Tura amina naarmin pachisan tuke etsertatjai.

2 Apuru,

ashi tsawanjai metek pegkernum chichartatjame,

tura amina naarmin pachisan tuke ememattatjame.

3 Yuuska untaiti,

iman asa nigka ememattriarti tusa wakerawai.

Tura urukukit tusar enentaimtakrisha ejémaitsui.

4 Uchi aina akinak weartina nuka

ame wainchatai aina iwainaruitam nuna pachisar emematiartinaiti.

Tura amina senchirmijai najankamuram aina nunasha pachisar,

nita uchiri ainan tuke ujartinaiti.

5 Shuar aina amina senchirmin pachisar chichaartin ainawai.

Antsu wika shuarti turumainchau aina iwainakmauram aina nuna pachisan ememattinaitjame.

6 Amina senchirmijai shuarum aina

nepetnaitam nuna pachisar shuar aina

chichaartin ainawai.

Tura wisha amina senchirmin pachisan shuar ainan ujartinaitjai.

7 Amina wait anenkartutairmin pachisar etseriartinaiti,

tura shir aneas:

Yuusaiti pegkerka tusa kantamiartinaiti.

8 Yuuska wait anenkartinaiti.

Wári kajechuiti,

nigka senchi anegkratnaiti.^*

9 Yuuska ashi shuar ainan kuitamnaiti.

Tura ni najankamu ainancha ashi shir aneas kuitamnaiti.

10 Apuru,

ame najankamu aina ashi emematramiarti.

Tura amina umirtamin ainasha pegkernum chichartamiarti.

11 Shuar aina amina inamtairam

pegkera nuna pachisar chicharti.

Tura amina senchirmijai wainchatai aina

najankauwaitam nunasha pachisar chichartinaiti.

12 Amina senchirmea nuna,

amina inamtairam pegkera nujai

ashi shuar aina nekawarti.

13 Amina inamtairmea nuka

arumaisha tuke atinaiti.

Tuma asamtai ameka arumaisha

tuke inama pujutnaitme.

14 Apu Yuuska ni etegkamuri aina tunaun takas wake mesemar pujakaigka

ataksha yainaiti.

Tura kakamainchau jas pujauncha senchimtiknaiti.

15 Apuru,

shuar aina tsawan jeamtai yutain surusti tusa

amina nakarmainawai.

16 Tumainakai ame nita yuatnuka shir aneasam

suame,

turamu asar iwáku ainaka nuna ejémak nitaka

shir anenawai.

17 Ina apurigka ni anajmatamunka

metek uminaiti,

tura ni najankamuri aina nunaka

shir anentawai.

18 Ina apurigka,

shuar waitrutsuk seam

metek umirnaiti.

19 Ina apurigka:

Nina chichamen umin aina nu seamka

metek umirnaiti.

Tura uwemtiknaiti.

20 Ina apurigka ni aneamu ainan kuitamnaiti.

Antsu shuar tunaun takau ainanka ijinnaiti.

21 Apurun kantamrakun ememattatjai.

Tura ashi nugkanmaya aina

ina apuri naarin pegkera nuna pachisar:

Ameketme pegkeram tusar

yamaisha tura atakea nuisha tuke tiartinaiti.