin sattaj,
jaꞌton naj yakꞌomal xaambꞌal chi iꞌontoj bꞌey jun yet xaambꞌal tuꞌ.
9 Jaꞌ tituꞌ chi yakꞌ tzꞌaꞌ niꞌoj jun saꞌbꞌeal tuꞌ,
yu snaꞌletej masanil saꞌbꞌeal chi akꞌlei,
caw watxꞌ yoc sabꞌ chi wabꞌe,
ẍi Dios.
10 Jantaj to saꞌbꞌeal tuꞌ chi cancanoj,
chi can tet Aarón yetoj cꞌal tet ebꞌ scꞌaal.
Caw miman yeloc apnoj,
yutol yetbꞌi cꞌal sbꞌa yetoj wan saꞌbꞌeal jix akꞌle tzꞌaꞌ jin sattaj,
ẍi Dios.
11 Jaꞌ masanil wan saꞌbꞌeal chi akꞌle ey jin yin wan tzet chi loꞌlei,
cꞌam cꞌal chi ale ey yich.
Cꞌam cꞌal pax yich chi eyi yetoj noꞌ yal awcabꞌ chi akꞌle tzꞌaꞌ yin saꞌbꞌeal jin sattaj.
12 Chi skeꞌ yale ey yich pan,
cꞌal noꞌ yal awcabꞌ yin saꞌbꞌeal yet chi akꞌle sbꞌabꞌel sat awo,
asan xin,
cꞌam chi akꞌle tzꞌaꞌ yibꞌan jun yet xaambꞌal bꞌey chi akꞌle cꞌaltaꞌ xaambꞌal ey jin an.
13 Jaꞌ masanil je saꞌbꞌeal che yakꞌ yin ixim sat tiriw ma sat cebada,
sowalil chi oc yatzꞌamil;
cꞌam ojabꞌ junoj je saꞌbꞌeal tol cꞌam chi oc yatzꞌamil,
yutol jaꞌ chi txꞌoxon el yin je wa kꞌane che yal can wetoj tiꞌ.
Yu tuꞌ xin,
jaꞌ masanil saꞌbꞌeal chi akꞌlei,
ey ojabꞌ cꞌal oc yatzꞌamil.
14 Ta chi akꞌle junoj saꞌbꞌeal tet Dios yin sbꞌabꞌel sat awo,
sowalil cha wiꞌtej ixim sjolom tiriw chi kꞌanbꞌi xol kꞌakꞌ.
15 Jaꞌ yin wan saꞌbꞌeal tuꞌ,
chi ale oc aceite olivo cꞌal teꞌ incienso tol sukꞌukꞌi yoc sabꞌ,
yutol yin sat awo chi iꞌle eloj.
16 Jaꞌ junoj ebꞌ yakꞌomal xaambꞌal tuꞌ chi akꞌon tzꞌaꞌ niꞌoj ixim xol kꞌakꞌ yetoj aceite olivo,
cꞌal masanil teꞌ incienso sukꞌukꞌi yoc sabꞌ,
yu xeclo eloj tol jaꞌ masanil saꞌbꞌeal tuꞌ wet yeocoj.
Caw watxꞌ yoc sabꞌ chi wabꞌe,
ẍi Dios.