An atiklábtsik xu kʼwajíl Nínibe in jilaꞌtsik ti walablom
3
Tawná juní tin chabtal na Jonás kʼal an Okʼóxláb,
ani utsan enchéꞌ:
2 Ki kʼale ban pulek bitsow xin bij Nínibe,
ani ka tʼilaꞌ tajaꞌ xowaꞌ Nanáꞌ neꞌech tu utsaꞌ.
3 Kʼale tám Nínibe na Jonás jelt xanti utsan kʼal an Okʼóxláb.
Jechéꞌ an bitsow xi Nínibe púlek tʼajat,
yejat óx a kʼítsá i belách abal ka lonyat.
4 In tujúch tám na Jonás ka ochich ban bitsow,
beley jun a kʼítsá,
ani lejat neꞌech u belal,
in ulal enchéꞌ:
―Téꞌ chab inik a kʼítsá,
an atiklábtsik xu kʼwajíl techéꞌ Nínibe neꞌech ka kʼibdhá.
5 An atiklábtsik xu kʼwajíl Nínibe in beltsitsik na Dios,
in ulutsik abal ka tʼajan i kʼílnich ani xeketlintsik kʼal i kodhow kʼudhkʼum,
xi pakdhaꞌtsik asta xi tsʼitsik.
In tʼajaꞌtsik anchanꞌ,
abal kin xalkʼa' ke in jilálichtsik an ti walablom.
6 Tamti an pulek takʼix xi Nínibe in achʼaꞌ jechéꞌ,
chʼakay ban kʼwajtaláb xonti buxúl,
in kʼotʼiy nin kʼudhkʼúmil,
bolin kʼal i kodhow kʼudhkʼum ani buxkan ba kʼwixix.
7 An pulek takʼix junax kʼal nin tolmiwáltsik in abnaꞌ tám ka tʼilan jechéꞌ putál Nínibe:
―I atiklábtsik ani i koꞌnéltsik,
i bakatsik ani i borregotsik,
yab kin kʼaputsik ni jun xataꞌ,
yab ka kʼapundhátsik,
nibal kin uchʼaꞌtsik i jaꞌ;
8 tokot ka bolintsik kʼal i kodhow kʼudhkʼum an atiklábtsik ani an koꞌnéltsik.
An atiklábtsik kin chapik tawnaꞌtsik na Dios,
kin jilaꞌich an ti walablomtsik ani yabich más kin tʼajaꞌtsik xowaꞌ yab alwaꞌ.
9 Yab telab max na Dios ka kuxkulách,
ani yabich más ka chakuy abal yab ti ku kʼibdhaꞌ.
10 Tamti na Dios in chuꞌu xowaꞌ in tʼajaꞌtsik ani in jilaꞌ an ti walablomtsik,
yabich tám in tʼajtsi xowaꞌ in chalpayámal ke neꞌech kin tʼajtsitsikwiꞌik.