Yuus israelita ainan Jerusalénnum wakettratarma timau
Yaakat Jerusalénnum wakattsa wesa kantamamu
126
Yuus israelita ainan achikmau matsatun Jerusalénnumataksha wakettratarma, tusa tinaiti.
Turasha karanam nekapmaina numamtuk nekapsaruiti.
2 Ni agkanmamtikamu asar,
shir anenak senchi kantamainak wishinakai,
shuar Yuusan umirchau aina chichainak:
“Yuus nitanka agkanmamtikayi”, tusar tiaruiti.
3 Nunaka nekas tiaru ainawai.
Yuus nitan agkanmamtikuk,
nina senchirijai nukap iwainakuiti.
Tura asamtai shir aneasaru ainawai.
4 Apuru, ina achirmakarmatai matsataj nu,
aya nugkanmag
yumi senchi yutukmatai nujagkrina numamtuk,
incha ame agkanmamtikartuata.
5-6 Shuar arakan waitas araa nerekmatai juuk,
nina jeen waketainak shir anen ainawai.
Numamtuk shuar Yuusa chichamen wekas etseruk,
waitak útiaru ainaka,
Yuus agkanmamtikam shir anenak kantamawartin ainawai.