Paulozi Korinti haeo mi risiewec irec dâŋ
2
No ŋoŋerao fârâ busâqoc mocwâc bâfua‐ŋarezipore manabâc erâ jupo.* 2 Noni busâqoc eŋarehape weni jaŋe bubiaŋ bâfua‐nareniŋmu? Busâqoc ecnekicnezi wemocko iŋuc eocmu? 3 Eme no dâŋ i hâcne ʒiŋucte qâreŋke‐ŋarepo: No fâpe ŋoŋe bubiaŋ bâbâfua‐narezi busâqoc bâfua‐narenʒipiŋ. No nâŋâcnere ʒiŋuc hâcne manapaŋkepo: Nore bubiaŋzi mâmâc sâko‐nâŋec ekac. 4 No bunane gufeme ŋoŋere ʒâic wemo afecne manahuc kifaio papia qâreŋke‐ŋarepo, i bu ririke eŋarepemurâ mâcne, maŋnane ŋoerea sanaŋne domakac, irec fuŋne ŋowatupemurâ epo.* Ŋic bâbâtiŋ wiac ejarerâ ʒâhec mocwâc âgo ejarezo
5 Ŋic busâqoc bâfua‐nârewec, eki no sawa mâcne, ŋoŋe gâcne mâmâc bâfua‐ŋarewec, weniŋuc musokahuc “mâmâc sâko bâfua‐ŋarewec” mupemu.* 6 Ŋoŋe bocjahazi bâtiŋnehuc wiac ecnembiŋ, i manape tarakac. 7 Ʒi ine busâqocko juku sipirickezacte kiŋticne behehuc mu bâmiriŋ ecnenʒepieŋ. 8 Irec hâcne harierâ âgo jauŋ ecneniŋte mukopac. 9 No bâbâtiŋte mârâc qâreŋke‐ŋarepo, i dâŋnane sasawa reŋkepie fuŋne taniŋkeocte esâic‐ŋopapo.* 10 Ŋoŋe ŋic mocte kiŋ behepie no iŋuc jaha behepemu. Kiŋ behekopac (bahac bâfuawec i norao moc qacnewecko behekopac) ine ŋoŋere manasuhuc Kristore micte ekopac.* 11 I Sataŋzi eatuc‐nâpozacte iŋuc eŋgopeneŋ. E wiac enâreocte manasuekac, irec kâuc mi baŋgopieŋ.*
Mitizi âsu mumundoŋ eekac
12 No Troa haeo fisihape Kristore Biŋebiaŋ mupemurâ irec hatane Wofuŋzi bâʒâwe‐narewec.* 13 Eme qomâ‐nane Tito (e ŋoŋeraonec biac mi risiewecte) basahuc maŋhâhâŋ enareme ŋicbureŋ mâzoc‐joparâ Makedonia mâreŋko warepo.* 14 Opoŋ, Anutu e Kristore gieŋifâc‐ticne nâŋe saoreŋ qahuc bataniŋ‐nâpoekac, ehuc enâreme miti‐ticnere âsu aŋac biaŋ bâiŋnepene ŋezurâ mâreŋ sâc raekac, irec mumuteŋ sâko ecnezo. 15 Nâŋe Kristore âsu mumundoŋ eŋgopeneŋzi Anutu bâiŋnecnepene ŋic jujure biŋe â sisipiricte biŋe mâmâc jopaekac.* 16 Sisipiricte biŋe jaŋe fârepie hurâ hâmoc âsu erâ jopame hâmoeŋgopieŋ, â jujure biŋe jaŋe fârepie hurâ juju âsu erâ âke ɋârec‐jopame jueŋgopieŋ. Gie iŋucne mozi bame sâckeocmu?* 17 Nâŋe ŋic gâcnezi eeŋgopieŋ iŋuc mi eeŋgopeneŋ. Ŋic gâcne bocjahazi Anuture dâŋte manapie âbârâ gie‐jeŋic eekac. Nâŋe ine maŋtaniŋ juhuc Anuture micte â Anuture maio Kristorao qohotahuc miti mueŋgopeneŋ.*