Yuuska tuke aujmainaitji
116
Wii timaurun anturtuku asamtai,wika Yuusa nuna aneajai.
2 Wii timaurun anturtuku asamtai,
iwáku pujaj juikka tuke aujsattajai.
3 Jata achirkamtai jakattajapi tusan ashammiajai.
Nu jatajai ja asan, iyashrun najaimainakun
shuar achikam pujuwa numamtuk wake mesemar nekapmiajai.
4 Tuma asan Yuusrun aujkun:
uwemtikrurta tusan timiajai.*
5 Ina Apurigka pegker asa, shuar ainatin ashi iirmaji.
Turutma asa wait anentramaji.
6 Tura ina apurigka
shuar eme enentaimtushtai ainancha kuitamui.
Wii kakaamainchau jasan pujakaisha ni uwemtikrurmiayi.
7-8 Jakattsan pujai Yuus yainkauwaiti,
tura útmaurnasha emegkatruruiti.
Turuta asamtai yamaika shir enentaimsan pujustinaitjai.
9 Wii iwáku pujaj juik shuar aina matsatmaunam wekaaknasha,
Yuusnaka tuke umirkatnaitjai.
10 Wika senchi waitaknasha
Yuusan nekaspapita tusan timiajai.
11 Wii waurkamnau nekapeakun:
“Shuar ainaka ashi waitrinapi ainawa tu enentaimmiajai”.
12 Wina apur yaintuk pegker amajtusmauncha
¿warinak akiktaja?
13 Wii chichaakun:
Yuusa naarin pachisan
jakattsan pujai uwemtikrurmayi tusan titatjai.
14 Wii umiktajai tusan
Yuusan tinaitaj nunaka,
Yuusan umirin aina emtin umiktatjai.
15 Yuuska nina umirin aina jakamtaigka
wake mesemar nekapeawai.
16 ¡Apuru, wika amina inatairmetjai!
Wika ¡wina nukur inatairmea nuna uchiriyaitjai!
Jigkaamua numamtuk ashi jakattaku pujaisha ame winaka uwemtikruruitme.
17 Apuru, ame uwemtikruru asaakmin
amina eme anentsa iiyakun tagku ainan maa epeajai.
Turakun amina naarmin pachisnasha aujeajme.
18 Wii umiktajai tusan
Yuusan tinaitaj nunaka,
Yuusan umirin aina emtin umiktatjai.
19 Yaakat Jerusalénnum ajapeentrin wajasan,
amina ememattasa iruuntai jeanam aarin
nunaka umiktatjai.
¡Ina apuri emematiarmi!