Chákuy na Jonás
―Okʼóxláb,
¿yabxeꞌ jaꞌich jechéꞌ xowaꞌ nanáꞌ u ulu tamti bél in kʼwajat ba nu chabálil?
Jaxtám tin ájlách jikʼat abal Tarsis;
pos nanáꞌ u choꞌóbich ke Tatáꞌ jaꞌich jun i Dios xi yajnantsix ani i kʼanidhax,
yab jikʼat i chakúlmél,
i yajnantsix tʼajat ani yab a tʼajál xowaꞌ xi yab alwaꞌ.
3 Okʼóxláb,
pos xoꞌ tu kontsal abal tikin chemdhaꞌ;
pos más alwaꞌ abal nanáꞌ kin chemech ké kin kʼwajay ejat.
4 Por tókʼoyat enchéꞌ kʼal an Okʼóxláb:
―¿A chalpayalxeꞌ ke alwaꞌ abal i chakúl tʼajat?
5 Kale tám na Jonás ba jachanꞌ an bitsow,
ani kʼale ti koyol tin ejtsím kalel kʼítsá.
Taja',
in tʼajaꞌ jun i padhel kʼal in kʼweꞌéltsik i teꞌ,
ani buxkan tajaꞌ ti chalám,
asta kin chuꞌu xantʼéy ka támun ba jachanꞌ bitsow.
6 Na Dios an Okʼóxláb,
in ixkʼandhaꞌ jun akanlek i kʼalam xi nukʼey tin éb xonti kʼwajat na Jonás abal ka chalmiyat kʼál ani kin achʼaꞌ más kʼijidh;
ani na Jonás kulbé tʼajat kʼal tin kwenta jechéꞌ in akan an kʼalam.
7 Por tamti jun tsudhelom,
tamti exomich ti tsudhél,
na Dios in abaꞌ jun i dhúm abal kin kʼaptsi tin akan jachanꞌ an kʼalam ani wayey nin akan an kʼalam.
8 Ani tamti kaléch na kʼítsá,
na Dios in tʼajaꞌ ka waꞌun jun i chapik kʼák' ikʼ xi tál tin ejtsím kalel kʼítsá.
Na Jonás in achʼaꞌ jelti max u tsiktsinalich tʼajat tin ókʼ kʼal an kʼakʼal ani in achʼál jelti max u putélich tʼajat.
Kom in léꞌakich max ka chemech,
in ulal enchéꞌ:
―Más alwaꞌ abal nanáꞌ kin chemech ké kin kʼwajay ejat.
9 Por utsan enchéꞌ na Jonás kʼal na Dios:
―¿Watʼatsich tʼajat ta chakúl kʼal tin kwéntakʼi in akan an kʼalam?
Ani jajáꞌ tókʼon enchéꞌ:
―Watʼats tʼajat ke asta u léꞌakich max kin chemech.
10 Utsan tám enchéꞌ kʼal an Okʼóxláb:
―A tʼeꞌpintsi tʼajat nin akan an kʼalam,
ani yab tatáꞌ a tʼayámal nibal tatáꞌ a pubedhámal;
xi ixkʼan ani pubey jun i akal,
ani tin chábláb an akal chemech.
11 ¿Yabxeꞌ alwaꞌ ku kóꞌontsi ti yajnantsixtaláb an atiklábtsik xu kʼwajíl Nínibe,
an yejcheꞌ bitsow xon tu kʼwajíl watʼats akak inik mil atiklábtsik xi yab in witʼáltsik kin exlaꞌ xowaꞌ jáꞌ nin eját kʼubak ani nin kʼwatab,
ani yán i koꞌnéltsik?