Abel Abel, Adão liniogi. Abel idioka limedi me yocaɡ̶aneɡ̶e Aneotedoɡ̶oji. Joaniɡ̶idaa leeɡ̶odi Aneotedoɡ̶oji me dibatetege niɡ̶ica liboonigi Abel. Niɡ̶ijo nioxoa anodita Caim nocetema Abel, odaa ica noko Caim ja yeloadi Abel. (Awiniteloco Lucas 11.51; Hebreus 11.4; 12.24).

Abraão Noiigi Israel, ane judeutedi, ida aneetege licoɡ̶egi Abraão. Abraão yocaɡ̶aneɡ̶e Aneotedoɡ̶oji leeɡ̶odi midioka limedi me nakato. Leeɡ̶odi Abraão me nakato Aneotedoɡ̶oji, Aneotedoɡ̶oji jeɡ̶eote ligegite meote Abraão me nelokodi eliodi noiigi. Aca lodawa Abraão liboonaɡ̶adi Sara. Sara ajo aca liota ane liboonaɡ̶adi Agar. Sara gojoloɡ̶o, joaniɡ̶idaa leeɡ̶odi naɡ̶a yajigota Abraão me lodawiwaɡ̶a Agar eotibige mica lionigitege, odaa niɡ̶ica lionigi Agar ja micataɡ̶a daɡ̶a lionigi Sara. Joaniɡ̶idaa niɡ̶ijo Ismael, lionigi Agar. Niɡ̶ijo Abraão ajaa Sara naɡ̶a laxokodipi, Aneotedoɡ̶oji jeɡ̶eote ligegitediogi meote mica lionigi. Odaa Aneotedoɡ̶oji jeɡ̶eote ɡ̶odoxiceɡ̶edi, odaa jiɡ̶ijo Isaque, lionigi Sara. (Awiniteloco Mateus 3.9; João 8.31-59; Atos 7.2-8; Romanos 4; Gálatas 3.6-9; Hebreus 11.8-12; Tiago 2.21-24).

Adão Aneotedoɡ̶oji eote niɡ̶ijo odoejegi ɡ̶oneleegiwa ane liboonaɡ̶adi Adão. Niɡ̶idiaaɡ̶idi jeɡ̶eote yoetetema lodawa ane liboonaɡ̶adi Eva. Adão ajaa Eva maleekoka idi aɡ̶owo ane beyagi. Pida ica noko Eva ja yotigimade ane liiɡ̶enatakaneɡ̶egi Aneotedoɡ̶oji. Joaniɡ̶idaa leeɡ̶odi me nigo, odaa inatawece oko nawikodeeɡ̶a neɡ̶epaa nigo, leeɡ̶odi okotawece ida anejinaɡ̶atege licoɡ̶egi Adão ajaa Eva.

Agar Agar, Sara liota. (Awiniteloco ane yalaɡ̶ata Abraão).

Alfa Alfa odoeje nileetra nialfabeeto greegotedi, odaa Ómega boɡ̶owidijegi. Jesus oyatedigi me “Alfa”, leeɡ̶odi jiɡ̶ijaa odoejegi codaa me daɡ̶axa me ɡ̶oneɡ̶egi liwigotigi inoatawece aninoa digoida ditibigimedi codaa me digoina iiɡ̶o. Iniokiniwatedi Eliodi me daɡ̶axatece me ɡ̶oneɡ̶egi. Jiɡ̶ijaaɡ̶ijoa Niɡ̶icoa Aneotedoɡ̶oji ane niiɡ̶e meote inoatawece analeeɡ̶inoa. Jesus aaɡ̶aɡ̶a oyatedigi me “Ómega” leeɡ̶odi jiɡ̶ijaaɡ̶enagi niɡ̶ica nigowidijegi noko me igodi libakedi baanaɡ̶a yojogotedini meote ɡ̶odewiɡ̶a gela, odaa ja yaaɡ̶adi niɡ̶ina anodakapetege Aneotedoɡ̶oji. (Awiniteloco Apocalipse 1.8; 21.6; 22.13).

Amém Amém ligegi hebraicotedi niɡ̶ina anejinaɡ̶ata “Ewi, niɡ̶idaaɡ̶ee!” Elioditibece me jibakenaɡ̶a niɡ̶ida nigegi niɡ̶ina me ɡ̶odiwoditema ane ligegitalo Aneotedoɡ̶oji niɡ̶ina ane yotaɡ̶aneɡ̶e. Jesus aaɡ̶aɡ̶a oyatedigi me “Amém” leeɡ̶odi eote inoatawece ane yemaa Eliodi. (Awiniteloco Apocalipse 3.14).

Ametista Wetiɡ̶a anida niwaló. Naɡ̶ani wetiɡ̶a one nolidigo-lawoɡ̶o. (Awiniteloco Apocalipse 21.20).

Arão Arão ida aneetege licoɡ̶egi Levi. Jiɡ̶ijaaɡ̶ijo niɡ̶ica odoejegi ɡ̶oneleegiwa Aneotedoɡ̶oji ane ixotedio me sacerdoti. Arão, nioxoa liidaɡ̶a Moisés, jiɡ̶ijaa yaxawa Moisés monoɡ̶aticogi israelitatedi digoida Egito. Niɡ̶ijo Moisés me notawaanigitice, niɡ̶ijo noiigi Israel joɡ̶odipokota Arão meo yoe niwigo liciagi wacawaanigi modoɡ̶eteta. (Awiniteloco Atos 7.40; Hebreus 5.4; 7.11).

Areópago Areópago liboonaɡ̶adi lojotaɡ̶adi ane idei manitaɡ̶a nigotaɡ̶a Atenas ane latecaɡ̶aditibece lacilodi naɡ̶ani nigotaɡ̶a. Odaa niɡ̶ica lapo ɡ̶oneleegiwadi ane yatecoɡ̶o idaaɡ̶aɡ̶oyatigi me “Areópago”. (Awiniteloco Atos 17.19-22).

Baal Baal one niwigo noenatagi. Maleedaɡ̶a yajigotediogi Aneotedoɡ̶oji israelitatedi niiɡ̶o Canaã, niɡ̶ica noiigi anidiaa liɡ̶eladi odoɡ̶eteta Baal. Niɡ̶ijo niɡ̶idiaaɡ̶aɡ̶a liɡ̶eladi israelitatedi, odaa jaɡ̶aɡ̶a odoɡ̶eteta niɡ̶ijo niwigo anodita Baal, odaa Aneotedoɡ̶oji elioditibece me yelatetema codaa me iloikatidi.

Babilônia Babilônia one opake mani me nigotaɡ̶a. Jiɡ̶idiaa liɡ̶eladi ica inionigi-eliodi loniciweɡ̶enigi. Niɡ̶icoa niodaɡ̶awadi eliodi moiɡ̶eke eletidi niodaɡ̶awadi eletidi iiɡ̶otedi, odaa eliodi oko anoyadeegiticogi Babilônia moiotagetibigiwaji. Aneotedoɡ̶oji iloikatidi noiigi Israel leeɡ̶odi libeyaceɡ̶eco, odaa joaniɡ̶idaa naɡ̶a ika mijo anoyadeegiticogi Babilônia. Odaa jiɡ̶idiaaɡ̶iticoace seteenta nicaaɡ̶ape. Noiigitigi Babilônia anaɡ̶axakenaɡ̶aɡ̶a codaa nakapetegi Aneotedoɡ̶oji. Joaniɡ̶idaa leeɡ̶odi naɡ̶ani nigotaɡ̶a moiciaceeketege niɡ̶ina oko digoina iiɡ̶o anicota modakapetegi Aneotedoɡ̶oji nigowidijedi nokododi. (Awiniteloco 1 Pedro 5.13; Apocalipse 14.8; 16.19; 17.5; 18.2-24).

Balaão Balaão inaaɡ̶ina ane yeloɡ̶oditedibece lowooko Aneotedoɡ̶oji niɡ̶ica jotigide. Pida daɡ̶axa me yemaa dinyeelo, odaa ja ika meo Aneotedoɡ̶oji libakedi. (Awiniteloco 2 Pedro 2.15; Judas 11; Apocalipse 2.14; Números 22–24).

Belzebu Belzebu eledi liboonaɡ̶adi Satanás, lacilo niwicidi abeyacaɡ̶aɡ̶a. Niɡ̶ida liboonaɡ̶adi domaɡ̶a liciaceekawa niɡ̶ina nigegi anejinaɡ̶ata “Niotagodi niɡ̶ina ane napioi.” (Awiniteloco Mateus 10.25; 12.24).

Benjamim Benjamim, looxoxegi me lionigi Jacó. (Awiniteloco Atos 13.21; Romanos 11.1; Filipenses 3.5; Apocalipse 7.8).

Berilo Wetiɡ̶a anida niwaló, one imakataɡ̶atiwaɡ̶a mokoo. (Awiniteloco Apocalipse 21.20).

Caim Caim odoejegi lionigi Adão ajaa Eva. Anee lewiɡ̶a ayocaɡ̶aneɡ̶e Aneotedoɡ̶oji. Jeɡ̶epaa yeloadi niɡ̶ijo nioxoa anodita Abel. (Awiniteloco Hebreus 11.4; 1 João 3.12; Judas 11).

Calvário Calvário liboonaɡ̶adi lototaɡ̶adi ane ideitice we nigotaɡ̶a Jerusalém anoyelite Jesus moyototedeloco nicenaɡ̶anaɡ̶ate moyeloadi. (Awiniteloco Marcos 15.22; Lucas 23.33; João 19.17).

Canaã Canaã liboonaɡ̶adi nipodigi Aneotedoɡ̶oji ane ligegite Abraão me yajigotediogi anida aneetege licoɡ̶egi, ane noiigi Israel. Niɡ̶icoa nokododi Canaã eledi oyatigi me Israel, codaa me Palestina. (Awiniteloco Mateus 15.22; Atos 7.11; 13.19).

César Ijoatawece ane ninionaɡ̶a-eloodoli romaanotedi idokoyatigi me César.

Cevaada Cevaada one nawodigije ane domaɡ̶a liciagi leyeema. Aneneɡ̶egi liweenigi niɡ̶inoda madewetedipi inaa eijedi. (Awiniteloco Apocalipse 6.6).

Circuncidar Lakatigi judeutedi moyakagidi nolaadogo nigaanigawaanigi, niɡ̶ina naɡ̶a ixomaɡ̶atedijo oito nokododi menitini. Aneotedoɡ̶oji liiɡ̶enatakaneɡ̶egi moikee niɡ̶idi nigaanigawaanigi mida aneetege loiigi Aneotedoɡ̶oji niɡ̶ijo jotigide. Paulo eliodi me diiɡ̶axinaɡ̶atece me daɡ̶adiaa leeditibige loiigi Aneotedoɡ̶oji me dinakagiditibigiwaji moikee me nepilidi. (Awiniteloco Atos 15.5-12; Romanos 2.26; 4.9-12; Gálatas 5.6; 6.15; Colossenses 3.11).

Coré Coré onida aneetege noiigi Israel niɡ̶ijo midiaaɡ̶iticoace miditaɡ̶a niɡ̶ijo nipodigi ane yadilo ane diɡ̶ica niɡ̶eladimigipi, nipodigi anodita Sinai. Coré domaɡ̶a yemaa me iiɡ̶e loiigi modakapetege Moisés ijaa Arão. Pida Aneotedoɡ̶oji jeɡ̶eote me domoketi niɡ̶ica iiɡ̶o aneitice Coré, ijaa loiigiwepodi, icaaɡ̶ica anodioteci lowooko. Odaa ijotawece yapoɡ̶oditiniwace iiɡ̶o. (Awiniteloco Judas 11).

Crisólito Crisólito liboonaɡ̶adi icoa wetiadi ane diniwaloe, iɡ̶owiwaɡ̶a mokoo. (Apocalipse 21.20).

Crisópraso Wetiɡ̶a aneliodi me niwaló, iɡ̶owa mokoo icoa niwaxiinaɡ̶ajetecidi iɡ̶owi. (Awiniteloco Apocalipse 21.20).

Cristo Cristo, Messias niitege niɡ̶ina anejinaɡ̶a “oko anoyatita lajidi oliveira lacilo”. Niɡ̶ida anodigo ikee Aneotedoɡ̶oji me iomaɡ̶aditedice codaa me yajigote loniciwaɡ̶a meo libakedi. Odaa Jesus jiɡ̶ijaaɡ̶ijoa niɡ̶ica oko Aneotedoɡ̶oji ane iolatedice codaa me yajigote loniciwaɡ̶a me Ǥonewikatitoɡ̶odi.

Davi Davi ninionigi-eliodi noiigi Israel ane daɡ̶axa me ɡ̶oneɡ̶egi. Aneotedoɡ̶oji eliodi me ibinie Davi, codaa ninitedibece niɡ̶ina me nadi. Davi owidi idí enaco me doɡ̶etetibigimece Aneotedoɡ̶oji. Jesus ida aneetetege licoɡ̶egi Davi.

Dez Cidades Oyatigi ica lapo icoa deez nigotadi anipegitege niweiigi Galiléia, diɡ̶etedicogi ane icoɡ̶oticogi aligeɡ̶e menodi. Niɡ̶ica niɡ̶eladimigipi niɡ̶idiwa nigotadi aona judeutedi. (Awiniteloco Mateus 4.25; Marcos 5.20; 7.31).

Diácono Oko anoixotio loiigi Cristo me doweditelogo owidi nibaketedi miditaɡ̶a loiigi Ǥoniotagodi. Niɡ̶ini oko dowediteloco wajekalodipi, codaa me niɡ̶ina oko aninoa laɡ̶alanaɡ̶a. Elioditibece maɡ̶aɡ̶a oyeloɡ̶oditedibece codaa modiiɡ̶axinaɡ̶atece lotaɡ̶a Aneotedoɡ̶oji. (Awiniteloco Atos 6.1-6).

Diana Diana liboonaɡ̶adi aca niwigo ɡ̶oneɡ̶etigi nigotaɡ̶a Éfeso aneitice ica liɡ̶eladi nelegi aneiticoace oko modoɡ̶eteta. Moditibece mone icoɡ̶otibigimece ditibigimedi menitini. Eliodi oko digoida Éfeso odinigaanyetece owidi dinyeelo monoetedini niwicidawaanaɡ̶a liwicidi Diana codaa me liwicidi liɡ̶eladi. (Awiniteloco Atos 19.21-41).

Ditibigimedi Niɡ̶ica ditibigimedi liɡ̶eladi Aneotedoɡ̶oji icaaɡ̶icoa liotaka. Niɡ̶ica ditibigimedi aoniɡ̶ica nawikodigi oteɡ̶exaaɡ̶aɡ̶a némaɡ̶a, pida inokina anele codaa me niɡ̶inoa ane libinienaɡ̶a. Jiɡ̶idiaaɡ̶i Aneotedoɡ̶oji me ilakidetedi aneyate loiigi anigida noko.

Diizimo Diizimo one oninitece liwai niɡ̶icoa deez liwailidi lawodigijedi, codaa me neijedi judeutedi anoibootalo Aneotedoɡ̶oji. Odaa niɡ̶idiwa nidiizimotedi ja yaxawa ane nibaaɡ̶atigi Aneotedoɡ̶oji liɡ̶eladi, codaa wajekalodi, inaaɡ̶ina iomiɡ̶igipi. Niɡ̶inoa nokododi eliodi oko anida aneetege loiigi Cristo oyajigo nidiizimo me dinyeelo codaa me niɡ̶inoa eletidi ane nigaanye.

Egito Egito iiɡ̶o anipegitege niiɡ̶o Israel, odaa noiigi anidiaa liɡ̶eladi liboonaɡ̶adi egípciotedi. Jacó jiɡ̶idaa iiɡ̶eticogi lionigipi modinoojetetigi leyeema. Niɡ̶idiaaɡ̶idi niɡ̶ijo lionigi Jacó anodita José joɡ̶oniwilo digoida Egito, pida Aneotedoɡ̶oji jeɡ̶eote José me lacilo-nelegi egípciotedi. Niɡ̶idiaaɡ̶idi egípciotedi joɡ̶oiotage noiigi Israel niɡ̶icoatigilo 400 nicaaɡ̶ape. (Awiniteloco Atos 7.34-38).

Elias Elias inaaɡ̶ina ane yeloɡ̶oditedibece lowooko Aneotedoɡ̶oji, eliodi notoetiigi codaa mabo laaleɡ̶ena. Noiigi Israel odiletibige Elias diɡ̶icotaca me dopitacijo maleediɡ̶icatibige deɡ̶enagi Cristo. Jesus iciaceeketetege João Batista, Elias. Elias ijaa Moisés ijo me dinikeetibigiwaji maditaɡ̶a aca wetiɡ̶a aneite Jesus, niɡ̶ijo naɡ̶a diniigi latobi, odaa ja datale liciagi Aneotedoɡ̶oji me datale. (Awiniteloco Mateus 11.14; 17.3-13; 27.47-49; Tiago 5.17).

Epicureu Epicureu niɡ̶ina ane-diotece lowooko ica Epicuro, ica greego ane diiɡ̶axinaɡ̶atece me daɡ̶axa mele niɡ̶ina oko me ninitibigiwaji codaa me niɡ̶ina me daɡ̶adiaa nawikodeeɡ̶a oteɡ̶exaaɡ̶aɡ̶a doitibigiwaji. (Awiniteloco Atos 17.18).

Esaú Isaque ajaa Rebeca ijoa icoa nowaatitedi. Niɡ̶ica odoejegi anenitini Esaú, odaa niɡ̶idiaaɡ̶idi jaɡ̶aɡ̶a enitini Jacó. Esaú anakato Aneotedoɡ̶oji anee niɡ̶ijo eliododipi monakato. Joaniɡ̶idaa leeɡ̶odi Aneotedoɡ̶oji me iolatedice Jacó me eniodi loiigi Aneotedoɡ̶oji. (Awiniteloco Romanos 9.10-13; Hebreus 11.20; 12.16-17).

Esmeralda Wetiɡ̶a okoo aneliodi niwaló. (Awiniteloco Apocalipse 4.3; 21.19).

Estóico Estóico oyatigi oko ane-diotece lowooko ica lapo noiigi greego, anodiiɡ̶axinaɡ̶atece me daɡ̶axa mele me jajacaɡ̶ata lidaɡ̶ataka ɡ̶odolaadi, codaa me daɡ̶a jiwaɡ̶atece ɡ̶olidekeco, codaa me daɡ̶a jikanaɡ̶a daɡ̶a ɡ̶odiiɡ̶eke anigetiɡ̶ida ɡ̶odawikodigi. (Awiniteloco Atos 17.18).

Eva Eva liboonaɡ̶adi naɡ̶ajo iwaalo Aneotedoɡ̶oji aneote me lodawa Adão.

Faraó Faraó boonaɡ̶adi anowo me liboonaɡ̶adi ijoatawece ane ninionaɡ̶a-eloodoli niiɡ̶o Egito. Onica ica Faraó ane daɡ̶a domaɡ̶a yemaa noiigi Israel me noditicoaci niiɡ̶o Egito, odaa eo meliodi me nawikodeeɡ̶a. (Awiniteloco Hebreus 11.23-29).

Fariseu Fariseutedi, lapo noiigi judeutedi ane dinoniciwaɡ̶aditibigiwaji moyotete lajoinaɡ̶aneɡ̶eco Moisés, codaa me niɡ̶icoa lakataɡ̶a laamipi. Oyiwaɡ̶adi micotace Aneotedoɡ̶oji meote me newiɡ̶atace émaɡ̶aɡ̶a, codaa oyiwaɡ̶adi midiwa icoa liidaɡ̶atajedi Aneotedoɡ̶oji ane ideite digoida ditibigimedi. Eliodi manaɡ̶axakenaɡ̶aɡ̶a codaa odiletibige doɡ̶onaɡ̶axateloco inatawece eledi oko.

Festa das Barracas Lalokegi judeutedi moyalaɡ̶atibige laamipi mijo modiɡ̶eladetigi balaacogoli modiniwiajeticogi niiɡ̶o Canaã, Aneotedoɡ̶oji naɡ̶a noɡ̶atedicogi niiɡ̶o Egito. Niɡ̶ida lalokegi yadeegi onidatece semaana, odaa niɡ̶ijo noiigi odakatiwece nibalaacogoli anodabiteɡ̶etini me nalooɡ̶o. (Awiniteloco João 7.2).

Festa da Colheita Lalokegi noiigi judeutedi moyalaɡ̶atibige Aneotedoɡ̶oji me yajigotediogi liiɡ̶enatakaneɡ̶eco. Niɡ̶ida nalokegi nakatio noɡ̶oigodi monopilaɡ̶aditio leyeema. Eledi liboonaɡ̶adi niɡ̶ida nalokegi, Pentecostes. (Awiniteloco Atos 2.1; 20.16; 1 Coríntios 16.8).

Festa da Dedicação Lalokegi noiigi judeutedi moyalaɡ̶atibige laamipi noɡ̶odabiteɡ̶etacini nameeja Aneotedoɡ̶oji naɡ̶ajo anijo moyaaɡ̶adi laxakawepodi. Nalooɡ̶o oito nokododi. (Awiniteloco João 10.22).

Festa dos Pães sem Fermento Lalokegi noiigi judeutedi moyalaɡ̶atibige laamipi moyoe paontedi ane diɡ̶ica labookojegi niɡ̶ijo naɡ̶a dinagetibigiwaji me noditicoaci Egito. Niɡ̶ida nalokegi yadeegi seete nokododi. Baɡ̶abotege maleekoka dinojogotini lalokegi Páscoa. (Awiniteloco Mateus 26.17; Marcos 14.1, 12; Lucas 22.1, 7; Atos 12.3; 20.6).

Festa da Páscoa Aneotedoɡ̶oji iiɡ̶e noiigi judeutedi mowo niɡ̶ida nalokegi moyalaɡ̶atibige naɡ̶a noɡ̶atedicogi loiigi niiɡ̶o Egito aneiticoace moiotagetibigiwaji. Niɡ̶ijo maleekoka nalooɡ̶o niɡ̶ina dinoiigiwepodi oyeloadi waxacoco owotibige me daɡ̶a nigodi lionigipi liidaɡ̶a niɡ̶ica aanjo ane ɡ̶odeloadi. (Awiniteloco Mateus 26.17, 19; 1 Coríntios 5.7).

Fiigo Naɡ̶aca fiigo one lidi mani me niale-ela. Noiigi Israel eliodi moyeligo. Me nowookonaɡ̶a naɡ̶aca fiigoigo oiciaceeketege noiigi Israel. (Awiniteloco Mateus 7.15; 11.20, 21; 21.19, 21; 24.32; João 1.48, 50; Tiago 3.12).

Gentiotedi Inatawece noiigi ane daɡ̶a judeu jiɡ̶inaaɡ̶oditiogi me “gentiotedi”. Aneotedoɡ̶oji iomaɡ̶aditedicoace judeutedi me loiigi. Joaniɡ̶idaa leeɡ̶odi judeutedi modiletibige daɡ̶a daɡ̶axa meletibigiwaji caticedi niɡ̶ina eledi noiigi. Aɡ̶ica mowo niɡ̶ina gentiotedi, idokoyatigi me necexodi. (Awiniteloco Mateus 15.21-28; Atos 9.15; 11.1-21; Romanos 1–3; Gálatas 2; Efésios 2.11-22; Colossenses 3.11).

Gogue e Magogue Ica Ezequiel aninaaɡ̶ina ane yeloɡ̶oditedibece lowooko Aneotedoɡ̶oji niɡ̶ijo jotigide. Ezequiel ijo ica lakatigi ane micataɡ̶a daɡ̶a ligeedi, nadi ica inionigi-eliodi ane liboonaɡ̶adi Gogue ane icoɡ̶oticogi iiɡ̶o ane liboonaɡ̶adi Magogue. Gogue ja igo me ideleɡ̶e loiigi Aneotedoɡ̶oji. Odaa Gogue liciagi icoatawece niɡ̶icoa laxakawepodi loiigi Aneotedoɡ̶oji anigotibece moiwitideɡ̶e loiigi Aneotedoɡ̶oji, niɡ̶ida owidijegi niwitideɡ̶egi nigowidijedi nokododi.

Gomorra Gomorra nigotaɡ̶a Aneotedoɡ̶oji baanaɡ̶a yaaɡ̶adi yatite noledi. (Awiniteloco Sodoma).

Ǥoneleegiwa ane icoɡ̶otibigimece ditibigimedi Jesus idoka dinanatedigi me “Ǥoneleegiwa ane icoɡ̶otibigimece ditibigimedi”. Daniel anijo me nadi micataɡ̶a daɡ̶a ligeedi, icoɡ̶otedibigimece miniwataɡ̶a Aneotedoɡ̶oji, ibake idatawece loniciwaɡ̶a codaa me naɡ̶atetigi Aneotedoɡ̶oji. Daniel inaaɡ̶ina ane yeloɡ̶oditedibece lowooko Aneotedoɡ̶oji. Niɡ̶ina mecalaye nioladi modi “Filho do Homem”. (Awiniteloco Daniel 7.13; João 3.13, 14; 6; 8.28; Atos 7.56; Apocalipse 1.13).

Grécia Grécia, iiɡ̶o ane liɡ̶eladi greegotedi. Atenas ajaa Coriinto jiɡ̶idiaaɡ̶idiwa niɡ̶icoa nigotadi ane daɡ̶axa me ɡ̶oneɡ̶aɡ̶atigi Grécia. Noiigi greego eliodi modeemitetibige leeɡ̶odi me leegitibigimece me nidikonaɡ̶a codaa minoa lixaketedi, codaa anaɡ̶axakenaɡ̶aɡ̶a. Niɡ̶idi gela liwai lotaɡ̶anaɡ̶axi Aneotedoɡ̶oji maleekoka oidí nioladi greegotedi leeɡ̶odi inatawece oko oyowooɡ̶odi nioladi greego. (Awiniteloco Atos 17.16-34; 1 Coríntios 1–2).

Hebreutedi Hebreutedi eledi liboonaɡ̶adi noiigi Israel. Eneɡ̶egi oyatigi niɡ̶ina judeutedi anodotaɡ̶atigi hebraico, leeɡ̶odi eliodi eletidi judeutedi boɡ̶odotaɡ̶atigi nioladi greego. (Awiniteloco Atos 6.1).

Herodes Herodes liboonaɡ̶adi dinoiigiwepodi ane inionaɡ̶a-eloodoli, ane niiɡ̶enatakanaɡ̶a maleeɡ̶ijoa Jesus digoina iiɡ̶o. Icoatawece niɡ̶icoa Herodetedi ɡ̶oneleegiwadi abeyacaɡ̶aɡ̶a. Niɡ̶ijo Herodes anidokoyatigi me “Nelegi” domaɡ̶a doletibige me yeloadi Jesus malee nigaanigawaanigi. (Awiniteloco Mateus 2). Niɡ̶ijo eledi Herodes ane liboonaɡ̶adi Antipas diiɡ̶enatakata moyeloadi João Batista. (Awiniteloco Marcos 6.14-29). Niɡ̶ijo Jesus naɡ̶a diniwilo jiɡ̶iniaa oiiɡ̶etalo niɡ̶ini Herodes Antipas. (Lucas 23.6-12). Niɡ̶ijo eledi Herodes ane liboonaɡ̶adi Agripa iatetibece loiigi Cristo, codaa diiɡ̶enatakata moyeloadi Tiago, nioxoa João, oyatita nodaajo-ocaɡ̶ataɡ̶a. (Awiniteloco Atos 12.1-23). Odaa ica eledi Herodes iwi anigota Paulo, codaa iiɡ̶eticogi manitaɡ̶a nigotaɡ̶a Roma. (Awiniteloco Atos 25–26).

Hissopo Noiigi judeutedi oibake naɡ̶ada nawodigijawaana aninoa lawoɡ̶o moiticoɡ̶oteloco ninyoɡ̶odi ganigidi anoiwilegi lodoe Aneotedoɡ̶oji. (Awiniteloco João 19.29; Hebreus 9.19).

Isaque Isaque jiɡ̶ijaaɡ̶ijo lionigi Abraão ajaa Sara ane ligegi Aneotedoɡ̶oji me yajigotediogi. Niɡ̶ida liboonaɡ̶adi amina anejinaɡ̶a “nilajikanaɡ̶a”. Isaque lodawa Rebeca, odaa jiɡ̶ijoa nowaatitedi, Esaú ijaa Jacó. (Awiniteloco Atos 7.8; Hebreus 11.9, 17-18).

Isaías Isaías inaaɡ̶ina ane yeloɡ̶oditedibece lowooko Aneotedoɡ̶oji, Isaías ijo ejime 700 nicaaɡ̶ape maleediɡ̶icatibige Jesus deɡ̶enitedini. Eliodi me yalaɡ̶atalo Niɡ̶icoa Aneotedoɡ̶oji ane niiɡ̶e me Ǥonewikatitoɡ̶odi, ane Jesus.

Israel Israel liboonaɡ̶adi Jacó, Aneotedoɡ̶oji aneote. Aneotedoɡ̶oji iolatedice anida aneetege licoɡ̶egi Israel me loiigi.

Jacinto Jacinto wetiɡ̶a ane diniwaloe, iɡ̶owiwaɡ̶a. (Awiniteloco Apocalipse 21.20).

Jacó Jacó ijaa Esaú lionaɡ̶a Isaque. Jacó loxooxegi nowaadi. Ica noko Esaú eyaatema Jacó niɡ̶icoa domaɡ̶a libinico Aneotedoɡ̶oji ane domaɡ̶a yajigote niɡ̶ijo me nionigi liidaɡ̶a. Joaniɡ̶idaa leeɡ̶odi Aneotedoɡ̶oji naɡ̶a iolatedice Jacó me eniodi noiigi judeu. Jacó ijoa iniwataale lodawali, Léia ajaa Raquel, odaa ijoa dooze lionaɡ̶a ɡ̶oneleegiwadi ajaa onajoteci iwaalo. (Awiniteloco João 4.5-6, 12; Atos 7.8, 12, 14-15, 46; Hebreus 11.9, 20-21).

Jaspe Jaspe, wetiɡ̶a ane diniwaloe, anitecibece gaape, aniaaɡ̶eledi ixagodi, pida anitecibece iɡ̶owi, okoo codaa me yapacaɡ̶a. (Awiniteloco Apocalipse 4.3; 21.11, 18-19).

Jeremias Jeremias inaaɡ̶ina ane yeloɡ̶oditedibece Aneotedoɡ̶oji lowooko. Icoa nokododi noiigi Israel odakapetege Aneotedoɡ̶oji, odaa aɡ̶alee oyiwaɡ̶adi liiɡ̶enatakaneɡ̶eco. Odaa Jeremias ja ibodicaxitiogi Aneotedoɡ̶oji micota me iloikatidi, codaa me yadeegitedicogi miditaɡ̶a eledi iiɡ̶o ane leegita me yaladi epaa niiɡ̶o.

Jessé Jessé, eliodi inionigi-eliodi Davi.

Jonas Jonas liotagi Aneotedoɡ̶oji ane iiɡ̶etedicogi manitaɡ̶a nigotaɡ̶a Nínive ane leegita me yetecetice niiɡ̶o Israel. Aneotedoɡ̶oji iiɡ̶e Jonas migo eetiogi niɡ̶eladimigipitigi Nínive me iloikatidi nige daɡ̶a odinilaatece libeyaceɡ̶eco. Niɡ̶eladimigipitigi Nínive laxakawepodi noiigi Israel. Joaniɡ̶idaa leeɡ̶odi Jonas me daɡ̶a yemaa migo, odaa jiɡ̶iale. Niɡ̶ijo me iale, odaa Aneotedoɡ̶oji ja iiɡ̶e ica noɡ̶ojegi nelegi me yalitini Jonas, odaa idiaaɡ̶i catiwedi le niɡ̶ica noɡ̶ojegi nelegi itoatadiɡ̶ida nokododi. Niɡ̶idiaaɡ̶idi Aneotedoɡ̶oji ja noɡ̶atedicogi le niɡ̶ijo noɡ̶ojegi nelegi, odaa Jonas jeɡ̶eyiwaɡ̶adi ane ligegite Aneotedoɡ̶oji, odaa jiɡ̶igo Nínive. Odaa niɡ̶ica niɡ̶eladimigipitigi Nínive joɡ̶odinilaatece libeyaceɡ̶eco. (Awiniteloco Mateus 12.39-41; Lucas 11.29-30, 32).

José Onijoteci niɡ̶ijoa lionaɡ̶a Jacó liboonaɡ̶adi José. Jacó eliodi me yemaa José caticedi niɡ̶ijoa eletidi lionaɡ̶a. Odaa niɡ̶ijo nioxoadipi joɡ̶onocetema, odaa joɡ̶oyaa moiotage digoida niiɡ̶o Egito. Pida Aneotedoɡ̶oji yaxawa José, odaa jeɡ̶eote moixotio me lacilo Egito ane ɡ̶oneɡ̶egi. Odaa ijokijo Faraó me daɡ̶axatace me ɡ̶oneɡ̶egi. (Awiniteloco Atos 7.9-14).

Josué Aneotedoɡ̶oji aika Moisés me dakatiwece niiɡ̶o Canaã ane ligegi me yajigotediogi loiigi. Pida ika mokexaa doleta niiɡ̶o Canaã. Odaa Aneotedoɡ̶oji ja ixotedio Josué me waxodi limedi Moisés me yadeegi loiigi modakatiwece niɡ̶idi iiɡ̶o. Niɡ̶ijo noɡ̶oiɡ̶eke ijotawece eledi noiigi ane liɡ̶eladi iiɡ̶o Canaã, odaa Josué ja yawalacetema niɡ̶idi iiɡ̶o ijotawece anida aneetege licoɡ̶egi lionigipi Israel. (Awiniteloco Atos 7.45; Hebreus 4.8).

Judá Judá eledi lionigi Jacó. Jesus ida aneetetege licoɡ̶egi Judá. (Awiniteloco Hebreus 7.14; 8.8; Apocalipse 5.5; 7.5).

Jupiter Jupiter one lacilo noenoɡ̶ododi greegotedi. (Awiniteloco Atos 14.12).

Lale Niɡ̶inoa inionaɡ̶a-eloodoli oibake lale moikee mida naɡ̶atetigi. Aca eledi nale aneledi anodaaɡ̶ee moyoe boɡ̶oyajigota niɡ̶ina nalokodeɡ̶ecajo ane dinigaanye me walokodi, icaaɡ̶ica iodaɡ̶awa ane iɡ̶eke laxakawepodi. (Awiniteloco Mateus 27.29; 2 Timóteo 4.8; Tiago 1.12; Apocalipse 2.10; 14.14).

Leviita Ǥoneleegiwa anida aneetege licoɡ̶egi Levi aneledi lionigi Jacó. Niɡ̶icoa levitatedi ijokijo me doɡ̶odibatege epaa nipodigi niɡ̶ijo Josué naɡ̶a nawalacetibigi niiɡ̶o Canaã. Igaataɡ̶a Aneotedoɡ̶oji iolatedicoace moyaxawatece ane nibaketedi Aneotedoɡ̶oji liɡ̶eladi. (Awiniteloco Lucas 10.32; João 1.19; Atos 4.36).

Liiɡ̶exedi Aneotedoɡ̶oji Niɡ̶ijo Jesus noɡ̶opitedibigimece ditibigimedi, odaa niɡ̶ijo anodiotibece idokaanoɡ̶oyatigi me liiɡ̶exedi Aneotedoɡ̶oji. Niɡ̶ica libakedi aneneɡ̶egi ɡ̶oneɡ̶egi moyeloɡ̶oditedibece nibodicetedi anele aneetece Jesus. Niɡ̶icoa nokododi jiɡ̶idiaaɡ̶idi niɡ̶ica aneneɡ̶egi ida naɡ̶atetigi liwigotigi loiigi Cristo. (Mateus 10.1-4).

Liiakanaɡ̶axi judeutedi Onicoa niiakanaɡ̶axiidi inoatawece ane nigotadi, codaa me midiwataɡ̶a nigotakawaanaɡ̶a niiɡ̶o Israel. Niɡ̶ica noiigi yatecoɡ̶otibece midiwataɡ̶a niɡ̶icoa niiakanaɡ̶axiidi inoatawece saabadotedi mowajipatalo codaa modiniiɡ̶axitece liwai oxiiɡ̶odi lotaɡ̶a Aneotedoɡ̶oji. Codaa niɡ̶ica noiigi jiɡ̶idiaaɡ̶i maɡ̶aɡ̶a oyotaɡ̶aneɡ̶e Aneotedoɡ̶oji, codaa modoɡ̶etetibigimece Aneotedoɡ̶oji.

Lionigi Davi Boonaɡ̶adi aneledi oyatigi judeutedi Niɡ̶ica Aneotedoɡ̶oji ane niiɡ̶e me Ǥonewikatitoɡ̶odi. Niɡ̶ica oko anida aneetege licoɡ̶egi Davi. Joaniɡ̶idaa leeɡ̶odi midokoyatigi “Lionigi Davi”.

Ló Ló letexegi Abraão. Ló iomaɡ̶aditice me yemaa midiaa liɡ̶eladi nigotaɡ̶a Sodoma. Ica aanjo yadeegi Ló ijaa loiigiwepodi we nigotaɡ̶a me leegitece moyetecetice maleediɡ̶icatibige Aneotedoɡ̶oji me yatite noledi me yaaɡ̶adi naɡ̶aca nigotaɡ̶a, Sodoma. Pida naɡ̶aca lodawa Ló baɡ̶a dopitege lowidi, odaa ja yeleo. (Awiniteloco Lucas 17.28-32; 2 Pedro 2.7).

Maná Niɡ̶ica “maná” liweenigi Aneotedoɡ̶oji loiigi ane niwakateetediogi niɡ̶ijo Moisés naɡ̶a noɡ̶aticoace wetice Egito yadeegiticogi miditaɡ̶a nipodigi ane yadilo ane diɡ̶ica niɡ̶eladimigipi. Niɡ̶ica maná one yapacaɡ̶a, nipegedi micoataɡ̶a niɡ̶inoa lolacidawaanaɡ̶a. (Awiniteloco João 6.31, 49, 58; Hebreus 9.4; Apocalipse 2.17).

Marfim Niɡ̶ina noɡ̶onoɡ̶a naɡ̶aca ligipo ocaɡ̶ataɡ̶a elefante, odaa idokoyatigi me “marfim”. Nopokete leeɡ̶odi modatikata moyoe niwicidi niɡ̶ica jotigide. (Awiniteloco Apocalipse 18.12).

Melquisedeque Melquisedeque one inionigi-eliodi codaa me sacerdoti ane yewiɡ̶a niɡ̶icoa nokododi maleeɡ̶ijo Abraão. Odaa Abraão iweniɡ̶ide codaa eote noɡ̶etedi. Melquisedeque oiciaceeketege Jesus ane Ǥonionigi-eliodi codaa me Ǥonisacerdoti ɡ̶oneɡ̶egi. (Awiniteloco Hebreus 5.6-10; 6.20; 7.1-17).

Mercúrio Mercúrio eledi noenoɡ̶odi noiigi greego. Oditibige miniɡ̶ina ane yadeegitiogi libodigi ane ligegi eletidi noenoɡ̶ododi.

Mirra Mirra niale-litiiɡ̶a anoibake moyoe edokojegi ane liditege lanigi. Idatecibece maɡ̶aɡ̶a oyawanaɡ̶aditege viinyo moyoe me niwetadi ane ilidaɡ̶aditi oko ane ilee. Codaa aaɡ̶aɡ̶a oyocelatigi loolatedi émaɡ̶aɡ̶a. (Mateus 2.11; Marcos 15.23; João 19.39; Apocalipse 18.13).

Moisés Moisés lacilo-nelegi noiigi Israel. Liidaɡ̶adi minitaɡ̶a ica diimigi-nelegi liɡ̶eladi Faraó. Niɡ̶idiaaɡ̶idi ja lowoogo me ika icoatawece ane libinico niɡ̶ijo anei eotibige me yakadi meo ane iiɡ̶ete Aneotedoɡ̶oji. Aneotedoɡ̶oji iiɡ̶e Moisés me yadeegiticogi noiigi Israel wetice niiɡ̶o Egito. Egito jiɡ̶idiaaɡ̶i me nawikodeeɡ̶a. Aneotedoɡ̶oji yajigote Moisés liiɡ̶enatakaneɡ̶eco me yajigotiogi noiigi Israel niɡ̶ijo Aneotedoɡ̶oji neɡ̶eote odoejegi nimaweneɡ̶egi me dinilakidetetege oko. Odaa Aneotedoɡ̶oji dibatetege noiigi Israel me nebi. Moisés jeɡ̶epaa idí niɡ̶ijoa odoejedi ciinco notaɡ̶anaɡ̶axiidi miditaɡ̶a liwai oxiiɡ̶odi lotaɡ̶anaɡ̶axi Aneotedoɡ̶oji. Moisés aaɡ̶aɡ̶a iiɡ̶axitece ane yemaa me lakataɡ̶a loiigi.

Nicolaítatedi Icoa nicolaítatedi odiotece ica niiɡ̶axinaɡ̶aneɡ̶egi ane deɡ̶ewi, owo ligecaɡ̶aloɡ̶o icoa lapoli loiigi Cristo midiwataɡ̶a nigotadi Éfeso ajaa Pérgamo. (Awiniteloco Apocalipse 2.6, 15).

Nínive Nínive nigotaɡ̶a ane iiɡ̶etedicogi Aneotedoɡ̶oji Jonas. (Awiniteloco Jonas).

Oliveira Judeutedi eliodi moibake ela naɡ̶aca niale oliveira moyoe najidi codaa me aniginoa eletidi loenataka. Jesus lemaanigitedibece migo midiwataɡ̶a icoa nawodigijegi oliveira ane ideite ditibigimedi aca wetikawaana wetice nigotaɡ̶a Jerusalém. (Awiniteloco Mateus 21.1; 24.3; 26.30).

Ómega (Awiniteloco “Alfa”).

Pentecostes (Awiniteloco “Festa da Colheita”).

Pérola Wetiɡ̶a ane diniwaloe anoyakadi catinedi aca netapini akiidi-eliodi. Aɡ̶aca eledi wetiɡ̶a ane naɡ̶axateloco niwaló niɡ̶icoa nokododi. (Awiniteloco Mateus 7.6; 13.45; 1 Timóteo 2.9; Apocalipse 21.21).

Pilatos Ijaaɡ̶ijoa niɡ̶icoa nokododi Jesus me diiɡ̶axinaɡ̶a digoina iiɡ̶o, odaa César ja ixotio Pôncio Pilatos, ane romaano, me iiɡ̶e nipodaɡ̶a Judéia. (Awiniteloco Lucas 3.1). Pilatos ɡ̶oneleegiwa ane diɡ̶ica me iwikode. (Lucas 13.1). Ayemaa me yowooɡ̶odi migeo ane iɡ̶enaɡ̶a, odaa jiɡ̶ijo ikatice ɡ̶onematagodi niɡ̶ijo naɡ̶a diiɡ̶enatakatalo moyeloadi Jesus. (Awiniteloco Mateus 27.2, 11-26).

Querubim Querubim one dabade. Ida liwai domaɡ̶a latopiwa eijeeɡ̶agi, pida neɡ̶eledi liwai ja liciagi oko. Idioka limedi me ideiticoace lodoe Aneotedoɡ̶oji, codaa oikee Aneotedoɡ̶oji me nelegi codaa meliodi loniciwaɡ̶a, codaa me diɡ̶ica lapioyaɡ̶ajegi. (Awiniteloco Apocalipse 4.6-8).

Raabe Niɡ̶icoa nokododi Josué naɡ̶a doletibige me iiɡ̶e noiigi Israel modibatege niiɡ̶o Canaã, iiɡ̶o ane ligegi Aneotedoɡ̶oji me yajigotediogi loiigi. Niɡ̶icoa nokododi Josué ja iiɡ̶e icoa ɡ̶oneleegiwadi migotibeci oiɡ̶oadita niɡ̶idi iiɡ̶o me diɡ̶ica ane yowooɡ̶odi. Pida niɡ̶idiaaɡ̶idi joɡ̶oyowooɡ̶odi miditibige miditaɡ̶a niɡ̶idi nipodigi. Odaa aca iwaalo ane liboonaɡ̶adi Raabe ja yaxawa moiwoko laxakawepodi niɡ̶ijoa ɡ̶oneleegiwadi. Raabe aɡ̶ica aneetege noiigi Israel, codaa ewocoma majo. Pida Raabe etiwaɡ̶ataka Aneotedoɡ̶oji me ideite miditaɡ̶a noiigi Israel. (Awiniteloco Hebreus 11.31; Tiago 2.25).

Raquel Raquel lodawa Jacó, jaɡ̶ajaa eliodo José ijaa Benjamim. (Awiniteloco Mateus 2.18).

Rebeca Rebeca lodawa Isaque, jaɡ̶ajaa eliodo Jacó ijaa Esaú. Awiniteloco Romanos 9.10).

Sacerdoti Sacerdotitedi ɡ̶oneleegiwadi judeutedi anida aneetege licoɡ̶egi Levi. Libakadi liɡ̶eladi Aneotedoɡ̶oji. Onigodi, odaa oibootalo Aneotedoɡ̶oji niɡ̶ina anoyadeegitiogi loiigi mowotibige Aneotedoɡ̶oji me ixomaɡ̶ateetedice libeyaceɡ̶eco. Pida icokica lacilo-sacerdotitedi me yakadi me dakatio lodoe Aneotedoɡ̶oji, minitaɡ̶a le Aneotedoɡ̶oji liɡ̶eladi anoiomaɡ̶aditice mepoka nebiteda Aneotedoɡ̶oji. Niɡ̶ica lacilo-sacerdotitedi onidatece me dakatio onidatece nicaaɡ̶abi niɡ̶ina me yadeegi lawodi eijedi ane ibootalo Aneotedoɡ̶oji leeɡ̶odi libeyaceɡ̶eco noiigi codaa me epaa libeyaceɡ̶eco. (Awiniteloco Hebreus 5.1-5; 7–9).

Saduceu Ǥoneleegiwa judeu anida aneetege ica lapo lacilodi judeutedi. One liicotedi, codaa initecibece sacerdoti. Boɡ̶oyiwaɡ̶adi niɡ̶ijoa ciinco notaɡ̶anaɡ̶axiidi ane idí Moisés, pida baadoɡ̶oyiwaɡ̶aditedi niɡ̶ijoa eletidi lotaɡ̶anaɡ̶axiidi Aneotedoɡ̶oji lotaɡ̶anaɡ̶axi. Pida baadoɡ̶oyiwaɡ̶adi Aneotedoɡ̶oji micota me yewikatiditace émaɡ̶aɡ̶a, codaa baadoɡ̶oyiwaɡ̶adi Aneotedoɡ̶oji micota me iwi anigotediogi codaa me iloikatidi oko leeɡ̶odi libeyaceɡ̶eco. Codaa aɡ̶oyiwaɡ̶adi minoa niwicidi inaa aanjotedi. Niɡ̶icoa saduceutedi aɡ̶oilaɡ̶atege fariseutedi. (Awiniteloco Mateus 22.23-33; Atos 23.6-10).

Safira Wetiɡ̶a aneliodi niwaló, one imakataɡ̶adi. (Awiniteloco Apocalipse 21.19).

Salomão Salomão lionigi Davi. Aneotedoɡ̶oji yajigote lixakedi Salomão, odaa jiɡ̶ijaaɡ̶ijo aneneɡ̶egi inoa lixaketedi liwigotigi inatawece ane niiɡ̶enatakanaɡ̶a digoina iiɡ̶o. Aneotedoɡ̶oji aaɡ̶aɡ̶a yajigote owidi niliicaɡ̶ajetecidi. Niɡ̶icoa nokododi aona niɡ̶ica doɡ̶odabiteɡ̶etini Aneotedoɡ̶oji liɡ̶eladi, ijokijo niɡ̶ijo nopegedi Aneotedoɡ̶oji ane ikeete Moisés anigota me yoe. Odaa Aneotedoɡ̶oji ja iiɡ̶e Salomão me dabiteɡ̶etini odoejegi liɡ̶eladi Aneotedoɡ̶oji. Niɡ̶idiaaɡ̶idi naɡ̶a notigimadaɡ̶a noiigi Israel, odaa Aneotedoɡ̶oji ja ika laxakawepodi noiigi Israel modakatiwece Jerusalém, odaa joɡ̶oyaaɡ̶adi niɡ̶ijo Aneotedoɡ̶oji liɡ̶eladi libinienigi, loenatagi Salomão. (Awiniteloco Mateus 6.29; 12.42; Lucas 11.31; 12.27; Atos 7.47).

Samaritaano Samaritaano oko anelatibige nipodigi Samaria. Samaria idei liwigotigi nipodigi Galiléia ajaa Judéia. Judeutedi ijaa samaritaanotedi ailaɡ̶atiwage, leeɡ̶odi lakataɡ̶a codaa anee modoɡ̶etetalo Aneotedoɡ̶oji adiniciamico. (Awiniteloco Lucas 9.51-53; João 4.1-42).

Samuel Samuel inaaɡ̶ina ane yeloɡ̶oditedibece lowooko Aneotedoɡ̶oji, codaa eliodi notoetiigi. Aneotedoɡ̶oji ikeete Samuel me iolatedice Davi me ninionigi-eliodi judeutedi. Odaa Samuel ja yadoteloco lajidi oliveira lacilo Davi, ane lakatigi judeutedi me ikee Aneotedoɡ̶oji me iolatedice Davi me ninionigi-eliodi loiigi Aneotedoɡ̶oji. (Awiniteloco Atos 3.24; 13.20; Hebreus 11.32).

Sara Sara lodawa Abraão, one iwaalo libiniena. (Awiniteloco Romanos 4.19; 9.9; Hebreus 11.11; 1 Pedro 3.6).

Sárdio Wetiɡ̶a ane diniwaloe, anitecibece one yoniciwadi me ixagodi, pida anitecibece iɡ̶owa me ixagodi. (Awiniteloco Apocalipse 21.20).

Sardônia Wetiɡ̶a ane diniwaloe, anitecibece ixagodi, aniaaɡ̶eledi iɡ̶owiwaɡ̶a. (Apocalipse 21.20).

Serafim Serafim onidiwa seis labadi, codaa onidioka limedi me idei lodoe Aneotedoɡ̶oji. Serafim oikee miniwa Aneotedoɡ̶oji, codaa oikee Aneotedoɡ̶oji me nelegi, notoedi codaa me yapidi.

Sião Inionigi-eliodi Davi dibanoonaɡ̶atece Lojotaɡ̶adi Sião, ibanootece laxakawepodi loiigi Aneotedoɡ̶oji. Aneotedoɡ̶oji liɡ̶eladi odabiteɡ̶eti ditibigimedi niɡ̶ini lojotaɡ̶adi ane idei catiwedi nigotaɡ̶a Jerusalém. Niɡ̶idiaaɡ̶idi nigotaɡ̶a Jerusalém idokaanoɡ̶oyatigi me Sião. (Awiniteloco Romanos 9.33; 11.26; Hebreus 12.22; Apocalipse 14.1).

Sinai Aneotedoɡ̶oji iiɡ̶e Moisés me dalaɡ̶atetibigimece aca wetiɡ̶a anodita Sinai, niɡ̶ijo Aneotedoɡ̶oji naɡ̶a yajigote niɡ̶ijoa deez liiɡ̶enatakaneɡ̶eco me yajigotiogi noiigi Israel. (Awiniteloco Atos 7.30, 38; Gálatas 4.24-25).

Sodoma Sodoma ajaa Gomorra nigotadi Aneotedoɡ̶oji ane yaaɡ̶adi leeɡ̶odi loenataka ane daɡ̶axa me beyagi niɡ̶ica niɡ̶eladimigipi. Ló jiɡ̶idiaa liɡ̶eladi manitaɡ̶a Sodoma. (Awiniteloco Mateus 10.15; 11.23-24; Lucas 17.29; Apocalipse 11.8).

Topázio Wetiɡ̶a ane diniwaloe, one iɡ̶owi. (Awiniteloco Apocalipse 21.20).

Videira “Videira” libatadi uuva. Judeutedi eneɡ̶egi elanigije. (Awiniteloco Mateus 20.1; 21.28; João 15.1, 4, 5; 1 Coríntios 9.7; Apocalipse 14.18, 19).

Waxacoco Noiigi judeu niliidaɡ̶atagodi waxacocoli, odaa onigodi owotibige moyakadi moibootalo Aneotedoɡ̶oji leeɡ̶odi libeyaceɡ̶eco. Idioka limedi mini oko ane doweditelogo waxacocoli. Niɡ̶ini nowienoɡ̶odi waxacocoli yadeegitedicogi miditaɡ̶a niɡ̶ina nadegogo ane daɡ̶axa mele, codaa aika daɡ̶a nakaloitedi diwilecoɡ̶oxodi. Maditaɡ̶a Aneotedoɡ̶oji lotaɡ̶anaɡ̶axi elioditibece moiciaceeketege loiigi Aneotedoɡ̶oji niɡ̶ina lapo waxacocoli. (Awiniteloco Mateus 9.36; 10.6; 21.16-17; Hebreus 13.20). Ǥoniotagodi Jesus aaɡ̶aɡ̶a oiciaceeketegeniɡ̶ina nowienoɡ̶odi waxacocoli. (João 10). Jesus oyatedigi me niwaxacoco Aneotedoɡ̶oji leeɡ̶odi Aneotedoɡ̶oji niiɡ̶e Jesus menagi yeleotedoɡ̶odomi eotedibige Aneotedoɡ̶oji me yakadi me ixomaɡ̶ateetedice codaa me napitaɡ̶adi ɡ̶obeyaceɡ̶eco. (Awiniteloco João 1.29, 36; Apocalipse 5–7; 12.11; 13.8; 14; 21–22).