Yuus najankamu aina nuka ashi nina emematiarti
148
¡Nayaim ainanmasha Yuus ememattarma!¡tura yaki agkarunmasha Yuus ememattarma!
2 Nayaimpinmaya shuar ainatirmesha
Yuus ememattarma.
3 Etsa, nantu,
tura ya etsantuk tsaaptin amajin ainatirmesha
Yuus ememattarma.
4 Nayaimpinam matsamin ainatirmesha Yuus ememattarma.
Tura yumi nayaimpin ukurin irunutirmesha
Yuus ememattarma.
5 Ni chichakmatai
ashi najanaku asamtai
Yuus ememattarma.
6 Yuus ashi umik inaisauwaiti,
tuke atinan,
tura atakea nuisha yapajiashtinan
chichaman metek umikuiti.
7 Nugkanam matsamin ainatiram,
kuntin uun nayantsanam matsamin ainatiram,
nayantsa kunari ainatirmesha Yuus ememattarma.
8 Charip, micha,
yumi ainatiram,
Yuus timau umin nase ainatirmesha
Yuus ememattarma.
9 Nain ainatiram,
ikam ainatiram,
cedro ainatiram,
tura númi neren ainatirmesha
Yuus ememattarma.
10 Kuntin tagku aina,
kuntin tagkuchu aina,
chigki aina,
kuntin japinas yujau ainatirmesha
Yuus ememattarma.
11 Tura apu nugka unnum inamin ainatiram,
ashi nugkanam apu inamin ainatirmesha
Yuus ememattarma.
12 Aishmag natsa ainatiram,
nuwa natsa ainatiram,
tura untash ainatirmesha
Yuus ememattarma.
13 Yuusa naari pachisrum,
tura ni ima uun asamtai pachisrum,
nina imantri ashi nugkanam,
tura nayaimpinmasha ashi nagkakartakua nu
Yuus pachisrum ememattarma.
14 Yuus ni etegkamu ainan senchimtiknaiti.
Tuma asamtai Israel weantu ainatika ni emematainaji.
¡Ina Yuusri emematmauwa nuka shir pegkeraiti!