KORINTI II
Jambuŋ â mumuteŋ dâŋ
1
Anuture micdâŋte Jesu Kristore aposolo epo Paulo no hâcne, erâ qomâ‐nâŋec Timoteo nâhe Korinti haeonec Anuture kikefuŋ â Akaia mâreŋko mitiŋic juraŋgopieŋ ŋoŋe papia ʒi qâreŋke‐ŋarehuc ʒiŋuc mukoperec:* 2 Mamac‐nâŋec Anutu â Wofuŋ Jesu Kristo eraonec aki anonoc â wama ŋoŋerao fotâcnerâ fozejec.* 3 Wofuŋ‐nâŋec Jesu Kristo ere Mamac â Anutu muteŋkenʒepeneŋ. E buuruc Mamac â bâbâmiriŋ rune juekac.* 4 Ehuc ʒârâ hâriŋ fuŋne fuŋne enâreme bâmiriŋ‐nâpoekac. Eme Anutuzi bâmiriŋ‐nâpoekac, bâbâmiriŋ izia nâŋe iŋuc jaha âgo gâcne ʒârâ hâriŋ fuŋne fuŋne maŋnao juhapie sâcne bâmiriŋ‐jopanaŋmu. 5 Kristo e ʒâic manawec irec tofane nâŋerao ɋârâŋne fuaekac, iŋuc jaha bâbâmiriŋ‐ticne ɋârâŋnea bâfua‐nâreekac.* 6 Nâŋerao fific guguriŋ fuaekac, i ŋoŋerao bumâteŋ â bâbâpiaŋ fuaocte fua‐nâreekac, â bâbâmiriŋ fua‐nâreekac i wâc ŋoŋere erâ fua‐nâreekac, ine bâbâmiriŋ izi ŋoŋerao fotâcnerâ dopec‐ŋopahame fific guguriŋ nâŋerao fuaekac ijaha ŋoŋerao fuame irec ʒâic maŋuruc jaha mananiŋte.* 7 Eme nâŋe ŋoŋere manabâc mi ehuc ʒiŋuc manapaŋkeŋgopeneŋ: Ʒârâ hâriŋte kâdoc rohuc bâbâmiriŋte kâdoc mâmâc roeŋgopieŋ.Wofuŋzi Paulo â âgofâcne hâmockonec batarac‐jopawec
8 Nâŋe Asia mâreŋko ʒârâ hâriŋ faio juwefumbeŋ irec kâuc banʒipiŋte mupe mananiŋ: Ira wiac hâhâwicne jâmbâŋ fai‐nâŋecko ferâ kimâc‐nâpome juju‐nâŋecte mâretec mana maŋbahac embeŋ.* 9 Eme ʒi hâmocte biŋe eŋgopeneŋ muhuc maŋnâŋec ŋeŋgoroŋkewec. Erâ i mâc mi fua‐nârewec, nâŋe nâŋâcne tâpirire manapene waha qaqane eha Anutu hâmoc qâŋɋâŋ bâɋâreekac e mocjaha manasiŋkenaŋte wiac i fua‐nârewec. 10 Eme eki hâcne hâmockonec batarac‐nâpowec. Erâ e batarac‐nâpoweczi juku wâc batarac‐nâpozokac, dâŋ iŋuc mana ʒakiehuc erao siŋkeeŋgopeneŋ.* 11 Eme ŋoŋe nunumuzi bafic‐nâpopie Anutu e buafec‐ticnere erâ ŋezic‐nâpome micne micne musereckerâ nâŋere erâ daŋge mumuteŋ ecnepie sâckezejec.
Paulozi maŋfâsâc juwec
12 Nâŋe nâŋâcnere piticne mana biaŋkeeŋgopeneŋ ine kecʒiŋucte: Maŋfâsâc â mitio maŋtaniŋ jupene maŋnâŋeczi wiac mocte tutuc mi qanâreekac. Nâŋe miti tâmiric jaŋere maio iŋuc hâcne juhuc miti mamana ŋoŋere maio wâc jujâmbâŋkeeŋgopeneŋ. I mâreŋko maŋɋârâŋ dâŋ fokac ira siŋkehuc mâcne, Anuture uruc jauŋko siŋkehuc eeŋgopeneŋ.* 13 Nâŋe dâŋ hetac herirec ehuc mâcne, dâŋ fârine sasawa qâreŋke‐ŋarepene wose manac eeŋgopieŋ. No manakopac, ŋoŋe ʒâhec mana tara‐jâmbâŋkeniŋmu. 14 Ine hâcne gâcne ŋoŋe ʒiŋuc biac mana tarazo eŋgopieŋ: Nâŋe ŋoŋere boreŋfâc â ŋoŋe Wofuŋ Jesu dameŋ sâko‐ticnao nâŋere boreŋfâc eniŋmu.*
Paulozi pacgoroŋ dâŋ mi muwec
15 No dâŋ i hâcne maŋkehuc qanaŋ ŋoŋerao fârâ bubiaŋ qaŋarepemurâ mupo. 16 Erâ fâ honec‐ŋoparâ Makedonia mâreŋko razo mupo. Ira ra jurâ mocwâc ŋoŋerao risiepe gâcnezi bâjâpecnupie Judaia mâreŋko ranaŋte manasupo.* 17 Eme no iŋuc muhuc âkesac eŋarepo muŋgopieŋ me? Me no ŋic miti tâmiric, irec dâŋ mupaŋkepe moc i fârine â moc i racne eekac?* 18 Anutu e jâmbomac rune jukacte dâŋ ŋazapene wemocko racne â fârine ataŋ eocmu? 19 Anuture Ŋokâ Jesu Kristo ere fuŋne i no â Siliwano â Timoteo nâŋe ŋazapene gâcne fârine â gâcne racne iŋuc mi ewec. Aricne, ere fuŋne i fâri fideteŋ sasawa. 20 Anuture biŋedâŋ fuŋne fuŋne i erao hâcne deŋke‐fârekac. Irec hâcne esoc‐nâpome “Jâmbomac” muhuc Anutu mucne bacneeŋgopeneŋ.* 21 Ŋoŋehec Kristorao râec‐nâpo sanaŋkewec i Anutu eki hâcne.* 22 Erâ ekizia wâc ma qâreŋ banârehuc ʒâʒâfic‐ticne Mâro maŋnâŋecko râeme huwec.*