Efeso 6

Neŋgoc mamac â naru motec jaŋere dâŋ

Naru motec ŋoŋe Wofuŋte erâ neŋgoc mamacfâc‐ŋeŋic jaŋere dâŋ reŋkenʒepieŋ. Izi hata biaŋne.^* 2 “Go neŋgoc mamac jahecge sâsec‐jofazemec”, i sâcmutâc dâŋ fekicne, erâ biŋedâŋ‐ticne ʒiŋuc ʒuhuckerâ mukicne:^* 3 “Iŋuc erâ mâreŋko dameŋ ʒora juhâc qâhâmocmu.”^* 4 Mamac ŋoŋe naru motecfâc‐ŋeŋic aaric bâfuanʒipiŋte wiac kosa mi ejarenʒepieŋ. Ŋoŋe mitio jaza bâtiŋ â uŋ sawaŋ ejarehuc soŋaŋ‐jopahapie sokanʒepieŋ.^*

Ŋicbomboŋ â kiŋaŋ qaqa jaŋere dâŋ

5 Kiŋaŋ qaqa ŋoŋe mâreŋ ŋicbomboŋfâc‐ŋeŋic araŋ bajarehuc, maŋŋeŋiczi qâzuc foha, Kristo ecneŋgopieŋ tinac, mana mezac ehuc micjeŋic reŋkenʒepieŋ.^* 6 Ŋoŋe ŋicbomboŋfâc‐ŋeŋic maizi qambaraŋ ejarepie honec‐ŋopapie biaŋkeocte mâcne, nâŋe Kristore kiŋaŋ qaqa, iŋuc muhuc Anutuzi hata muwec i maŋafec jaha âtenʒepieŋ. 7 Ŋic jaŋere manasuhuc aricne, Wofuŋte manasuhuc gie‐ŋeŋic tatakic tâmiric banʒepieŋ. 8 Ŋoŋe manaeŋgopieŋ, moc e kiŋaŋ qaqa me ŋicbomboŋ juhuc wiac biaŋne ehuc juocmu, e Wofuŋzi okacne sâc ijaha bazucneocmu.^*

9 Erâ ŋicbomboŋ ŋoŋe kiŋaŋ qaqafâc‐ŋeŋic iŋuc jaha ehâmo‐jarenʒepieŋ, ehuc mu imac mi ejarenʒepieŋ. Erâ ʒiŋuc mananʒepieŋ: Kiŋaŋ qaqa â ŋicbomboŋ ine sambâŋko Wofuŋ wirec‐ŋeŋic jukac, e ra rowec ware rowec mi focnekac.^*

Râsi mi hohonene jueŋgopieŋ

10 Mutarahuc mupe: Wofuŋtao roweckepie tâpiri sâko‐ticnezi ŋoŋerao fotâcneme qaboc‐ŋeŋichec junʒepieŋ.^* 11 Erâ Anuturaonec sându maro ʒika wiac ro barâ juhapie Sataŋzi rucko râsi fisi‐ŋareme hâbi‐ŋeŋic rorâ jâpenʒepieŋ.^* 12 Ŋoŋe manaŋgopieŋ, nâŋâc râsi sahac biuchec jaŋehec ʒika qaqa mi eeŋgopeneŋ, aricne, ŋicbomboŋ sâko â momori sanaŋ, dameŋ ʒi dapâc fokac irec guriŋ bapa, demoŋ sâqocne sambâŋ rurumaŋko jueŋgopieŋ, jaŋe râsi enâreeŋgopieŋ.^* 13 Irec Anuturaonec sându maro ʒika wiac ro bajuhuc ʒika dameŋko qiŋ herâ domahapie râsi jaŋe bâipiec‐ŋoparâ wisenʒepieŋ.^*

Momorire wiac bajuzo

14 Ŋoŋe kecʒiŋuc domanʒepieŋ: Dâŋ fâri qizecnezi umbika‐ŋeŋic eme jomanʒepieŋ, kiŋfâsâczi maruku‐ŋeŋic ene rufanʒepieŋ,^* 15 wamare Biŋebiaŋ baʒawiehuc badomanʒepieŋ, izi kikehuhu hepie hume âte sanaŋkeŋgopieŋ ezejec.^* 16 Erâ neŋgocne sâko ine mamanasiŋzi maro‐ŋeŋic eme dameŋ sâc he bâfeŋnerâ domahapie sâqocne runere ʒoc tepe moteczi kisowarierâ hâpozejec.^* 17 Erâ wâc aeŋdu ʒâŋene bâbâpiaŋ hepie huzejec, â Mâroraonec ʒika, Anuture dâŋ hâcne, i bajunʒepieŋ.^* 18 Ŋoŋe ʒâfo sâc Mârore tâpirio Wofuŋ ʒuʒuhuc jaha numucnehuc wâsickenʒepieŋ, erâ qâoma mi ehuc rucjaric‐ŋeŋic banʒepieŋ, erâ hae sâc mitiŋic guru jaŋere nunumu gie banʒepieŋ wâc.^* 19 Erâ nore mâmâc numuhuc jupie Wofuŋzi micnane baafeckeme Biŋebiaŋ soŋsoŋ fowec i asa feferaŋko mutaniŋkezepac.^* 20 No irec biŋe mumu kâpâcwâruo foekopaczi hâhâwic tâmiric mutaniŋkepe sâckezejec.^*

Mumutara dâŋ

(Kol 4:7-8)

21 Juju‐nanere fuŋne â gie baekopac i kâuc banʒipiŋte Tikikozi fârâ dâŋ binaŋ eŋare‐fâreocmu, e âgo biaŋ‐nâŋec â Wofuŋte kiŋaŋ qaqa micrereŋhec.^* 22 Eki nâŋere dâŋ binaŋ eŋarehuc bubiaŋ qaŋareocte sorepe fakac hâcne.^* 23 Anutu Mamac â Wofuŋ Jesu Kristo eki âgofâc‐nane ŋoŋe wama bâfua‐ŋarehuc mamanasiŋ‐ŋeŋic basanaŋkeme maŋjauŋhec junʒepieŋ. 24 Wofuŋ‐nâŋec Jesu Kristo erao qohota sanaŋkeeŋgopieŋ ŋoŋerao aki anonoczi fozejec.^*