Yuus uwemtikarturmaunam maaketi timau
118
¡Yuus maaketi titarma!niyaiti pegkerka,
nina anenkariya nuka tuke awai.
2 Israelita ainaka chichainak:
“Yuusa anenkarigka tuke awai tiarti”.
3 Sacerdote ainasha chichainak:
“Yuusa anenkarigka tuke awai tiarti”.
4 Tura Yuusan umirin ainasha chichainak:
“Yuusa anenkarigka tuke awai tiarti”.
5 Waitakun pujusan
yainkati tusan Yuusan seamiajai tura ai
ni anturtuk uwemtikrurmiayi.
6 Yuus wijai pujawai,
wika ashamkartatsjai,
tuma asamtai winaka chikichkiksha pegkerchauka amajtumain ainatsui.
7 Yuus wijai pujawai,
tuma asa winaka yaintui.
Wina kajertin aina nepetkam irunun
wainkattajai.
8 Shuar nekaspapita tu enentaimtutsuk,
nekas Yuusa nuke nekaspapita tusa enentaimtumainaitji.
9 Apu aina nu nekaspapita tu enentaimtutsuk,
Nekas Yuusa nuke nekaspapita tusa enentaimtumainaitji.
10 Chikich nugkanmaya shuar aina
wina kajertuinak tuartukarmiayi,
turasha Yuusa naarijai nepetmakmiajai.
11 Ashi shuar aina tentatkarmiayi,
turasha Yuusa naarijai nepetmakmiajai.
12 Etea numamtuk tentatkarmiayi,
turasha jagki irumramun ji keak aesna numamtuk jakarmiayi.
Tura Yuusa naarijai nepetkamiajai.
13 Ajuarar maami tusar shitatawarmiayi,
turasha Yuus wina yainkauwaiti.
14 Yuus wina senchimtikra nuna
kantamrajai.
¡Tura niyaiti wina uwemtikrinka!
15 Shuar Yuusan umirin ainaka,
jeen pujusar shir anenak untsumainak:
“Yuus nina senchirijai nepetmakai” tusar tiartinaiti.
16 Yuus nina senchirin
iwainamua nuka nekas pegkeraiti,
¡Yuusa senchiriya nu nepetmakai!
17 ¡Jakashtatjai, iwáku pujuttajai!
Yuus ina ayamrutmak
iwainakua nuna etserkattsan wakerajai.
18 Yuus winaka shir senchi
waittan surusuiti.
Turasha jakati tusagka inaituschauwaiti.
19 Yuusa jee pegkera nuna
waitiri uraitarma,
nui wayan Yuusan maaketi titatjai.
20 Ju waitiya juka
Yuus pujamunam waitaiyaiti.
Shuar Yuusan nemarin ainaka
nu waitiya nunii wayawartinaiti.
21 Yainkata tusa seam
ame anturtukam uwemtikruru asaakmin
Yuusa maaketi tajame.
22 Kaya ekenar jeamin aina
kaya pegkerchauwaiti tusa
nakitrarua nu yamai
nekas ima pegker atsumtai jasai.*
23 Nunaka Yuus turayi,
tuma asamtai shir puyatrusar enentaimtumainaitji.
24 Ju tsawanta juwaiti,
Yuus ina ayamrutmakuitaj nuka,
tuma asamtai yamai shir
aneakur jiistamawarmi.
25 Yuusa, wait aneasam
uwemtikarturta
Yuusa, wait aneasam
shir matsamsarti tusam yaigkratkata.
26 Yuus akupkamu wina nuka
pegkernum chicharkamu atii,
tura Yuusa jeen pujusrik atumka pegkernum chicharnarme.*
27 Apua nuka Yuusaiti,
Yuusaiti tsaaptinan suramsauka
yagkur aina yaruakar tagku aina maa patasa epetainam ejéniarmi,
turakur Yuus etegkamu aina matsataina nu
uyuntsarmi.
28 Apuru, ameka wina Yuusruitme,
tuma asaakmin maaketi tajame,
turakun amina imantrumin ememattatjame.
29 ¡Ina Yuusri emematiarmi!
Ni pegker asamtai maaketi tiarmi,
nigka inaitamtsuk tuke anenmaji.