Johane mamac‐ticne ʒâŋene Zebedaio â neŋgoc‐ticne Salome. Hahac‐ticne ʒâŋene Jakobo. Jaŋe Galilaia mâreŋko jumbiŋ. Hahac ɋazi mamac‐jekic bafickepire Genesarete riqicko qowi rojumbieŋ. Johane â Jakobo jahe Johane Miti Opâ fufuŋkezi fua tâcneme erao ra jupic. Eme eki juku motecfâcne Jesu jowatume jahe manarâ izia Jesurao rapic (Johane 1:37-40). I Judaia mâreŋko ekicne. Eme irecnec raku Galilaia mâreŋko fisirâ qowi gie mocwâc bahapire Jesu ijaha fisirâ hefârec‐jofame jahe mamac‐jekic â woke qowi beherâ Jesu bâjâpehuc jupic (Mareko 3:17). Johane â hahac‐ticne jahe ŋic ʒocne fârone, irec dameŋ mocko Jesuzi Samaria ŋic jaŋerao sambâŋkonec ʒoc mume wahaocte âzâcnepic (Luka 9:54). Ʒoaŋ mocko neŋgoc‐jekiczi Jesurao rarâ ʒiŋuc muhuc numucnewec: Juku Wofuŋ Sâko fua tâcnezokic dameŋ ira manatec ŋokâ jahec‐nane gâjoŋgao ŋifec â ŋifec ŋezepirec (Mataio 20:20). Jesuzi motecfâcne Ŋafe Tiwâ gumec‐jopawec ŋafe ira Johanezi Jesure maŋfuŋko ŋehuc qizec‐ticne Jesure amecko fohorewec (Johane 13:25). Râsi jaŋe Jesu ropie motec gâcne hâbi gogoroŋ ejare‐fâreme wisehapie Johane e mocjahazi Jesu bâjâperâ Hanasi ere sacmaŋko raʒiwec, erâ wâc Goligata ferâ Jesure maripoŋ maŋfuŋnao domawec. Domahame Jesuzi neŋgoc‐ticne Maria hone soŋaŋ ecneocte âzâcnewec (Johane 19:26). Jesu faharewec biŋene manarâ Johane e Petorohec gasackerâ ʒâŋeruŋko rapic (Johane 20:34). Eme juku Jesuzi motec gâcne Genesarete riqicko fua‐jareme Johane eki hâcne biac ʒâŋitawec (Johane 21:7).

Jesu e sambâŋko fehame Johane â Petoro jahe babafic erâ miti gie bahuc jupic. Ehuc ʒoaŋ mocko ŋicpuriŋ moc taha ufuŋ motâcko ŋewec e bâpiaŋkepic (Aposolo 3). Erâ wâc Samaria mâreŋko mâmâc rarâ miti murâ numupire ŋic ŋokac jaŋerao Mâro wahawec (Aposolo 8). Eme Johane eki hâcne Jerusalem haeo Jesure kikefuŋ jumbiŋ jaŋere jâcne erâ juwec. Juku Jerusalem hae tuhutac fuame Johane e Efeso haeo rarâ juwec. Ehuc Paulo â Petoro jahe hâmopicte eki Asia mâreŋ masunao hae sâc miti mamana jumbiŋ jaŋe mamac ejarewec.

Efeso haeo juhame miti ŋic ŋokac jaŋe Johane numucnekupie Jesure binaŋ qâreŋkewec. Jesure motecfâc gâcne hâmo‐fârehapie Johane e buc juhuc miti papia‐ticne qâreŋkewec. Qâreŋkehuc Mataio â Mareko â Luka jaŋere dâŋ hâsine i papia‐ticnao mi râewec. Aricne, i getâckehuc dâŋ furune gâcne fowec i qâreŋkewec. Jesuzi mâsi bawec irec binaŋ ŋic gâcnezi qâreŋkembiŋte i behehuc, mitidâŋ gâcne murawec i mana wosâerâ qâreŋkewec. Â mâsi â eebapa‐ticne gâcne ine moc moc sawa mufuahuc ira iticnerâ Jesure mickonec dâŋ hukicne birine birine ʒuhuckewec. Ŋafeo roniŋte dameŋne maickeme Jesuzi motecfâcne mâzoc‐jopahuc uŋdâŋ â miriŋdâŋ jazawec i â dâŋ gâcne gâcne i Johanezi qâreŋke‐fârewec. Johanezi Jesure Biŋebiaŋ qâreŋkeme hatane moc fuawec irec fuŋne e jahac mufuakac, kecʒiŋuc: “Qâreŋkekicne mac kecʒi ine ʒiŋucte qâreŋkekicne: Ŋoŋe wose manac erâ Jesu e Kristo, Anuture Ŋokâ, dâŋ i mana ʒakienʒepieŋ, erâ e jahacne manasiŋkehuc ʒâŋe biŋe‐ticnere erâ juju sanaŋhec enʒepieŋ” (Johane 20:31).

Papia maŋnao dâŋ neŋgocne birine birine râe rakicne ine kecʒiŋuc: