LUKA
Luka e Judaŋic mâcne, e Helene ŋic. Fufua hae‐ticne Antiokia, Siria mâreŋko. E juku sokarâ hae ira hâcne miti manarâ Jesure kikefuŋ jaŋerao ʒuhuckewec. Gie‐ticne ine dota gie bahuc juwec (Kolosai 4:14). Paulozi miti kiŋaŋ arecne 2 rawec ira hatao bâbâfuac epic. Eme izia Paulo bâjâpehuc miti giere bafickehuc juwec. Paulo e Kaisarea haeo kâpâcwâru ficko ŋeha iqickehuc juwec, â Roma haeo sâc ijaha ecnehuc juwec. Irec Paulo e Timoteo ʒiŋuc qâreŋkecnewec: Ʒi Lukahec buc juekoperec (Timoteo II 4:11).
Luka e Jesure binaŋ papia i ŋicbomboŋ moc ʒâŋene Teofile ere biŋe qahuc qâreŋkewec. Â binaŋ i wenirec manarâ qâreŋkewec? E Jesuhec moc mi jujujec. Irec binaŋ‐ticne qâreŋkeocte ŋic ŋokac Jesuhec jumbiŋ jaŋe mu gufuc ejareme dâŋ binaŋ ecnepie qâreŋkewec. Wiac fuŋgâtânehec hone manac embiŋ jaŋere mickonec hâcne dâŋ manahuc birickewec (Luka 1:2). Erâ ŋic tucnezi Jesure dâŋ qâreŋkepie forawec papia i wosehuc irecnec dâŋ wâc rowec (Luka 1:1). Ehuc Jesure binaŋ sasawa qâreŋkewec izi Jesure fuŋne ʒiŋuc mutaniŋke‐nâre‐hâmokac: E sâqocne bapa âgo enârehuc bâpiaŋ‐nâpoocte wahawec.
Luka e iindiŋ gie sâko bawecte dâŋ furune bocjaha, Mataio â Mareko jaherao mi fokac, iŋucne bâfuarâ qâreŋkewec wâc. Ine ʒiŋuc: Zakaria â Elisabete jahere binaŋ, â aŋelo Gabiriezi Maria fuacnewec (gaŋ 1). Jesure fufua, Simeoŋ â Hana jahere binaŋ, â Jesu motec hombaŋte Jerusalem haeo fewec (gaŋ 2). Naiŋ haeo motec moc hâmockonec bâɋârewec, erâ ŋokac moczi Jesu kike‐ticne opâ âsu ruacnewec (gaŋ 7). Ŋic moczi kisâ‐ticne ehâmocnewec, erâ Maria â Mata jahere binaŋ (gaŋ 10). Mitiŋic jopa sipiric ekicne (gaŋ 11). Kiŋaŋ motec qâomane, erâ Jesuzi ʒoc bawahawec irec dâŋ (gaŋ 12). Situâc soŋaŋ hehesicne, erâ mafaŋic â Lazaro jahere binaŋ (gaŋ 16). Ŋic 9 fâsâerâ qâoma embiŋ (gaŋ 17). Kia râŋgeŋne, erâ Farisaio â moneŋ roro (gaŋ 18). Zakaio ere binaŋ, â Jesuzi Jerusalem hae honehuc kiowec (gaŋ 19). Motec jajahec Emausi haeo rahapire Jesuzi fua‐jactewec (gaŋ 24). Binaŋ ʒâŋene wosekopac sasawa i Luka bucticne, â gâcne ine Mataio â Mareko jahe qâreŋkepic ijaha qâreŋkewec, me qâreŋkepic irec heririŋne qâreŋkewec.
Lukare papia maŋnao dâŋ birine birine kecʒiŋuc forakac:
Gaŋ 1–2. Johane Miti Opâ fufuŋke ere binaŋ â Jesu motec fuawec, erâ Simeoŋ â Hana jahere dâŋ â Jesu motec hombaŋte Jerusalem haeo fewec.
Gaŋ 3:1–4:13. Johane gie‐ticne fuŋkewec â Jesu Miti Opâ ruacnewec.
Gaŋ 4:14–9:50. Jesu e Galilaia mâreŋko gie bawec.
Gaŋ 9:51–19:27. Jesu e rac warec ehuc gie barâ juku Jerusalem haeo feocte rawec.
Luk 19:28–Luk 21. Jerusalem haeo ferâ gie‐ticne batarawec.
Gaŋ 22–24. Jesu e ʒâic mana raku maripoŋko hâmowec, erâ hâmockonec faharewec.