Yuus israelita ainan wina umirtuktarma tusa timau
5
Amós nina patai israelita ainan chicharuk:“Ashammain atumin atatui.
Tumatin asamtai wii wake mesemar nekapeakun
útkun kantamaj nu antuktarma”.
2 Nuwa agkantu pachiachmau nina nugkenig
jakamtai inanmain ainatsui.
Numamtuk atum, Israel shuar ainatirmesha jinattarme.
3 Atum israelita ainatirmin Yuus chichartamuk:
“Chikichik yaaktanmaya
mil suntar aina maaniawartasa weartatui.
Turasha nuiya cien suntar aina iwáku waketiartatui,
tura cien suntar aina maaniawartasa weartatui.
Nu ciennumiagka diez suntarak iwáku waketiartatui.
4 Yuus israelita ainan chicharuk: Iwáku pujuartasa wakeruinakka
wina umirtukarti tawai”, Yuus tinaiti.
5 Nekas yuuschauwa nuna yainmaktaji tusarka
Betelnum wecharti, nui wenakka ijinam artatui.
Nekas yuuschauwa nuna yainmaktaji tusarka
Guilgalnum wecharti,
nui wenakka achirar chikich nugkanam yarumam artatui.
Tura nuna tumainachkusha antra yuusrimtai aina nuna
yainmaktaji tusar Beerseba nugka
nagkatka nunigsha tsupinawar eainak wecharti.
6 Wina umirtuinakka jinachartatui.
Antsu wina umirtuinachkaigka nita nugken ekeematkarti tusan
shuari ainan akuptukartatjai.
Wii nuna Betelnum turamtai
ji keakaigka pegkesha ikajnakchartatui.
7 Atumka shuar waitkamu aina nu ayamrutsuk
shuar iturchatan apujaina nu yayárme.
Tura asarum pegker takatsuk
pegkerchau takarme.
¡Tuma asaakrumin atumnaka wait anentajrume! tusa Yuus tawai tinaiti.
8 Niyaiti ya ainan,
tura nayaimpincha najanaka.
Tsaaptinan káshi amajnaiti,
tura káshin tsaaptin amajnaiti.
Niyaiti entsan nayantsanmayan jiiki nugkan ukatnuka.
Nina naarigka Yuus ashi senchirtin tutaiyaiti.
9 Niyaiti yaakat shir
pegmarmauncha yumpuinka,
10 Apu chichaman iwarin aina
pegker takakmainan,
tura chicham nekasa nuna
jintinkartuinan nakitainawai.
11 Nitaka shuar kuitrinchau ainan
apunu atin juaji tusar
trigo ainan nukap atantainak waitkainawai.
Nuna tumaina asar kayan nakarar pegker
pakamkar jean jeamkaru aina nuigka
pujuschartin ainawai.
Tura uva arakmauri pegker aina nuiyanka
vinon najanawarkesha umarchartin ainawai.
12 Wika nita pegkerchau ainan shir nukap
takaina nunaka shir nekajai.
Tura apu chichaman iwarin ainasha,
shuar iturchattri aramu ainan akirkata tusar
kuitan emtika seainawai.
Nuna turawaru asar chichaman iwarartasa
iruuntramunam shuar iturchattri atsurmau pegker ainan waittan suinawai.
Turuinak shuar iturchattri aramu ainan
waittan sutsuk inaiyainawai.
13 Ju tsawanta juika pegkerchau ainan
nukap takainawai, tumaina asarmatai
shuar yacha ainaka pachitsuk pujuinawai.
14 Pegkera nu takákrum
pegkerchauwa nuka inaisatarma.
Nu tumakrumka nukap tsawan pujuttarme.
Nu tumakrumin atum chichakrum,
Yuus ashi senchirtina nu, inii pujawai
tusarum turutrum nuka nekas titatrume.
15 Pegkerchauwa nuka nakitratarma,
pegkera nu takastasrum wakeritarma.
Chicham iwarin ainatirmesha
chicham iturchat akaisha,
uruk iwaratin tusa timauwait
turusrumek umiktarma.
Nu tumakrumnaka
wii Yuus ashi senchirtinaitaj nuna,
atum Israel nugkanam
iwáku ujumak shuar juakutirmin pegkernum
yaimainaitjarme.
16 Yuus ashi senchirtina nu, atumin chichartamuk:
“Ashi plaza ainanam shuar aina útiartatui.
Ashi jinta ainanam shuar ainaka
wake mesemar nekapenak senchi chichartatui.
Nuna tumainak shuar ajanam takau ainan,
tura nuwa úttan yacha ainancha atumsha
ashi aja vid arakmau ainanmasha útiartatui”.
18 Yuus taati, tusar
shuar wina umirtichu ainayat nakaraina nunaka wait anentainajai.
Nitaka wii taakaisha tsawancha
urukatnukit nunaka nekainatsui.
Wii taattaj nuigka, tsaaptinka achattawai,
antsu nuigka ashammain káshi jastatui.
19 Nu tsawantinka shuar león patatam
ashamak tsekegki weajkama
osojai igkuniak nu senchi ashamak tsekenki
jea tanishrin achimtatmaun
nápi asaim ashammaina numamtuk atinaiti.
20 Numamtuk wii taatnaitaj nuigka
tsaaptin achatnaiti.
Antsu káshi jastinaiti.
Nu tsawantinka shir aneaschartinaiti,
antsu shir senchi wake mesemar atinaiti.
21 Jiistamtai tsawan aina jeakai
jiistamaina nunaka wika shir nakitajai.
Tura wina emematriartasa irunaina nunasha
shir enentaimtatsjai.
22 Wina eme anentrus iirainak
araka jigkai ainan epena nunaka nakitajai.
Agkan pujusmi, tusar
tagku nuweram ainan, araka nere ainan
wina itartuina nunasha wika nakitajai.
23 Ni emematji tusar
kantamainak pampaina nunaka inaisarti.
Ni emematmi tusar
arpan awataina nunasha wika nakitajai.
24 Wika entsa uuntri kuyua muku jachua
numamtuk, chicham iturchat akaisha,
uruk iwaratin tusa timauwait
nuka turusrumek tuke umitarma
tusan wakerajai.
Wika ashints kuyua muku jachua numamtuk,
chichamnaka tuke umin arti tusan wakerajai.
25 Atum, israelita ainatirmin uuntri aina,
aya nugkanmag cuarenta uwí yujasarua nuisha,
wina eme anentruinakka tagku ainan maawarka
ajamnaisacharu ainawai.
Tura warí ainancha winaka anajmatruacharu ainawai.
26 Turasha yamaika atum ainatirmeka,
atum apu tusarum yuusrimtai Sicut tutai,
tura nuna yaari tusarum najanamu
Quiún tutaiya nusha eme anentsa iiyakrum yanasrum yujarme.
27 Nuna tumaina asarmatai nitanka
achirar Siria nugkan ikuki
Damasco nugkanam yaruakartatui.
Yuus ashi senchirtin tutaiya nu turamrume, tusa tinaiti.