6 Eatuc‐ŋopahuc siocdâŋ ŋazapie manapie fârine mi ezejec. Sâqocne iŋucnere hâcne Anuturaonec okacne qaqatara ŋic jaŋerao fuaocmu.^* 7 Irec ŋoŋe mi bafic‐jopanʒepieŋ. 8 Ŋoŋe mârâc jaha dapâchec jujumbieŋ, ʒi ine Wofuŋtao fisirâ tatamachec embiŋ juŋgopieŋ. Irec tatamacte ɋâricfâc erâ irec hawari junʒepieŋ.^* 9 Tatamacte fârine fuaekac i maŋbiaŋhec juju â tiŋne juju â jâmbomac dâŋ mumu. 10 Wiac ezo murâ ine Wofuŋzi maname biaŋkeocmu me mâcne, i qanaŋ mana wosâerâ enʒepieŋ.^* 11 Gâcnezi dapâcte wiac jawane epie mi qâsuec‐jopanʒepieŋ, aricne. Ŋoŋe irec tapa qararuŋkehuc qatara‐jarenʒepieŋ.^* 12 Wiac soŋsoŋko eeŋgopieŋ i mu bâuac epene miminehec jaha eocmu.^* 13 Wiac iŋucne tapane qararuŋkepene tatamaczi âeckeme fuaocmu. Eme tâtâc fuakac wiac izi wâc tatamac bâfuaocmu.^* 14 Irec hâcne ʒiŋuc mukicne:

15 Ŋoŋe juju bapa‐ŋeŋicte ruc bahuc junʒepieŋ. Erâ mutuc matacne mâcne, maŋ mamanasuhec junʒepieŋ.^* 16 Dameŋ ʒira sâqocnezi haŋ bawec fokacte dameŋ gâcne mi behehuc gie ʒoɋachec banʒepieŋ. 17 Maŋ tâmiric tinac mi junʒepieŋ, Wofuŋzi gie muŋareekac i hone ʒâŋitac enʒepieŋ.^* 18 Waiŋ opâ wiacte âmbâŋ mi enʒepieŋ, izi maŋ sisipiric gie. Mârore ine âmbâŋ enʒepieŋ.^* 19 Mârozi esoc‐ŋopaocmu sâc gae mânec hehuc maŋ nareŋ gareŋ enʒepieŋ. Â maŋŋeŋicko Wofuŋ gaezi â musizi mu ʒeri ecnenʒepieŋ.^* 20 Erâ Wofuŋ‐nâŋec Jesu Kristore erâ dameŋ sâc Anutu Mamac wiac fuŋne fuŋnere daŋge mumuteŋ ecnenʒepieŋ.^*

21 Ŋoŋe Kristo araŋ bacnehuc micrereŋ eec efârenʒepieŋ.^* 22 Ŋonâŋ ŋoŋe Wofuŋte rereŋfâc juŋgopieŋ iŋuc jaha ŋowefâc‐ŋeŋic jaŋere junʒepieŋ.^* 23 Ŋowezi ŋonâŋte qizec ekac hâcne, iŋuc jaha Kristozi kikefuŋte qizec ekac, ehuc me sahac‐ticnere bâbâpiaŋ wâc ekac.^* 24 Eme kikefuŋzi Kristore mic reŋkeekac, iŋuc jaha ŋonâŋ jaŋe ŋowefâc‐jeŋic jaŋere mic dameŋ sâc reŋkenʒepieŋ.

25 Ŋowe ŋoŋe ŋonâŋfâc‐ŋeŋic maŋjauŋ ejarenʒepieŋ. Kristo e iŋuc jaha kikefuŋ‐ticne maŋjauŋ ecnehuc ere due bawec.^* 26 Erâ kikiruhucne â sâfânehec â wâc wiac gâcnehec juzacte mitidâŋzi opâ umbiŋkeha ʒurehuc jambuŋkerâ^* 27 ericke bâpiaŋ ecnerâ e jahacne biŋe furu â bahacmâc juocte mucnewec.^* 28 Eme ŋowe jaŋe jaŋacne sahac jauŋ bacneeŋgopieŋ, sâc ijaha ŋonâŋfâc‐jeŋic bajarenʒepieŋ. Moc e ŋonâŋ‐ticne maŋjauŋ ecnehuc e jahacne sahac mâmâc ecneocmu. 29 Ŋic moczi moc sahac‐ticne râsi mi eecne, gume jauŋ ecnehuc jaha juekac, Kristozi kikefuŋ ecnehuc juekac iŋuc; 30 nâŋâc me sahac‐ticnere tofafâc juŋgopeneŋ hâcne.^* 31 “Irec hâcne ŋic moczi neŋgoc mamac jahec‐ticne behec‐jofarâ ŋonâŋ‐ticnerao qohotame jahe maŋ sahac mocjaha erâ junicmu.”^* 32 I dâŋ soŋne, qame hukicne. Ine Kristo â Kikefuŋ jahere muhuc mukopac.^* 33 Ŋoŋe ine ŋic sasawa sahac‐ŋeŋic jauŋ baeŋgopieŋ sâc ijaha ŋonâŋfâc‐ŋeŋic jauŋ bacjopanʒepieŋ. Â ŋokac ine ŋowefâc‐ŋeŋic araŋ bajarenʒepieŋ.