Tura ame jeashat pujakmesha wii uruk enentaimja

nuka shir nekame.

3 Wii uruk wekaja nuka ameka shir nekame,

tura wii warina takája nu, tura ayamkun pujakaisha shir nekame.

4 Wika eke chichatsaig

warina titasnak enentaimaj nuka

emtikam ameka nekartame.

5 Yuusru,

ame kuitamrakum amina uwejmijai tentatkam pujame.

6 Ame nekatairmea nunaka

nekataj takuncha

pegkesha nekamain nekapeatsjai.

7 Ame ashi nugkanam nekam nuisha

¿amina ikuknasha tuig wenak umkatja?

8 Wii nayaimpinam wakamtaisha ameka nui pujuttame,

tura nugka init akaikimtaisha,

ameka nuisha pujuttame.

9-10 Wii nanaakin etsa watainmani

weakaisha untsur uwejmijai achirkau atatme.

Tura etsa akataiya nunii nayants amain wena pujusmataisha ame winaka waitkattame.

11-12 Yuusru, ame iismaka tsawai,

tura káshia

nusha tsawaijai metekaiti.

Tuma asamtai wii káshinam uumkan pujakaisha ameka waitme.

13 Apuru, ame wina nukuru ampujen egkemamtai,

wina iyashur najattruawaitme.

14 Wika ame imatika

najanamu asan maaketi tajai.

Ame najanamu aina nuka

ashi pegkerak ainawai.

¡Wika nunaka shir nekajai!

15-16 Chikich ainaka waitainatsaig,

ame winaka najatawaitme.

Ame turuta asam wii pujustinka wina nukuru ampujen egketaig ashi nekartuawaitme.

Tura urutam tsawanta wii pujustinaitja nusha amina papirumin aarmauwaiti.

17 Yuusru, ame enentaimmau aina nunaka shir enentaimtusan ejémain nekapeatsjai.

Tura nuna pachisan aujmattsataj takuncha ejémaitsujai.

18 Nuna aujmattsataj takuncha

yaikim nekapmamainchauwa iman nukap asamtai,

ame enentaimmau aina nunaka aujmatmain nekapeatsjai.

Tura kanaran shintakaisha wijaig pujame.

19 Apuru, shuar pegkerchau aina nuka

ijinata.

Turakum magkartin ainasha tupamtikrata.

20 Nu shuar ainaka,

amina naarmin pachisar

pegkerchau chichainawai.

Nu tumaina nunaka aantar kajenawai.

21 Apuru, amina kajertamin ainanka

wisha kajerajai.

Tura amina nakitramaina nunaka

wisha turusnak nakitajai.

22 Nu shuar tumau ainanka shir senchi kajerajai.

Amina shuarum aina nuka,

winasha shuarmatainawai.

23 Yuusru, wii enentaimmauka ameka shir nekame.

Tuma asam wina tunaur aruttsuash iirtusta.

24 Tura wii tunaun takatsjash nu iirtusta.

Turakum wina tuke umirtiti tusam yainkata.