Korinti i Helene ŋic jaŋere hae sâko moc, hâwecmecko ŋewec. Woke bocjahazi ira raʒi wefuc ehuc jumbiŋ. Hae rune jaŋe moneŋ mafa ɋâfoŋne jâmbâŋ fojarewec. Juju‐jeŋic ine mi sâckewec. Jaŋe wiac nâ areŋ â boe sau mâretec ejumbieŋ. Paulo e miti kiŋaŋ hata rame jajahec ewec, dameŋ ira raku Korinti haeo fisiwec. Fisirâ ira mosa 18 miti gie bahuc jume ŋic ŋokac bocjahazi miti manarâ Jesure kikefuŋfâc embiŋ. Eme gie iŋuc baku Paulo e Jerusalem haeo risiehame mitiŋic moc, ʒâŋene Apolo, eki Korinti haeo rarâ Paulore gie soŋaŋkewec. Ŋic e Johane Miti Opâ fufuŋke ere motec juwec. Eme Korinti haeo miti gie bahame ŋic gâcne jaŋe ere boc aŋac‐jopame mumbiŋ: Nâŋe Apolo ere ŋicfâc. Ehame gâcne jaŋe mumbiŋ: Mâcne, miti i Paulozi fuŋkerâ bawarewec, irec nâŋe ere ŋicfâc. Eme fâuckerâ juhapie Jerusalem haeonec Judaŋic opâ ruac jaŋeraonec gâcnezi fisirâ ʒiŋuc jazambiŋ: Ŋoŋe Paulo me Apolo wemocte boc mana‐jactepie feekac, mitire jâcne mocjaha jukac, Petoro. Mupie gâcne jaŋe dâŋ irec manapie fârine eme mumbiŋ: Nâŋe Petorore ŋicfâc. Ehame wâc guru moc fuarâ mumbiŋ: Nâŋe ine Kristore ŋicfâc, irec nâŋe mitiŋic fârine. Fâfâuc sâko iŋuc fuawec. Erâ bahac i sawa mâcne, Korinti haeonec opâ ruac guru jaŋe fific guguriŋ tâmiric wamao juhuc âgofâc‐jeŋic qâpuc jaŋehec iiqic gâbâ â wiac nareŋ gareŋ ekupie bâbâsifuc fuŋne fuŋne ŋondeŋ‐jeŋicko fuawec. Ŋic moczi mamac‐ticnere ŋokac bawec. Iŋuc eme opâ ruac âgofâcne jaŋe erao bâbâtiŋ gie mi bapa, mâc qâoma erâ jumbiŋ. Erâ moc esâqorembiŋ ine ʒiŋuc: Ŋondeŋ‐jeŋicko dâŋ bahac wiac fuame mitio mi mufâsâehuc qâpuc jaŋere kia me soŋaŋfâc jaŋerao barapie mutara‐jarembiŋ. Wiac iŋuc ehuc juhapie Paulo e Antiokia â Jerusalem haeo piticne jumanaku miti kiŋaŋ hata moc fuŋkeme jahec â moc ewec. Ehuc Asia mâreŋ masunao kikefuŋ guru jumbiŋ jaŋe honec‐jopa raku Efeso haeo fisirâ ira dameŋ ʒora juwec. Ira juha ŋokac moc ʒâŋene Koloe ere wiacfâc jaŋe fisirâ dâŋ binaŋ ecnembiŋ (1:11). Erâ jaŋe sawa mâcne, Korintinec ŋicsoŋaŋ jahec â moc jaŋe Paulorao papia bafisihuc dâŋ binaŋ wâc ecnembiŋ (16:17). Ine Korinti ŋic jaŋe wiac gâcnere, iŋuc me iŋuc epene sâckeocmu, muhuc maŋguru embiŋ. Ehuc Paulo papia qâreŋkecnehuc wiocembiŋ. Ŋowe ŋonâŋ juju irec wiocnembiŋ, erâ wâc qâpuc tiwâ ʒepec‐jeŋicte mâmâc indiŋkembiŋ. Eme Paulo e Efeso haeo ŋehuc dâŋ sasawa i manarâ papia ʒi hâcne Korinti ŋic qâreŋke‐jarewec. Qanaŋ juwicnao moc qâreŋkerâ râe‐jareme rame wose manac embiŋ (5:9). Eme papia izi ʒâhec sifuckewecte papia kecʒirec, Korinti jaŋere papia I iŋuc mueŋgopeneŋ.

Papia maŋnao dâŋ birine birine forakac ine kecʒiŋuc: