Niɡ̶ica João naɡ̶a idí naɡ̶adi notaɡ̶anaɡ̶axi, niɡ̶icoa nokododi loiigi Ǥoniotagodi eliodi moiatetibece inatawece iiɡ̶o. Eliodi anonigodi, ica eledi boɡ̶oniwilotiniwace. Niɡ̶icoa nokododi João joɡ̶oxiiɡ̶odi, odaa joɡ̶oyokoleticogi minitaɡ̶a lidelocawaanigi anodita Patmos leeɡ̶odi me yatematitedibece nibodicetedi aneetece Cristo.

Liwigo Aneotedoɡ̶oji eote João mijoa icoa lakataɡ̶a micataɡ̶a daɡ̶a ligeedi. Niɡ̶ica naɡ̶a nadi icoa lakataɡ̶a, Ǥoniotagodi Jesus ja dinikeeteta, odaa ja iiɡ̶e me didikotibige icoa seete lapoli loiigi Cristo. Niɡ̶idiaaɡ̶idi João ja nadi lapotibece ica anodoɡ̶etetibige Aneotedoɡ̶oji iniaa Ǥoniotagodi Jesus. Niɡ̶idiaaɡ̶idi João ja nadi icoa aanjotedi anonadeegitedinigi iiɡ̶o icoa nawikodico Aneotedoɡ̶oji anicota me niiɡ̶etedini digoina iiɡ̶o niɡ̶ica nige owidijedi nokododi leeɡ̶odi libeyaceɡ̶eco oko. Codaa aaɡ̶aɡ̶a nadi Aneotedoɡ̶oji anigotediogi diaabo, inaaɡ̶inoa niwicidi abeyacaɡ̶aɡ̶a, codaa me niɡ̶ina oko anidioka limedi me nakapetegi Aneotedoɡ̶oji. Niɡ̶ica owidijegi ane nadi, nadi ica gela ditibigimedi, icaaɡ̶ica gela iiɡ̶o, acaaɡ̶aca gela nigotaɡ̶a anodita Jerusalém Aneotedoɡ̶oji ane yoetetema loiigi. Ane leeɡ̶odi João me idí naɡ̶adi notaɡ̶anaɡ̶axi leeɡ̶odi me yemaa meo loniciwaɡ̶a me datitetiniwace niɡ̶ina minoa ane dakaketema, codaa me datitetiniwace me deɡ̶eyamaɡ̶aticoace meniwaɡ̶atakanaɡ̶a, leeɡ̶odi moyowooɡ̶odi Cristo naɡ̶a iɡ̶eke inoatawece ane beyagi. Leeditibige monalaɡ̶atibige niɡ̶icoa anele ane yajigotediogi Aneotedoɡ̶oji nige dopitedijo Jesus.