Luka 1

LUKA

Lukazi Jesure binaŋ Teofilo qâreŋkecnewec

Ŋic bocjaha jaŋe ŋondeŋ‐nâŋecko wiac fârine fuawec irec binaŋ birickerâ qâreŋkembiŋ. 2 Jaŋe binaŋ i mitiŋiczi bapa fuŋfuŋ juhuc wiac fuŋgâtânehec hone manac eku banârembiŋ irec sâcko qâreŋkembiŋ.^* 3 Eme noni iŋuc jaha fuŋnaonecteaŋ wiac fua warewec irec aimuŋ mu ikisiŋ ehuc manaku mana‐fârerâ Teofilo ŋicbomboŋ‐nane gore ninic qâninic qâreŋkekopac.^* 4 Eme i wosehuc ʒiŋuc mana tarazemec: Dâŋ binaŋ egarekicne i fârine jâmbâŋ.

Aŋelo moczi Zakaria fuacnewec

5 Herodezi Judia mâreŋte ŋicwofuŋ juwec, dameŋ ira taha bapa moc juwec ʒâŋene Zakaria, e Abia ere gie birionec. Ŋonâŋ‐ticne Elisabete e Aroŋte tucne tofane.^* 6 Jahe Anuture maio bahac fâsâc juhuc sâcmutâc dâŋticne aiakic jaha reŋke‐fârehuc jupic. 7 Eme Elisabete hufiŋ juwecte jahe ɋâric tâmiric juku ŋic ŋokac qizec epic. 8 Eme Zakaria juwec ŋic biri i jaŋe taha ufuŋko bâzi ririke gie baniŋte dameŋ‐jeŋic maickeme 9 fisirâ gie‐jeŋic ru sâc ehuc Zakaria hosâc bâzi rikeocte mucnepie taha ufuŋ maŋnao raʒiwec.^* 10 Raʒirâ hosâc bâzi rikehame ŋic ŋokac omane jaŋe sapamaŋko Wofuŋ numecnehec jumbiŋ. 11 Ehame Wofuŋte aŋelozi fuarâ hosâc bâzi ririke alata ŋifecnao fâreopec domawec. 12 Domame Zakariazi honerâ fâfârerâ hemâtâckewec.

13 Iŋuc eme aŋelozi ʒiŋuc âzâcnewec: “Zakaria, go mi hâwicguoc, Wofuŋzi nunumuge manawecte ŋonâŋge Elisabete motec kiweckerâ roocmu, ere ʒâŋe Johane muzemec.

14 Go ʒeri ehuc bubiaŋ manacmu,

â ŋic bocjahazi fufua‐ticnere aŋac‐jopaocmu.

15 E Wofuŋte maio kâcɋene erâ juocmu;

â waiŋ me opâ momori irec sowa juocmu.

Erâ e neŋgoc bumaŋko fohame

Tiri Mârozi maŋticne bâfuseocmu.^*

16 Eme Israe ŋic bocjaha bârisiec‐jopame

Wofuŋ Anutu‐jeŋic maickeniŋmu.

17 Elia maŋʒoɋac â tâpiri focnewec sâc focneha

Wofuŋte biŋedâŋ mumuŋic erâ juocmu.

Ehuc kâcɋene jaŋere maŋ bârisieme ɋiene jaŋerao iticneocmu,

â râŋgeŋne jaŋe ejareme tiŋne jaŋere mamana birire hazec râeniŋmu.

Eme ŋic jaŋe mâmâc sâko Wofuŋte ʒawierâ juniŋmu.”^*

18 Aŋelozi iŋuc mume manarâ Zakariazi dâŋ ʒiŋuc bârisiecnewec: “No â ŋonâŋ‐nane nâhe ŋic ŋokac qizec, irec dâŋge wemocko manape fârine eocmu?”^* 19 Mume aŋelozi ʒiŋuc âzâcnewec: “Manakic, ʒâŋe‐nane Gabirie, no Anuture maio domaekopac. Eki sorecnume waharâ biŋedâŋ biaŋ gazakopac.^* 20 Irec manac, dâŋnane mi mana ʒakiekomec irec okacne nâŋguŋ erâ dâŋ tâmiric juhaŋtec dâŋ gazakopac fârinehec eocmu. Dâŋ mukopac i racne mi eocmu.”^*

21 Zakaria e ufuŋko boc jume ŋic ŋokac woŋec‐ticne ŋeku manafecne manambiŋ. 22 Iŋuc ehapie ʒâhec jaŋerao waharâ dâŋ jazaocte eipiewec. Eipieme jaŋe ʒiŋuc manambiŋ: E taha ufuŋko wiac ʒâŋe furu moc honejec. Eme eki mezi sâsâc sawa ejarewec, dâŋ ine wemocko jazazac. 23 Iŋuczi iŋuc juhame gie bapa dameŋ‐ticne tarame haeo risie rawec. 24 Eme ʒâhecko ŋonâŋ‐ticne motec kiweckewec. Erâ mosa 5 soŋke soŋke juwec. Ehuc ʒiŋuc muwec: 25 “Wofuŋ e dameŋ bawec i maickeme ehâmo‐narerâ mimi bâsuec enarewec.”^*

Aŋelozi Maria fuacnewec

26 Mosa 6 tarame Wofuŋzi aŋelo Gabirie soreme Galilaia mâreŋko Nazarete haeo rawec. 27 Ira naru ŋokac moc juwec ʒâŋene Maria, e ŋic moc Dawidire oso gitecne, Ʒâŋene Josefe, ere biŋe mukicne.^* 28 Eme aŋelo e Mariarao fuarâ muwec, “Wofuŋte joroc biaŋ, go ʒeri ec, Wofuŋzi gohec jukac.”^* 29 Aŋelozi dâŋ iŋuc mume maname quŋkeme maŋnezi ʒiŋuc manasuwec: Weniŋucte mu ʒeri enarekac? 30 Eme aŋelozi ʒiŋuc âzâcnewec: “Maria go mi hâwicguoc, Anutuzi honecgume biaŋkekac. 31 Manakic, go motec kiweckerâ rocmu, ere ʒâŋe Jesu muzemec.^*

32 E kâcɋene jâmbâŋ jume Fekicne sâko ere Ŋokâ mucneniŋmu,

â Wofuŋ Anutuzi apa‐ticne Dawidi ere ŋeŋetacko râeocmu.^*

33 Eme Jakobore ɋâricfâc guriŋne bajarehuc jume

Ŋicwofuŋ juju‐ticne foraʒihuc juocmu sanaŋ.”^*

34 Mume Mariazi ʒiŋuc âzâcnewec: “No ŋic tâmiric jukopacko dâŋ mukic i weniŋuc erâ sanaŋkeocmu?”

35 Mume aŋelozi dâŋ ʒiŋuc bâtikiecnewec:

“Tiri Mârozi faigao wahaocmu

â Fekicne sâko ere tâpirizi neŋgoc ŋesiŋ ŋegareocmu.

Eme irec motec rocmu e tiri mucnezo,

Anuture Ŋokâ hâcne.^*

36 Erâ moc gazape manac: Âgoge Elisabete e ŋokac qizeczi motec kiweckerâ juhame mosa 6 ekac, e hufiŋ ŋokac mucneeŋgopieŋzi iŋuc ekac hâcne. 37 Anutu e wiac moc ezomurâ mi eipieekac.”^* 38 Mume Mariazi ʒiŋuc âzâcnewec: “No Wofuŋte kiŋaŋ naru, irec dâŋ mukic iŋuc hâcne enarezejec.” Iŋuc mume aŋelozi beherâ rawec.

Mariazi Elisabete iqickewec

39 Maria e jume mi ʒoraha biac ʒawierâ Judaia tiki mâreŋko hae moc ŋewec ira rawec. 40 Ra fisirâ Zakariare ficko ferâ Elisabete mu ʒeri ecnewec. 41 Mu ʒeri ecneme manahame izia bumaŋnao motec e kiwaewec. Eme Tiri Mârozi Elisabete ere maŋko hurâ fuseme^* 42 dâŋ bafehuc ʒiŋuc âzâcnewec: “Ŋokac âgo‐nâŋec gore manape sâc moc eme mumbiaŋgukopac â bumaŋgao fuajec fokac e wâc iŋuc jaha mumbiaŋkekopac.^* 43 Go Wofuŋ‐nanere neŋgoczi wemo biaŋ‐nanere norao warekomec? 44 Mu ʒeri enaretec hazec‐naneo hume bumaŋ‐naneo moteczi kiwaekac. 45 Go Wofuŋte biŋedâŋ gazakicne irec fârine fuaocmu manapaŋkemeŋte gore manape ʒerine ekac.”^*

Mariazi ʒeri mumuteŋ dâŋ muwec

46 Eme Mariazi kecʒiŋuc muwec:

“No maŋ qâqâtâc‐nanezi Wofuŋ muafeckekopac,^*

47 â maŋnanezi Anutu bâbapiaŋ‐nane ʒeri ecnekopac.

48 E kiŋaŋ naru‐ticne waha qaqane no bafecnukacte

ŋic gurune gurune nore manapie ʒerine eocmu.^*

49 E bapafârezi norao mâsi sâko bakac hâcne.

Ʒâŋe biŋe‐ticne tiri jaha fokac.^*

50 Araŋ bacneeŋgopieŋ jaŋe maŋuruc‐ticnere erâ

mimiŋzi ɋâric ehâmo‐jareekac.^*

51 E tâpiri‐ticnere fuŋne bâfuahuc

maŋfefe jueŋgopieŋ jaŋe bâtâtiec‐jopaekac.^*

52 E ŋicbomboŋ sâko jaŋe popoonec tuŋjopame wahahapie

hujukicne jaŋe bafec‐joparâ toŋko râec‐jopakac.^*

53 E roroc hapetac jaŋe wiac bâmâckehuc jare gumec ekac,

â mafa sâkohec behec‐jopame qarâ suriŋne juŋgopieŋ.^*

54 Erâ Israe kiŋaŋ ŋicfâc‐ticne

maŋuru‐ticnere roroŋ fâre‐nârekac.^*

55 Mimiŋnefâc‐nâŋec, Abraham â ɋâricfâcne, jurahuc juniŋmu,

jaŋe dâŋ jazawec irec fârine fuakac.”^*

56 Eme Maria e mosa jahec â moc Elisabetehec juku hae‐ticnao risie rawec.

Johane fuawec

57 Elisabete e dameŋ‐ticne maickeme motec rowec. 58 Eme haefâc‐ticne â mame sâkofâc‐ticne jaŋe Wofuŋzi maŋuruc‐ticnere fuŋne erao bataniŋkewecte manarâ ehec mâmâc bubiaŋ manambiŋ. 59 Izi ʒoaŋ gie bapa 8 tarame jaŋe tumaŋnerâ motec sahacnao Wofuŋte ma barâ mamac‐ticne Zakaria ere wase bazo mumbiŋ.^* 60 Eme neŋgoc‐ticnezi qatara‐jarerâ muwec, “Aricne, ʒâŋene Johane muzo.”^* 61 Mume ʒiŋuc âzâcnembiŋ: “Hâc, mame sâkofâcge jaŋerao ʒâŋe wase iŋucne moc mi fokac.” 62 Qaqatarac erâ Zakaria e motecte ʒâŋe muocte ecnepie 63 tafere ejareme râcnepie fainao ʒiŋuc qâreŋkewec: “Ʒâŋe‐ticne Johane.” Iŋuc qâreŋkeme jaŋe manapie moc eha 64 izia nameŋne risieme dâŋ dâŋ ehuc Anutu muteŋkewec. 65 Eme hae rârec rârec ŋic jurambiŋ jaŋe dâŋ binaŋ i manapie hâhâwicne ewec. Eme Judaia tiki mâreŋko binaŋ miczi mic nazaŋ gazaŋ efârembiŋ. 66 Eme manambiŋ jaŋe dâŋ i maŋke juhuc ʒiŋuc mumbiŋ: “Motec iŋucnezi sokarâ weniŋuc eocmu?” Eme Wofuŋzi dopecke sapec ecneha juwec.

Zakariazi findaŋdâŋ muhuc Wofuŋ muteŋkewec

67 Eme mamac‐ticne Zakaria e Tiri Mârozi maŋne fusucmame findaŋdâŋ kecʒiŋuc muwec:

68 “Israe ŋic nâŋâc Wofuŋ‐nâŋec Anutu muteŋkenaŋ.

Eki hâcne ŋicfâc‐ticne iqic‐nâporâ kitâc‐nâpokac.^*

69 Ehuc kiŋaŋŋic‐ticne Dawidi ere ɋâricfâc nâŋâcnao

bâbâpiaŋte wâtuŋ moc âkendâŋnekac.^*

70 Mârâc jaha porofetefâc‐ticne ejareme

findaŋdâŋ mujumbieŋ sâc iŋuc hâcne fuakac.

71 Eki kisâ enârehuc qaisoc‐nâpoeŋgopieŋ

jaŋeraonec hâcne batarac‐nâpoocmu.^*

72 Mimiŋnefâc‐nâŋec jaŋehec tiri ʒâʒâfic sanaŋ ewecte

manasuc‐jopahuc maŋuruc‐ticnere iŋuc enâreocmu.

73 Apa‐nâŋec Abraham mupaŋkecnewecte^*

74 râsifâc‐nâŋec jaŋeraonec batarac‐nâpoocmu hâcne.

Iŋuc enâreme âke mâteŋ‐nâpoha^*

75 maŋfuru â bahac fâsâc juhuc

kiŋaŋ qacnehuc juku hâmonʒepeneŋ.

76 Erâ motec go hâcne Femicne sâko ere porofete erâ jucmu,

ehuc Wofuŋte biŋe muhuc hata bâʒâwecnecmu.^*

77 Erâ ŋicfâc‐ticne bâbâpiaŋte dâŋ jaza qazuc etecne

mana ʒakiepie sâqocne‐jeŋic tâmireocmu.^*

78 Anutu‐nâŋec e maŋuruc‐ticne kâcɋene sâko fokacte

mume faickonec furic râehuc^*

79 dapâcko â hâmoc uupicko ŋeŋene nâŋâc bataniŋ‐nâpokac.

Ehame wamare hata fuame honehuc sâcne âtenaŋmu.”^*

80 Eme motec e sahaczi â maŋzi soka sanaŋ ewec. Erâ mâreŋ tuhuo juhame gie dameŋ‐ticne maickeme Israe ŋic jaŋerao fua tâcnewec.^*