4 Moczi moc mu hemiriŋ eŋarehuc maŋ bâsifuc eŋarenʒipiŋte dâŋ i mukopac.^* 5 No sahac‐nanezi wiwicko juekopac, maŋnanezi ine ŋoŋehec juhuc ŋoŋe Kristo manasiŋkehuc ʒiʒimic erâ sosoŋaŋko domapie honec‐ŋoparâ bunane biaŋkekac.^* 6 Ŋoŋe Kristo Jesu Wofuŋ eŋareocte rombiŋ erao qohotahuc junʒepieŋ,^* 7 ehuc eraoa gâtâ barâ fua‐hâmonʒepieŋ, â mamanasiŋte hata ŋaza ŋowatuc ekicne ijaha âte sanaŋkerâ daŋge mumuteŋ ecnehuc jupie ferâ fe ehuc fozejec.^* 8 Moczi moc ŋickonec mamana dâŋ, eeatuc dâŋ racne hâcne, qazu‐ŋarehuc maŋŋeŋic bawisenʒipiŋte rucŋeŋic banʒepieŋ. Dâŋ iŋucne i mimiŋne jaŋere maŋko fuac dâŋ â mâreŋte wiac tâpirihec ira roweckehuc mueŋgopieŋ, Kristorao siŋkehuc mâcne.^*

9 Manaŋgopieŋ, Anuture sâc i Kristo maŋ sahac‐ticnao qaja fuserâ qâniniwerâ fokac.^* 10 Irec ŋoŋe erao wiac moc mi basaniŋmu, eki hâcne micne â fekicne sasawa jaŋere qizecne.^* 11 Eraonec maŋeŋic wâc rombiŋ, mezi sahacko ma bapa i mâcne, juju‐ŋeŋic raŋɋane heunuckehuc Kristore maqâreŋhec embiŋ hâcne.^* 12 Ihec eniŋte Miti Opâ rua‐ŋarehuc ere hâmocko ʒuhuc‐ŋopakicne, erâ Anutu e tâpiri‐ticnezi Kristo hâmockonec bâɋârewec, tâpiri ijaha manasiŋkepie ŋoŋerao fotâcneme fafahare‐ticnao wâc ʒuhuc‐ŋopakicne.^* 13 Ŋoŋe mârâc jaha ma tâmiric juhuc sâqocne kosa barâ hâmocne juhapie Anutu e kiŋŋeŋic behehuc Kristohec bâɋârec‐ŋopawec.^* 14 Erâ dâŋ qaqatara‐nâŋec qâreŋkekicne i âke sifuckehuc irec kiŋ papia i bâsuckerâ maripoŋko ɋetickeme arictâc ewec.^* 15 Iŋuc ehuc fekicne â tâpirihec hâbi‐jeŋic bâŋgoroŋkerâ saoreŋ qahuc fuŋne‐jeŋic bataniŋkewec.^*

16 Ŋic moczi nânâ qowi soware me sabata hombaŋ me mosa hombaŋ i me i ŋeŋere me mi ŋeŋere mu supaic mi eŋarezejec.^* 17 Wiac iŋucnere nâkumucne muzo, fârine ʒâhec fuaocte irec nâkumucnezi qanaŋ bâniewec. Â fârine ine Kristorao fuawec fokac.^* 18 Ŋic gâcnezi maŋhuhuŋ hawari erâ juhuc aŋelo araŋ bajareeŋgopieŋ, â maŋnâŋec ŋerisieme wiac honeeŋgopeneŋ muhuc irec manapie fârine eme sahac‐jeŋic maŋgâŋ muʒoraeŋgopieŋ, ŋic iŋucne jaŋe boreŋ fâri‐ŋeŋic mi ŋowac ronʒepieŋ. 19 Jaŋe hâcne Kristorao sâcne mi siŋkeeŋgopieŋ. Eki qizec‐nâŋec â nâŋâc me sahac‐ticne. Eme qizeckonec ruazi fâuckerâ wahahuc me kike fâri ombâŋ‐ticne basanaŋ‐nâpohuc bândeŋ‐nâpoekac. Ehuc gume hesiwiŋ enâreme soka sanaŋte tâpiri Anuturaonec fua‐nâreekac.^*

20 Ŋoŋe Kristore hâmocko ʒuhuckehuc mâreŋte wiac tâpirihec râpeckembiŋko wemocte mâreŋte hae fâri juhuc tinac sâcmutâc dâŋticne reŋkeeŋgo‐pieŋ?^* 21 Dâŋ kecʒiŋuc: “Keci mi bâuac, keci mi nâc, keci mi roc.”^* 22 Wiac nâ bac erâ bebehene hâcne, irec kibâtâc dâŋ i ŋiczi maŋjeŋicte manasurâ mu qaqazuc eeŋgopieŋ.^* 23 Ŋic iŋucnezi maŋɋârâŋ hawari erâ “bâtâcko â sowa juhuc sahac bâpitiwazo” iŋuc mupie dâŋ izi fârine tinac eekac. Erâ wiac iŋucnezi fârine aricne, izi sasec aka sâcne mi hecneocmu.^*